1 Melekisedeki bewowo, wuba ntinu yi Salemi na nganga-Nzambi yi Nzambi Yihyokidi Kuzangama, wuyenda bwana Abalahami bu kedi kwiza vutuki ku manima me bedisa zintinu. Melekisedeki wusakumuna Abalahami. 2 Ku yandi Abalahami kahaana kibuku ki kumi-kumi mu bima bimvimba bi kabaka. Mbangudulu yi nkumbu yi Melekisedeki wudi ntete «ntinu yi lunungu», mboki wudi ntinu yi Salemi mpila mosi ti, «ntinu yi kiyenge». 3 Kaa na tata na ngudi ko, mpe kaa na nkuna ko. Kaa na mbandukulu na nsukunu ko. Kansi fwanakani na Mwana-Nzambi, mpe wudi nganga-Nzambi yi mimvu ka mimvu.

4 Taleeno bwedi kadi wuzangama! Nkaka eto Abalahami wumuhaana [mpe] kibuku ki kumi-kumi mu bima bi kabaka ku kaba mu nwana mvita. 5 Kansi, yobobo badi zinganga-Nzambi mu nkuna yi Levi, Misiku mina bahaana luve mu lomba kibuku ki kumi-kumi ku baala ba-Isaeli, mpila mosi ti ku zimpangi zi yawu bende zidi mpe mu nkuna yi Abalahami. 6 Yandi Melekisedeki kaba mu nkuna yi Levi ko, kansi Abalahami wumuhaana kibuku ki kumi-kumi mu bima bi kabaka. Mpe wusakumuna yondowo wutambula nsilulu zi Nzambi. 7 Kansi wulembolo sa maketiketi, yondowo kwe sakumunanga hyokidi kuzangama na yondowo wu bana sakumuna. 8 Bantu ba nkuna yi Levi bakwe tambulanga kibuku ki kumi-kumi ki bimvwama, badi bantu bakwe fwanga. Kansi, Melekisedeki wutambula kibuku ki kumi-kumi bekyokyo mu moko ma Abalahami, moyo kadi bonso bu wudi wusonama. 9 Mu manisa, bantu ba nkuna yi Levi bakwe tambulanga kibuku ki kumi-kumi ki bimvwama, tulendi ta ti, yawu mpe kyabafuta mu ntangu Abalahami bu kafuta kyo. 10 Mu dyambu ti, tekila Levi kabutuka, yandi wuba mu luketo lu nkaka andi Abalahami mu ntangu Melekisedeki yi kamubwana.

11 Misiku mi bahaana ku mukangu wu Isaeli, mizakala mu kinganga-Nzambi ki nkuna yi Levi. Kansi, tala ti zinganga-Nzambi zi nkuna yi Levi zisala kisalu kimbote, nganunu kuduuka nganga-Nzambi yihiika ko mu mulonga wu Melekisedeki, kansi ka mu mulonga wu Aloni ko. 12 Mu dyambu ti, bu bakwe sanzanga kinganga-Nzambi, bafweti sanza mpe Misiku. 13 Misamu bemimi misonama mu dyambu di Mfumu eto. Yandi vwihulu mu kifumba kyaka kyasedi kisalu ki kinganga-Nzambi ha ziku di bakwe yokilanga minkayulu. 14 Wutoma zabakana wudi ti, Mfumu eto mu kifumba ki Yuda kadi, mpe Mose kata nakani musamu ko mu kifumba ki Yuda bu kazonzila mu zinganga-Nzambi.

15 Misamu mina lonka makedika mu mimvimba bemyomyo ni emi: nganga-Nzambi yihiika yiyiza yidi yifwanakana na Melekisedeki. 16 Kayiza ba nganga-Nzambi, mu dyambu di misiku mitadidi nkuna yi bantu ko, kansi bamubyeka nganga-Nzambi mu lulendo lu luzingu lulembolo ba na nsukunu. 17 Mu dyambu ti, Masonama mana ta ti:

«Waaba nganga-Nzambi mimvu ka mimvu,

mu mulonga wu Melekisedeki*.»

18 Buna Nzambi wukatula Misiku mintete mu dyambu ti miba ngolo na mfunu ko. 19 Mu dyambu ti, Misiku mi Mose minata nakani kima kimosi ko mu ba kilunga. Ni hahoho ha kibuka ki Misiku, tubakila kivuvu kihyokidi kitezo, mu kyawu tweka bela-bela na Nzambi.

20 Mpe Nzambi ndefi yakadya. Bantu bahiika bababyeka zinganga-Nzambi, badya ndefi beyoyo ko. 21 Kansi Yesu, bamubyeka Nganga-Nzambi mu ndefi yi bamudila ku Nzambi bu kata ti:

«Mfumu wudya ndefi na kalendi sanza mpova andi ko:

"Wudi Nganga-Nzambi, mimvu ka mimvu.*"»

22 Ni hahoho, Yesu wuhikidi mpe muntu wubunda ntulu mu luwawanu luhyokidi lumbote.

23 Musamu wuhiika wu diswaswani ni ewu: nganga-Nzambi zizingi zedi hingananga, mu dyambu ti lufwa lwedi bakakidilanga mu tatamana mu sala kisalu kyawu. 24 Kansi Yesu wuna zinga mimvu ka mimvu, mpe kinganga-Nzambi kyandi kilendi kituka ko. 25 Ni hahoho, lendi vuukisa kimankululu bantu bana finama ku Nzambi mu nzila andi, mu dyambu ti, wudi wumoyo ntangu zimvimba mu badiila mvutu ku Nzambi.

26 Buba bufwanakana ku yeto mu ba na Mfumu Nganga-Nzambi yibobo, wudi Wulongo, wulembolo ba na kibila, wulembolo sumuka, mpe wudi kitatu na minsumuki na wuzangama kuhyoka mazulu. 27 Kaa na nsatu ko mu haananga kadi kilumbu minkayulu bonso zimfumu nganga-Nzambi zihiika, ntete mu dyambu di masumu ma yandi bende, mboki masumu ma mukangu. Yesu nkumbu yimosi kaka kasa bobo ki mankululu, bu kakiyekola yandi bende. 28 Misiku mi Mose mikwe byekanga zimfumu nganga-Nzambi bantu balembolo ba balunga. Kansi, ndefi yidya Nzambi mu mpova ku manima ma Misiku, yibyeka Mfumu Nganga-Nzambi Mwana wu kalungisa mimvu ka mimvu.