1 Mu ntama, Nzambi wedi zonzanga ku zinkaka zeto nkumbu zizingi na mu mitindu mimingi mu nzila yi mimbikudi. 2 Kansi mu ntangu beyiyi yi nsukunu, Nzambi wutuzonzila mu Mwana andi mpe mu dyambu dyandi kahidikila nza yimvimba na wumusoola mu byadila fwa dimvimba. 3 Mwana bewowo wuna lonka kulezima ku nkembo yi Nzambi, mpe wudi nkatika kifwani kina lonka Nzambi bonso bu kadi. Yandi simbidi bima bimvimba mu lulendo lu mpova andi. Bu kamana vedisa bantu mu masumu mawu, wuzakala ku mazulu ku kooko ku lubakala lu Nzambi yi lulendo lumvimba.
4 Mwana wuvudila zimbazi kuzangama, mu dyambu ti Nzambi wumuhaana nkumbu yihyokidi mfunu na yi yawu. 5 Mu dyambu ti Nzambi kata ku kani mbazi yimosi ko ti:
«Ngeye Mwana ani wudi,
bubedidi neka Tata aku.»
Mpe kata ku mbazi yimosi ko ti:
«Meno naaba Tata ku yandi,
na yandi waaba Mwana ku meno.»
6 Kansi, mu ntangu Nzambi yikatambika Mwana andi wuntete mu nza, wuta ti:
«Bika zimbazi zimvimba zi Nzambi zifukama ha ntadisi andi.»
7 Ku zimbazi wuta ti:
«Wuna kitula zimbazi zandi bonso mupepe,
wuna kitula bisadi byandi bonso milaka mi tiya.»
8 Kansi mu dyambu di Mwana, wuta ti:
«Oo Nzambi, kyandu ki kintinu kyaku, kidi mimvu ka mimvu.
Mu lunungu wuna yaadila kintinu kyaku.
9 Ngeye kwe tyanga lunungu na kwe belanga misamu mimbi,
Ni hahoho, Oo Nzambi,
Nzambi aku wukubyeka bu kakukusa mafuta ma kyese,
wukusoola ha kati di bakundi baku.»
10 Wuta dyaka ti:
«Mfumu, ngeye wuhidika butoto ku mbadukulu,
mpe mazulu ni kisalu ki moko maku.
11 Bimvimba bebyobyo byaazimbala, kansi ngeye wuna zinga mimvu ka mimvu.
Yulu na butoto byaafwa bonso bu kwe fwilanga kinkutu kinkulu.
12 Mbo wufutika byo bonso bu bakwe futikilanga kiyunga,
mbo wuhinga byo bonso bu bakwe hingisanga binkutu,
kansi ngeye waasanza ko na luzingu lwaku lwaaba na nsukunu ko.»
13 Nzambi kata ku kani mbazi yimosi ko ti:
«Zakala ku lubakala lwani,
natee bu nasa ti mitantu myaku
miba bitentokolo bi bitambi byaku.»
14 Mbazi zi Nzambi mpeve zinaani zidi, zina sadila Nzambi: kwe tambikanga zo mu bakisa yobobo baatambula mpulusu bonso fwa.
/images/a/Tcg2NiV7ce24OT6kCIQGR)
/images/a/-h5KPk8ct3kLpCpYm9-g6)