1 Ni hahoho, tubikeeno ndongosolo yintete yitadidi Klisto, tusoseeno yo yifwanakani ku bantu bakula. Kansi tubwesandi vutukila ndongosolo yintama ko, bonso kuvilula madyela, kubiika nsadulu zifwa, kukwikila mu Nzambi, 2 ndongosolo yitadidi mbotokolo na ntentokolo yi moko, mfulukulu mu bafwa na mfundusu yi mimvu ka mimvu. 3 Bwabobo twaasila tala ti Nzambi heeni luve.

4 Mu dyambu bulendi ba ko ti bantu batambula kya ku Nzambi, babimba munkayulu wu mazulu, mpe baba kintwadi na Mpeve Yilongo, 5 babimba Mambu ma Nzambi mambote na lulendo lu mimvu mina kwiza kuntwala, 6 na babwesa bwa dyaka. Bulendi ba ko ti bakituka dyaka nkumbu yinzole bantu bamoona, bakoma dyaka ha kulunsi Mwana-Nzambi mu dyambu di mvilukulu awu, mpe bamutuka ha meso ma bantu.

7 Tala ti butoto bukwe nokonongo mvula kadi ntangu bumenisi bikunu bii mfunu ku yobobo basedi mfuba, Nzambi bwa kasakumuni. 8 Kansi tala ti butoto bumenisi nsende na mpanga, busidi dyaka mfunu ko, bweka bela-bela na nsingulu, mpe mbo bayoka bo ku tiya.

9 Zimpangi zizola, ni tuzonzila bobo, tukwikidi ti yeno mu nzila yimbote ludi, yo yikwe natanga ku mpulusu. 10 Nzambi wulunungu kadi. Kalendi zimbakana kisalu kyeno na luzolo lu lulonkidi mu nkumbu andi ko, sungula mu mambote ma luhidikidi, mpe ma luna tatamana mu hidika ku bantu bavwihulu ku Nzambi. 11 Kansi tutiidi ti kadi muntu mu yeno katatamana mu lonka vema kubobo natee ku nsukunu, mwanki kivuvu kyeno kilunga. 12 Bwabu lubandi bantu balebakana ko. Kansi, landeeno kifwani ki bantu bana tatamana mu kiminu, mpe bana tambula nsilulu zi basila Nzambi.

13 Nzambi bu kasa nsilulu ku Abalahami, mu nkumbu yi yandi bende kadila ndefi andi, mu dyambu ti kuba na muntu ko wu muvudila bunene, wu kaketi dila ndefi. 14 Wuta ti: «Ndidi ndefi mu kusakumuna bubwingi na mu funisa nkuna aku!» 15 Abalahami wuvibidila na wutambula byo bi musila Nzambi nsilulu. 16 Bantu bu bakwe dyanga ndefi, mu nkumbu yi muntu wu bavudidi bunene bakwe dilanga yo. Ndefi kidimbu kidi kikwe manisanga mpaka. 17 Kansi, Nzambi wutya mu lonka dyaka ku bantu ba kasiila nsilulu ti, nzengolo andi yilendi kituka ko. Ni hahoho, kadila ndefi. 18 Ndefi na nsilulu, bima byole bidi bikwe lembolo kitukanga, mu bima bebibi, nakani Nzambi kalendi huna ko. Ku yeto tuswamini mu yandi, bana tusyamisa bubwingi mu kangama nakekete mu kivuvu Nzambi ki katusila nsilulu. 19 Kivuvu bekyokyo kidi ku yeto bonso kisengo kikwe sikikanga luzingu lweto. Kidi kikangama nakekete, mpe kikwe hambulanga mulele wu nzo-Nzambi yi mazulu natee mu kihinga ki nkatika kilongo. 20 Momo Yesu katutekidila mu kota. Wukota momo mu dyambu dyeto, mpe wuyiza ba Mfumu Nganga-Nzambi yi mimvu ka mimvu mu mulonga wu Melekisedeki.