1 Luwawanu luntete luba na ntumunu ze sambidila Nzambi mpe na nzo yilongo ha butoto. 2 Nzo yi kikapu batunga, yiba na bihinga byole. Kihinga kintete bedi tumisinanga kyo ti: kibuka kilongo. Mu kati muba kitentokolo ki minda, meza na mampa ma bahaana minkayulu ku Nzambi. 3 Ku manima ma mulele wunzole, kuba na kihinga kihiika ki bakwe tumisinanga ti: kibuka kihyokidi kilongo, 4 mu kati muba na kuku di wola di bakwe yokilanga maaka ma mfuku yimbote na nkela yi luwawanu yi balenga wola. Mu kati di nkela, muba na ndonga yi wola yiba na maana, muhangu wu Aloni wuduukisa bifulu na mwa matadi ma basonika Misiku mi luwawanu. 5 Ha yulu nkela, haba na mwa biteki bi bakeluba byedi lonkanga nkembo yi Nzambi, biba na mahahi mayalumuka medi haananga mposi ha yulu kibuka ki bedi haaninanga menga ma minkayulu mu ndemvokolo yi masumu. Kansi ntangu yafweni ko mu zonzila misamu bemyomyo mimvimba.

6 Ni bwabobo bakubikila bima bimvimba. Kadi ntangu zinganga-Nzambi zedi kotanga mu kihinga kintete ki kikapu, mu sala kisalu kyawu. 7 Kansi mfumu nganga-Nzambi kwandi wedi kotanga mu kihinga kinzole ki kihinga yi kikapu nkumbu yimosi kaka mu mumvu. Wedi natanga mu kati menga ma kibulu ma kahaana bonso munkayulu ku Nzambi, mu dyambu di yandi bende na masumu ma mukangu. 8 Mpeve Yilongo wuna lonka ti, nzila yi kibuka kihyokidi kilongo yazibukidi ko, tala ti nzo yintete yi kikapu yakidi. 9 Kyokyokyo kifwani ki misamu mi ntangu beyiyi. Kina lonka ti makabu na minkayulu mi bakwe haananga ku Nzambi, bilendi sa ko ti mayindu maba malunga, ma yondowo kwe sambidilanga mu mutindu bewowo. 10 Ntumunu zi bantu kwandi zidi zitadidi kudya, kunwa na mvedosolo yi nitu yi mumpila-mumpila. Ziba kwandi mu mwa ntangu, nsadulu zi bakwika bantu natee ntangu Nzambi yi kaahinga misamu mimvimba.

11 Kansi, Klisto wuyiza bonso Mfumu Nganga-Nzambi yi bimvwama bidi. Yandi wukota mu nzo yi kikapu yivudidi mfunu na yitoma lunga, yilembolo tunga bantu, mpila mosi ti, yidi yi nza beyiyi ko. 12 Wukota nkumbu yimosi kaka mu kihinga kihyokidi kilongo, ka na menga ma nkombo zimbakala na ma baala ba ngombe ko, kansi na menga ma yandi bende. Ni bwabobo katukuudila ki mankululu mu masumu meto. 13 Menga ma nkombo zimbakala na ma ngombe zimbakala, mpe na bombe bu ngombe yinkento yi bayokidi, bu bedi bye mwakanga mu bantu basumuka, byedi bavedisanga, mpe mu nsadulu beyoyo byedi banatinanga mvedosolo yi nitu zawu. 14 Tala ti bwabobo, menga ma Klisto, yandi wukiyekola yandi bende ku Nzambi mu ngolo zi Mpeve yi mimvu ka mimvu bonso munkayulu wulembolo ba na kyeta, maavedisa mayindu meto mafulukidi mu nsadulu zikwe natanga ku lufwa, mwanki tusambila Nzambi yimoyo.

15 Ni hahoho, Klisto muwawisi kadi wu luwawanu lumoona, mwanki yobobo Nzambi ba katumisa, batambula fwa di mimvu ka mimvu di kabasila nsilulu. Bantu balendi bwe sa mu dyambu di lufwa luyiza. Mu lufwa belolo, bantu babakuula mu misamu mimbi mi bahidika mu luwawanu luntete.

16 Huma haa mukanda wusisidi muntu wufwa, bumbote budi mu lonka ti muntu bewowo wusonikini wo, wukedika ti wufwa kadi. 17 Mukanda wusisidi muntu wufwidi, wuu na mfunu tala ti muntu sonikini wo wufwa. Kansi, wuu na mfunu ko tala ti muntu sonikini wo wuu wumoyo. 18 Ni hahoho, luwawanu luntete lwabende, mu sa lo menga batengola . 19 Mose bu katanga kadi ntumunu ha ntadisi yi mukangu wumvimba bonso budi Misiku, wubonga menga ma baala ba ngombe na ma nkombo zimbakala. Mboki wuvwatisa mo na mamba, mpe wubonga mwa kintala ki muti wuu nkumbu isopi, wukanga ha nsongi yi muti mika mimbwaki. Wuvwanga myo mu menga na wumwaka mo bantu bamvimba na ha yulu buuku di Misiku, 20 na wuta ti: «Mamama ni menga ma luwawanu Nzambi kalutumini mu zitisa.*» 21 Bumosi mpe Mose wumwaka menga mu nzo yi kikapu na mu bima bimvimba bikwe sadulungu mu sambila. 22 Bonso bu Misiku, mu menga bakwe vedisilanga bima bimvimba, kunaani ndemvokolo yi masumu tala ti menga matengokidi ko.

23 Tala ti bifwani bi misamu mikedika bii ku mazulu bya bakwe vedisilanga mu mutindu bewowo, buna bufweti ba ti misamu mikedika mii ku mazulu, mii mivedila mu minkayulu mye yoka mihyokidi mfunu. 24 Mu dyambu ti, Klisto kakota mu kihinga kilongo ki batungila mu moko ma bantu ko, kyokyokyo kiba kwandi kifwani ki kihinga ki makedika. Kansi wukota bwabu ku mazulu ku kadi ha ntadisi yi Nzambi mu dyambu dyeto. 25 Mfumu nganga-Nzambi yi Bayudayo kwe kotanga kadi mumvu mu kihinga kilongo na menga ma kibulu. Kansi, Klisto kakota mu kiyekola yandi bende nkumbu zizingi ko. 26 Tala ti kabobo ko, nganunu wuyena mpasi nkumbu zizingi tuuka ku mbadukulu yi nza! Kansi bwabu, mu ntangu yi nsukunu, wuyenika nkumbu yimosi mu katula masumu mu munkayulu wu yandi bende. 27 Bantu bakwe fwanga nkumbu yimosi kaka. Ku manima, bafundusu ku Nzambi. 28 Bumosi mpe Klisto bamuhaana bonso munkayulu nkumbu yimosi mu katula masumu ma bantu babingi. Waayenika nkumbu yinzole, ka mu katula masumu ko, kansi mu haana mpulusu ku bantu bana mukingila.