1 ኦዱዋ 23

1 ዳዊተ ጭሜዳ ዎደ፥ ባረ ናኣ ሶሎሞና እስራኤልያ ቦላ ካተዬዳ።✝23:1 1 ካታ. 1:1-40

ሌዋቱ ኦሱዋ

2 ዳዊተ እስራኤልያ ካለያዋንታ ኡባቱዋ፥ ቄሳቱ ዋነ ሌዋቱዋ እትፐ ሺሼዳ። 3 ሀታሙ ላይነ ሄዋፐ ቦላና ደእያ ሌዋቱ ፓይደቴድኖ፤ ኡንቱንቱ ኡባና ሀታማነ ሆስፑን ሻአ አቱማ አሳ ግዴድኖ። 4 ሀዋንቱ ግዶፐ መና ጎዳ ጌሻ ጎልያዉ አዎትያ ላታማነ ኦይዱ ሻአቱዋ ካቲ ዎዳ። ቃይ ካፓቱዋነ ፕርዳ የለታቱዋ ኡሱፑን ሻአቱዋ ዎዳ። 5 ፐንግያ ናግያዋንታ ኦይዱ ሻአቱዋ ዎዳ። መና ጎዳ ጋላታናዉ ዳዊተ መዳ የ ሚሻን ጾሳ ጋላትያዋንታ ኦይዱ ሻአቱዋ ዎዳ።

6 ዳዊተ ሌዊ የሌዳ አቱማ ናና ገርሾና፥ ቃሃታነ ማራራ ኡንቱንታ ያራን ያራን ሄዙ ጭታን ሻኬዳ።

7 ገርሾን የሌዳ አቱማ ናናይ ላእዳናነ ሽምአ። 8 ላእዳና አቱማ ናናይ ሄዛ፤ ኡንቱንቱካ ይህኤላ፥ ዘታማነ ዩኤላ። 9 ሽምአ አቱማ ናናይ ሄዛቱ ሻሎሞታ፥ ሀዚኤላነ ሃራና፤ ሀዋንቱ ላእዳና ያራቶ ካፓቱዋ። 10 ሽምአ አቱማ ናናይ ኦይዳቱ፥ ባረንቱ የለታ የለታ ማራን ያሃታ፥ ዚዛ፥ ይኡሻነ ባሪአ። 11 ያሀት ባይራ ዚዝ ቴፋ ሽን ይኡሻዉነ ባሪአስ ናናይ ዳረና፤ ሄዋ ድራዉ፥ ኡንቱንቱ እት ያራዳን ፓይደቴድኖ።

12 ቃሃታ ናናይ ኦይዳቱ አምራማ፥ ይጽሃራ፥ ከብሮናነ ኡዝኤላ። 13 አምራማ አቱማ ናናይ አሮናነ ሙሳ። አሮነነ አ ዘረይ ኡባፐ አ ጌሻ ግዴዳዋ ጾሳዉ ዱማያናዳን ዱማቴድኖ። ኡንቱንቱ መና ጎዳ ስንን እጻና ጩዋያናዉ፥ ጾሳዉ ኦናዉነ ጾሳ ሱንን አሳ አንጃናዉ መናዉ ዱማቴድኖ።✝23:13 ከሳ 28:1 14 ጾሳ አሳ ግድያ ሙሴ ናናይ ሌዊያ ዛራቱዋና ጋ ፓይደቴድኖ። 15 ሙሴ ናናይ ገርሾማነ ኤልኤዛራ። 16 ገርሾማ ናናቱዋ ግዶፐ ካፑ ሻቡኤላ። 17 ኤልኤዛራ ናአይ ራሃብ ካፑዋ። ኤልኤዛራዉ ሀራ ናእ ባዋ፤ ሽን ራሃብያ ናናይ ሎይ ጮራ።

18 ይጽሃራ ናናቱዋ ካፑ ሻሎሚታ። 19 ከብሮነ ናአይ ባይራይ ይሪያ፤ ላኤን አማርያ፤ ሄዘን ያሃዝኤላ፤ ኦይደን ይቃምኣማ። 20 ኡዝኤላ ናአይ ባይራይ ሚክያሳ፤ ላኤን ይሽያ።

21 ማራራ ናናይ ማህላነ ሙሻ። ማህላ ናናይ ኤልኣዛራነ ቂሻ። 22 ኤልኣዛረ ማጫ ናናቱዋፐ አትና፥ አቱማ ናና የለናን ሀይቄዳ። ሄዋ ድራዉ፥ ኡንቱንቱ እሻቱ ቂሻ ናናይ ኡንቱንታ አኬድኖ። 23 ሙሻ ናናይ ሄዛቱ ማህላ፥ ኤዴራነ ይረሞታ።

24 ሌዊያ የለታን ባረንቱ ዛርያንነ ጎለን ባረንቱ ሱንን ማዝጋበቴዳዋንቱ ሀዋንታ፤ ላታሙ ላይነ ሄዋፐ ቦላና ደእያ ሌዊያ ዛራቱ ኡባይ መና ጎዳ ጌሻ ጎልያን ኦድኖ። 25 ዳዊተ፥ "መና ጎዳይ እስራኤልያ ጾሳይ ባረ አሳ ሸምፕሴዳ። ጾሳይ የሩሳላመን መናዉ ደአና። 26 ሄዋ ድራዉ፥ ዱንካንያነ አ ግዶን ጎኤትያ ሚሻቱዋ ሀዋፐ ስንናዉ ሌዋቱ ቶካናዉ ኮሸና" ያጌዳ።✝23:26 ዛረ. 10:8 27 ዳዊተ ዉርሰን አዛዜዳ አዛዙዋዳንካ ላታሙ ላይነ ሄዋፐ ቦላና ደእያ ሌዋቱ ፓይደቴድኖ። 28 ኡንቱንቱ መና ጎዳ ጌሻ ጎልያን ኦያ አሮና ዘረቱዋ ማድኖ። ጾሳ ጌሻ ጎልያን ላኡ ዳባባቱዋን ኦኖ፤ ምይያን ደእያ ክፍለቱዋን፥ ጌሻ ሚሻ ኡባ ቱነናዳንነ ሀራ ኦሱዋ ኡባ ፖሊኖ።✝23:28-32 ፓይ. 3:5-9 29 ቃይ ኡንቱንቱ ጾሳ ስንን ዎያ ኦይዉ፥ ካ ያርሾ፥ ሺሽያ ልያዉ፥ እርሹ ገልቤና ኦይዉነ ዛይትያን ሙናቀትያ ልያዉ አዎቲኖ፤ ኡንቱንቱ ማክያባዉነ ልክያባዉ ኡባዉ አዎቲኖ። 30,31 ቃይ ኡንቱንቱ ኡባ ጋላስ ዎንታነ ኦማርስ፥ መና ጎዳዉ ጹግያ ያርሹ ያርሸትያ ሳምባታ ጋላስ፥ አግናይ ጼርያ ዎደነ ህግያን ጻፈቴዳ ሀራ ባላ ጋላሳቱ ጋክያ ዎደ፥ መና ጎዳ ጋላታናዉነ ቦንቻናዉ ሱንቴድኖ። 32 ጋከትያ ዱንካንያነ መና ጎዳ ጌሻ ሳኣ ናጋናዳንነ አሮና ዘረቱዋፐ ጋርሳና ኡንቱንታ ማዳናዳን መና ጎዳ ጌሻ ጎልያ አዎተይ ሌዋቶ እመቴዳ።