1 ኦዱዋ 5

ሮቤላ የለታ

1 እስራኤልያ ናኣ ባይራ ሮቤላ የለታይ ሀዋፐ ካሊደ ጻፈቴዳዋ። ሮቤል ባይራ ናኣ፤ ሽን ባረ አዉዋ ግሱዋ እ ቱንሴዳ ድራዉ፥ ባይራተዉ በስያባይ እስራኤልያ ናኣ ዮሴፎ ናናዉ እመቴዳ። ሄዋ ድራዉ፥ እ የለታን ባይራ ግዴዳዌ ጻፈትቤና።✝5:1 ዶመ 35:22፤ 49:3-4 2 ይሁዳይ ባረ እሻቱዋፐ ምኔዳ፤ አ ባይራተይ ዮሴፎ እመቴዳዋ ግዶፐነ፥ እስራኤልያ አሳ ሞድያዌ ይሁዳፐ ከሴዳ።✝5:2 ዶመ 49:8-10 3 እስራኤልያ ናኣ ባይራ ሮቤላ አቱማ ናናይ ሀኖካ፥ ፓላ፥ ሄጽሮናነ ካርማ።

4 ዩኤላ ናአይ ሻማእያ፤ ሻማእያ ናአይ ጎጋ፤ ጎጋ ናአይ ሽምአ፤ 5 ሽምአ ናአይ ሚክያሳ፤ ሚክያሳ ናአይ ራኣያ፤ ራኣያ ናአይ ባኣላ። 6 ባኣላ ናአይ አሶረ ካትያ ትግላት-ፓለሴር ኦሞዲደ አፌዳ ባኤራ፤ ባኤር ሮቤላ ዛራቱዋ ካፑዋ።✝5:6 2 ካታ. 15:29 7 ባኤራ ዳቦቱ፥ ባረንቱ የለታ ማዝጎብያን ጻፈቴዳ ሮቤላ ያራቱ ካፓቱ ይእኤላ፥ ዛካራሳነ 8 በላአ። በላእ አዛዛ ናኣ፤ አዛዚ ሸማአ ናኣ፤ ሸማእ ዩኤላ ዛርያ። ዩኤላ ዛራቱ አሮኤራ ካታማን፥ ናቦ ቢታንነ ባኣል-ማኦና ጋድያን ደኤድኖ።

9 ሮቤላ ዛራቱዋ መሂ ጋላኣደን ጮራቴዳ ድራዉ፥ ኡንቱንቱ ያፐ አዋይ ዶልያ ባጋ ቢደ፥ ኤፍራጺሳ ሻፋ ጋካናዉ ምጨቴዳ መላ ቢታን ኡቴድኖ። 10 ሳኦላ ላይን አጋራቱዋ ያራቱዋና ሮቤላ ያራቱ ኦለትና፥ ሮቤላ ያራቱ ጾኔድኖ። ጋላኣደፐ አዋይ ዶልያ ባጋና ደእያ አጋራቱዋ ያራቱ ጋድያን ኡቴድኖ።

ጋደ የለታ

11 ጋደ ዛራቱ ሮቤላ ዛራቱዋፐ ሁጲሳ ባጋን፥ ሳላካ ጋካናዉ ደእያ ባሳነ ጋድያን ኡቴድኖ። 12 ዩኤል ኮይሮ ያራቶ ካፑዋ፤ ሻፋም ላኤን ያራቶ ካፑዋ። ያእናይነ ሻፋጽ ባሳነን ኡቴዳ ያራቶ ካፓቱዋ። 13 ኡንቱንቱ ዳቦቱ፥ ላፑን ያራቱዋ ካፓቱ፥ ምካኤላ፥ ማሹላማ፥ ሳባ፥ ዮራያ፥ ያእካና፥ ዚአነ ኤቤራ። 14 ሀዋንቱ አብሀይላ ናናይ ቡዛ ዘረ። ቡዝ ያህዳ የሌዳ፤ ያህድ የሽሻያ የሌዳ፤ የሽሻይ ምካኤላ የሌዳ፤ ምካኤል ጋላኣደ የሌዳ፤ ጋላኣደ ያሮሀ የሌዳ፤ ያሮህ ሁራ የሌዳ፤ ሁር አብሀይላ የሌዳ። 15 ኡንቱንቱ አዎቱዋ ሶ ካፑ ጉና ናኣ ናኣ አብድኤላ ናኣ አሀ። 16 ኡንቱንቱ ጋላኣደንነ ባሳነን ሄ ቢታቱዋ ካታማቱዋንነ ሳሮና ጋድያን መሂ ሄመትያ ግሹዋን ኡቴድኖ። 17 ሀዋንቱ ኡባ የለታይ ይሁዳ ካትያ ዮኣታማ ዎደነ እስራኤልያ ካትያ እዮርባማ ዎደ የለታ ማዝጎብያን ጻፈቴዳ።

አዋይ ዶልያ ባጋን ኡቴዳ ኦላንቻቱዋ

18 ሮቤላ ዛራቱዋፐ፥ ጋደ ዛራቱዋፐነ ምናሰ ዛራቱዋፐ ባጋቱዋፐ ኦላንቻቱ፥ ዎልቃማቱ፥ ጎንዳልያነ ማሻ ኦይቂያዋንቱ፥ ዎንዳፍያን ዱካን ሎሄዳዋንቱነ ኦላ ሳልፕያ ኤርያዋንቱ ኦይታማነ ኦይዱ ሻአነ ላፑን ጼታነ ኡሱፑን ታማ። 19 ኡንቱንቱ አጋራቱዋ ያራቱዋና፥ ይጹራቱዋና፥ ናፊሻቱዋነ ኖዳባቱዋና ኦለቴድኖ። 20 ኡንቱንቱ ሄ አሳቱዋና ኦለቲደ፥ ጾሳኮ ዋሴዳ ድራዉ፥ ማዱዋ ደሜድኖ። ኡንቱንቱ ጾሳን አማነቴዳ ድራዉ፥ እ ኡንቱንቶ ዎሰቴዳ። ሄዋ ድራዉ፥ አጋራቱዋ ያራቱዋነ ኡንቱንቱና ደእያ ሀራቱ ኡንቱንቱ ኩሽያን ገሌድኖ። 21 ባረንቱ ሞርከቱዋፐ እሻታሙ ሻአ ጋሎቱዋ፥ ላኡ ጼታነ እሻታሙ ሻአ ዶርሳቱዋ፥ ላኡ ሻአ ሀረቱዋነ ጼቱ ሻአ አሳቱዋ ኦሞዲደ አፌድኖ። 22 ኦላይ ጾሳዋ ግዴዳ ድራዉ፥ ዳራቱ ሀይቄድኖ። ጾኔዳዋንቱ ኦሞዱዋ ዎዲ ጋካናስካ ሄ አሳቱዋ ኮሽያን ኡቴድኖ።

አዋይ ዶልያ ባጋን ኡቴዳ ምናሰ ዘረ

23 ምናሰ ዛራቱዋፐ ባካ ያራቱ ባሳነፐ ዶሚደ፥ ባኣል-ሄርሞነ፥ ሳኒራነ ሄርሞነ ደርያ ጋካናዉ ደእያ ሄ ቢታቱዋን ኡቴድኖ፤ ኡንቱንቱ ሄ ግሹዋን ጮራቴድኖ። 24 ኡንቱንቱ አዎቱዋ ሶይ ካፓቱ ኤፌራ፥ ይሽአ፥ ኤልኤላ፥ አዝርኤላ፥ ኤርማሳ፥ ሆዳዊያነ ያህድኤላ። ሀዋንቱ ኡንቱንቱ አዉዋ ጎለን ኤረቴዳ፥ ጻላነ ዎልቃማ አሳቱዋ።

25 ሽን ሀ ዛራቱ ባረንቱ አዎቱዋ ጾሳ ናቀድኖ፤ ጾሳይ ኡንቱንቱ ስንፐ ይሴዳ ሄ ጋድያ አሳቱዋ ጾሳቱዋና ሻርሙጼድኖ። 26 ሄዋ ድራዉ፥ እስራኤልያ ጾሳይ ትግላት-ፓለሴራ ዎይ ፑላ ጌተትያ አሶረ ካትያ አያና ደንዳ። ያቲደ ሮቤላ ዘረ፥ ጋደ ዛራቱዋነ ምናሰ ዛራቱዋፐ ባጋቱዋ ኦሞዲደ፥ ሀላሀ፥ ሀቦራነ ሃራ ቢታቱዋነ ጎዛና ሻፋ አፌዳ። ኡንቱንቱ ሀቼ ጋካናዉ ያን ደኢኖ።✝5:26 2 ካታ. 15:19፣ 29፤ 17:6