1 ኦዱዋ 27

እስራኤልያ አሳ ካለያዋንታ

1 ባረንቱ ጩጉዋን ጩጉዋን ካዉተ አይሴዳ እስራኤልያ ጎልያ አሳቱዋ ካፓቱ፥ ሻኣ ካፓቱነ ጼቱዋ ካፓቱ ሀዋፐ ካሊደ ጻፈቴዳዋንታ። እት እት ጩጉዋን ላታማነ ኦይዱ ሻአ አሳቱ ደኢኖ። እት እት ጩጉ ላይ ግዶን እት እት አግናዉ ካላን ካላን ካዉተ ኪታ ኦናዉ ከሴ።

2 ኮይሮ አግናን ከስያ ጩጉዋ ካለያዌ ዛብድኤላ ናኣ ያሾብኣማ፤ አ ጩጉዋን ላታማነ ኦይዱ ሻአ አሳይ ደኤ። 3 ያሾብኣም ፓሬሳ ዘረ፤ እ ኮይሮ አግናዉ ኦላንቻቱ ካፓቱዋ ጋዳዉዋ።

4 ላኤን አግናን ከስያ ጩጉዋ ካለያዌ አሆህያ ዶዳያ፤ አ ጩጉዋን ላታማነ ኦይዱ ሻአ አሳይ ደኤ። አፐ ካልያዌ ምቅሎታ።

5 ሄዛን አግናን ከስያ ጩጉዋ ካለያዌ ቄስያ ዮዳሄ ናኣ ባናያ፤ አ ጩጉዋን ላታማነ ኦይዱ ሻአ አሳይ ደኤ። 6 ባናይ ሀታሙ ኤረቴዳ አሳቱዋ ግዶን ምኖ አሳ ግዲደ፥ ሀታማቶ ካፖቴዳ። አ ሳኣን አ ናአይ አምዛባድ ካፖቴዳ።

7 ኦይደን አግናን ከስያ ጩጉዋ ካለያዌ ዮኣባ እሻ አሳሄላ፤ አ ጩጉዋን ላታማነ ኦይዱ ሻአ አሳይ ደኤ። አ ኮታን አ ናአይ ዛባደ ካፖቴዳ።

8 እቼሸን አግናን ከስያ ጩጉዋ ካለያዌ ይጽሃራ ያራፐ ሻምሁታ፤ አ ጩጉዋን ላታማነ ኦይዱ ሻአ አሳይ ደኤ።

9 ኡሱፑን አግናን ከስያ ጩጉዋ ካለያዌ ታቆአፐ ዬዳ እቄሻ ናኣ እራ፤ አ ጩጉዋን ላታማነ ኦይዱ ሻአ አሳይ ደኤ።

10 ላፑን አግናን ከስያ ጩጉዋ ካለያዌ ኤፍሬማ ዛርያፐ ፕሎናፐ ዬዳ ሄሌጻ፤ አ ጩጉዋን ላታማነ ኦይዱ ሻአ አሳይ ደኤ።

11 ሆስፑን አግናን ከስያ ጩጉዋ ካለያዌ ሁሻፐ ዬዳ ስባካያ፤ አ ጩጉዋን ላታማነ ኦይዱ ሻአ አሳይ ደኤ። ስባካይ ይሁዳ ዛረነ ዛራሀ ያራ።

12 ኡዱፑን አግናን ከስያ ጩጉዋ ካለያዌ ቢንያማ ዛረ ግዴዳ አናቶትያ አብኤዘራ፤ አ ጩጉዋን ላታማነ ኦይዱ ሻአ አሳይ ደኤ።

13 ታማን አግናን ከስያ ጩጉዋ ካለያዌ ናጾፋፐ ዬዳ፥ ዛራሀ ያራ ግዴዳ ማህራያ፤ አ ጩጉዋን ላታማነ ኦይዱ ሻአ አሳይ ደኤ።

14 ታማነ እተንያ አግናን ከስያ ጩጉዋ ካለያዌ ፕርኣቶናፐ ዬዳ፥ ኤፍሬማ ዛርያ ግዴዳ ባናያ፤ አ ጩጉዋን ላታማነ ኦይዱ ሻአ አሳይ ደኤ።

15 ታማነ ላኤን አግናን ከስያ ጩጉዋ ካለያዌ ናጾፋፐ ዬዳ፥ ኦትንኤላ ያራ ግዴዳ ሄልዳያ፤ አ ጩጉዋን ላታማነ ኦይዱ ሻአ አሳይ ደኤ።

እስራኤልያ ዛራቱዋ አይስያዋንታ

16 እስራኤልያ ዘረ አይሳናዉ ሱንቴዳዋንቱ ሀዋፐ ካሊደ ጻፈቴዳዋንታ።

ሮቤላ ዛርያ አይስያዌ ዚክራ ናኣ ኤልኤዛራ።

ስሞና ዛርያ አይስያዌ ማእካ ናኣ ሻፋጽያ።

17 ሌዊያ ዛርያ አይስያዌ ቃሙኤላ ናኣ ሀሻብያ።

አሮና ዛርያ አይስያዌ ጻዶቃ።

18 ይሁዳ ዛርያ አይስያዌ ዳዊታ እሻ ኤልሀ።

ይሳኮራ ዛርያ አይስያዌ ምካኤላ ናኣ ኦምራ።

19 ዛብሎና ዛርያ አይስያዌ ኦባድያ ናኣ ይሽማእያ።

ንፍታሌማ ዛርያ አይስያዌ አዝርኤላ ናኣ ያርሞታ።

20 ኤፍሬማ ዛርያ አይስያዌ አዛዝያ ናኣ ሆሼአ።

ዮርዳኖሳ ሻፋፐ አዋይ ዉልያ ባጋን ደእያ ምናሰ ዛራቱዋፐ ባጋ አይስያዌ ፓዳያ ናኣ ዩኤላ።

21 ዮርዳኖሳ ሻፋፐ አዋይ ዶልያ ባጋ ጋላኣደን ደእያ ምናሰ ዛራቱዋፐ ባጋ አይስያዌ ዛካራሳ ናኣ እዳ።

ቢንያማ ዛርያ አይስያዌ አባኔራ ናኣ ያእስኤላ።

22 ዳና ዛርያ አይስያዌ ይሮሃማ ናኣ አዛርኤላ።

ሀዋንቱ እስራኤልያ ዘረ አይስያዋንታ።

23 መና ጎዳይ እስራኤልያ አሳ ሳሉዋ ጾልንትያዳን ጮርሳና ጌዳ ድራዉ፥ ዳዊተ ላታሙ ላይነ ላታሙ ላይፐ ጋርሳና ደእያዋንታ ፓይዱዋን ገልስቤና።✝27:23 ዶመ 15:5፤ 22:17፤ 26:4 24 ጻሩይ ናአይ ዮኣበ አሳ ፓይዱዋ ዶሜዳ፤ ሽን ፓይድ ዉርስቤና። አሳ ፓይዴዳ ጋሱዋን ጾሳይ እስራኤልያ አሳ ቦላ ሀንቀቴዳ። ሄዋ ድራዉ፥ ኡንቱንቱ ፓይዱ ካትያ ዳዊታ ታርክያ ማዝጎባን ጻፈትቤና።✝27:24 2 ሳሜላ 24:1-15፤ 1 ኦዱዋ 21:1-14

ካትያ ሚሻን አዎትያዋንታ

25 ካትያ ሚሻ ምንጅያ ሳአዉ አዎትያዌ አዲኤላ ናኣ አዝማዌታ። ጋጻርያን፥ ካታማቱዋንነ ሞቱዋን፥ ዎችያ ሳ ደእያ ሚሻዉ አዎትያዌ ኦዝያና ናኣ ዮናታና። 26 ቢታ ጎሽያ ጎሻንቻቱዋ ቦላ አዎትያዌ ካሉባ ናኣ ኤዝራ። 27 ዎይንያ ቱራ ሳአቶ አዎትያዌ ራማፐ ዬዳ ሽምአ። ዎይንያ ኤሳ ምንጅያ ሳአዉ አዎትያዌ ሻፋማፐ ዬዳ ዛብዳ።

28 አዋይ ዉልያ ባጋ ገዝያን ደእያ ዎጋራዉነ ኡንቱንቶ አዎትያዌ ገዴራፐ ዬዳ ባኣልሀናና። ዛይትያ ምንጅያ ሳአዉ አዎትያዌ ዮኣሻ። 29 ሳሮና ደምባን ሄመትያ ሚዛዉ አዎትያዌ ሳሮንያ ሺጽራያ። ዎምባን ሄመትያ ሚዛዉ አዎትያዌ አድላያ ናኣ ሻፋጻ። 30 ጋሎቶ አዎትያዌ እስማኤልያ ኦቢላ። ሀረቶ አዎትያዌ መሮኖትያ የህዳያ። 31 ዶርሳቶነ ዴሻቶ አዎትያዌ አጋር ዛርያፐ ያዚዛ። ሀዋንቱ ኡባይ ዳዊታ አቁዋ ቦላ አዎቴዳዋንታ።

ዳዊታ ዞርያዋንታ

32 ዳዊታ አዉዋ እሻይ ዮናታን ጻፊ፥ አኬካንቻ አሳነ ካትያ ዞርያ አሳ። ሀክሞና ናአይ ይህኤል ካትያ ናና ናጌ። 33 አክጾፌል ቃይ ካትያ ዞርያዋ። አርክያ ሁሻይ ካቲ ሲቅያ አሳ። 34 አክጾፌል ሀይቂና፥ አ ኮሽያን ባናያ ናአይ ዮዳሄነ አብያታረ ካትያ ዞርያዋንታ፤ ዮኣበ ካትያ ኦላ ጋዳዋ።