ጌሻ ጎልያ ኬጻናዉ እመቴዳ እሞታ
1 ሄዋፐ ጉይያን፥ ካቲ ዳዊተ ሺቄዳ አሳዉ ኡባዉ ሀዋዳን ያጌዳ፤ "ጾሳይ ዶሬዳዌ ታ ናኣ ሶሎሞና፤ እ ያላጋነ ኦሶካ ሜዘትቤና። ሀ ኬጸታና ኬይ አሳ ጎልያ ግደናን መና ጎዳ ጾሳ ጌሻ ጎልያ ግድያ ድራዉ፥ ኪታይ ዎልቃማ።29:1-2 1 ኦዱዋ 22:5 2 ታን ታዉ ደእያ ዎልቃ ኬሻ ታ ጾሳ ጌሻ ጎልያዉ ዎርቃን ኦሰታናባዉ ዎርቃ፥ ብራን ኦሰታናባዉ ብራ፥ ናሃስያን ኦሰታናባዉ ናሃስያ፥ ብራታን ኦሰታናባዉ ብራታነ ምን ኦሰታናባዉ ም ጊግሳ ዎድ። ቃይ ማርግድያ፥ እብናባራድያ፥ ዱማ ዱማ ማላና ደእያ አሌቆ ሹቻቱዋ፥ አልኦ ሹቻቱዋነ እንቆቱዋ ጊግሳ ዎድ። 3 ታ ጾሳ ጌሻ ጎልያ ታን ሎይ ሲቅያ ድራዉ፥ ታን ታ ጾሳ ጌሻ ጎልያዉ ጊግሴዳዋፐ ሀራ ታዉ ቡዞ ደእያ ዎርቃፐነ ብራፐ ጌሻ ጌሻ ጎልያዉ እማድ። 4 ጌሻ ጎልያ ጎዳ ማይዛናዉ ጼቱ ሻአ ኪሎ ግራመ ዴጽያ ጌሻ ዎርቃነ ላኡ ጼታነ ኦይታሙ ሻአ ኪሎ ግራመ ዴጽያ ጌሻ ብራ እማድ። 5 ኩሽያ ሂላቱ ኦና ኦሱዋ ኡባዉ፥ ዎርቃን ኦሰታናባዉ ዎርቃ፥ ብራን ኦሰታናባዉ ብራ፥ እማድ። ያትና፥ ህንተፐ ሀቼ ባረ ሸንያን መና ጎዳዉ ኬኪደ እማናዌ ኦኔ?" ያጌዳ።
6 እስራኤልያ ጎልያ አሳቱዋ ካፓቱ፥ ዛራቱዋ ካፓቱ፥ ሻኣ ካፓቱ፥ ጼቱዋ ካፓቱነ ካትያ ኦሳንቻቱ ካፓቱ ባረንቱ ሸንያን ባረንቶ ደእያዋ እሜድኖ። 7 ኡንቱንቱ ጾሳ ጌሻ ጎልያ ኦሶ እት ጼታነ ላፑን ታሙ ሻአ ኪሎ ግራመ ዴጽያ ዎርቃ፥ ሄዙ ጼታነ ኦይታሙ ሻአ ኪሎ ግራመ ዴጽያ ብራ፥ ኡሱፑን ጼታነ ላታሙ ሻአ ኪሎ ግራመ ዴጽያ ናሃስያ ብራታነ ሄዙ ሚልዮነነ ኦይዱ ጼቱ ሻአ ኪሎ ግራመ ዴጽያ ብራታ እሜድኖ። 8 አልኦ ሹቻይ ደእያ አሳይ ኡባይ ሚሻ ናግያ ሌዊያ ገርሾና ያራ ግድያ ይህኤላ ባጋና መና ጎዳ ጌሻ ጎልያ ሚሻ ምንጅያ ጎለዉ እሜዳ። 9 አሳይ ባረ ሸንያን ባረ ኩመን ዎዛናን መና ጎዳዉ እሜዳ ድራዉ ናሸቴዳ፤ ካቲ ዳዊተካ ሎይ ናሸቴዳ።
ዳዊተ ጾሳ ጋላቴዳ
10 ሄዋ ድራዉ፥ ዳዊተ ሽቁዋ ኡባ ስንን ሀዋዳን ያጊደ፥ መና ጎዳ ጋላቴዳ፤ "አቤት መና ጎዳዉ፥ ኑ አዉዋ እስራኤልያ ጾሳዉ፥ ኔን መናፐ መናዉ ጋላቲታ። 11 አቤት መና ጎዳዉ፥ ሳሉዋንነ ሳኣን ደእያ ኡባባይ ነዋ! ግታተይ፥ ዎልቃይ፥ ቦንቹ፥ ጾኑነ አንጋይ ነዋ! አቤት መና ጎዳዉ፥ ማታይ ነዋ፤ ኔን ኡባፐ ቦላነ ሁጰ።29:11 ማቶሳ 6:13 12 ዱረታይነ ቦንቹ ኔፐ ዬ፤ ኔን ኡባባ ሞዳሳ። ዎልቃይነ ምኖታይ ነ ኩሽያና፤ ኔን አሳ ኡባ ቂሳናዉነ ምንሳናዉ ዳንዳያሳ። 13 ሀእካ ኑ ጾሳዉ፥ ኑን ኔና ጋላቴቶ፤ ነ ቦንቾ ሱንካ ሳቤቶ።
14 "ኑን ሀዋ ኬሻባ እማናዉ ታነ ታ አሳይነ ኦኔ? አያዉ ጎፐ፥ ኡባባይ ኔፐ ዬ፤ ኑን ነ ኩሽያፐ አኬዳዋ ነዉ ዛረ እሜዳ። 15 ካሰ ኑ አዎቱዋ ኡባዳን ኑንካ ነ ስንን በተነ እማ። ሀ ሳኣ ቦላን ኑ ደኡዋ ላይይ ኩዋዳን አያዋ፤ ኑን ሀይቆፐ አታናዉ ዳንዳዮኮ። 16 አቤት መና ጎዳዉ፥ ኑ ጾሳዉ፥ ነ ጌሻ ሱንዉ ኑን ጌሻ ጎልያ ኬጻናዉ ሺሼዳ ኡባይ ነ ኩሽያፐ ዬዳዋ፤ ሀዌ ኡባይ ነባ።
17 "ታ ጾሳዉ፥ ኔን ዎዛና ፓጭያዋነ ሱረተ ዶስያዋ ታን ኤራይ። ታን ታ ዎዛና ሱረተን ታ ሸንያን ሀዋ ኡባ እማድ። ሀ ሳኣን ደእያ ነ አሳይካ ነዉ ባረ ሸንያን ናሸቻን እሜዳዌ ታን በኣድ። 18 አቤት መና ጎዳዉ፥ ኑ ማይዛ አዎቱዋ አብራሃማ፥ ይሳቃነ እስራኤልያ ጾሳዉ፥ ነ አሳ ዎዛናን ሀ ዎልቃማ ሲቁዋ መናዉ ናጋ፤ ኡንቱንቱ ዎዛናካ ኔኮ ሺሻ። 19 ነ ዎጋ፥ ነ አዛዙዋነ ነ ህግያ ናጋናዳንነ ታን ሀልቻደ ጊግሳ ዎዳባን ጌሻ ጎልያ እ ኬጻናዳን ታ ናኣ ሶሎሞናዉ ኩመን ዎዛና እማ" ያጊደ ጋላቴዳ።
20 ሄዋፐ ጉይያን፥ ዳዊተ ያአዉ ኡባዉ፥ "መና ጎዳ ህንተንቱ ጾሳ ጋላትተ" ያጌዳ። ያአይ ኡባይ መና ጎዳ ባረንቱ አዎቱዋ ጾሳ ጋላቴድኖ። መና ጎዳዉ ጉፋኒደ ጎይኔድኖነ ካትያዉካ ኩንዳ ጊደ ጉፋኔድኖ።
ሶሎሞና ካተቱሳ
(29:21-25)
21 ዎንተ ጋላስ አሳይ መና ጎዳዉ ያርሹዋ ያርሼዳ። ቃይ ጹግያ ያርሹዋካ ጾሳዉ ያርሼዳ፤ እት ሻአ ኮሩማቱዋ፥ እት ሻአ ዶርሳ ኦርገቱዋ፥ እት ሻአ ዶርሳ ማራቱዋ፥ ኡሻ ያርሹዋነ ዳሮ ያርሾቱዋ ያርሼዳ። 22 አሳይ ሄ ጋላስ መና ጎዳ ስንን ሎይ ናሸትደ፥ ሜዳነ ኡሼዳነ። ያቲደ አሳይ ካትያ ዳዊታ ናኣ ሶሎሞና ላኤንዋ ዛይትያ ኦኪደ፥ አ ካዉተን ምንሴዳ። ጻዶቃካ ቄሰ ግዳናዳን መና ጎዳ ስንን ኦኬዳ።
23 ሄዋፐ ጉይያን፥ ሶሎሞነ ባረ አዉዋ ዳዊታ ኮሽያን መና ጎዳ ካዉተ አራታን ኡቴዳ። አዉ ኡባባይ ሀኔዳ፤ እስራኤልያ ኡባይካ አዉ አዛዘቴዳ።29:23 1 ካታ. 2:12 24 ካፓቱ ኡባይ፥ ምኖ አሳቱነ ካትያ ዳዊታ ናናይ ካትያ ሶሎሞናዉ አዛዘታናዉ ቃላ ገሌድኖ። 25 መና ጎዳይ ሶሎሞና እስራኤልያ አሳ ኡባ ስንን ቁ ቁ ኦዳ፤ አፐ ካሰ እስራኤልያ ካተቶ እመትቤና ቦንቹዋ ሶሎሞናዉ እሜዳ።
ዳዊታ ሀይቁዋ
(29:26-30)
26 እሰያ ናአይ ዳዊተ እስራኤልያ ኡባ ቦላ ካተቴዳ። 27 ዳዊተ እስራኤልያ ቦላ ኦይታሙ ላይ ካተቴዳ፤ ከብሮናን እ ላፑን ላይ ካተቴዳ፤ የሩሳላመን ሀታማነ ሄዙ ላይ ካተቴዳ።29:27 2 ሳሜላ 5:4-5፤ 1 ኦዱዋ 3:4 28 ዳዊተ ዳሮ ላይ ደኢደ፥ ዱረቲደ፥ ቦንቼቲደ፥ ሎኦ ጭሚደ ሀይቄዳ። አ ኮታን አ ናአይ ሶሎሞነ ካተቴዳ። 29 ዳዊተ ኮይሮፐ ዶሚደ ዉርሰ ጋካናዉ ኦዳባይ፥ ትምቢትያ ኦድያ ሳመላ ታርክያ ማጻፋን፥ ትምቢትያ ኦድያ ናታና ታርክያ ማጻፋንነ ትምቢትያ ኦድያ ጋደ ታርክያ ማጻፋን ጻፈት ኡቴዳ። 30 እ ዎት ሞዴደንቶነ እ ዋኔዳ ዎልቃማ አሳኮ፥ እ ሀኔዳባይ፥ እስራኤልያ አሳይነ ሄራን ደእያ ካዉተቱ ኡባይ ሀኔዳባይ ሄ ማጻፋቱዋን ጻፈት ኡቴዳ።