Apocalipse 11

ላኡ ማርካቱዋ

1 ሄዋፐ ጉየ፥ ማቃ ማላትያ ልክያ ጻምአይ ታዉ እመቴዳ፤ ታና ጌዳዌ ሀዋ፤ "ባደ ጾሳ ጌሻ ጎልያነ ያርሽያ ሳ ልካ። ሄዋን ጎይንያዋንታካ ፓይዳ።✝11:1 ህዝ. 40:3፤ ዛካ. 2:1-2 2 ሽን ጌሻ ጎለዉ ካረ ባጋ አጋ ባሻ፤ ሄዋ ልኮፓ። አያዉ ጎፐ፥ ሄ ሳአይ አይሁዳ ግደና አሳዉ እመቴዳ። አይሁዳ ግደና አሳይ ጌሻ ካታማ ኦይታማነ ላኡ አገናዉ የና።✝11:2 ሉቃሳ 21:24 3 ታን ጋብያ ማዬዳ ታ ላኡ ማርካቱዋ ኪታና፤ ኡንቱንቱ እት ሻአነ ላኡ ጼታነ ኡሱፑን ታሙ ጋላሳን ጾሳ ኪታ ኦዳና" ያጌዳ።

4 ሄ ላኡ ማርካቱ ሀ ሳኣ ጎዳ ስንን ኤቂያ ጾምፕያ ዎያ ላኡ ባላቱዋ።✝11:4 ዛካ. 4:3፣ 11-14 5 ኦንነ ኡንቱንታ ቆሀናዉ ኮዮፐ፥ ኡንቱንቱ ዶናፐ ታማይ ከሲደ ኡንቱንቱ ሞርከቱዋካ ይሴ። ቃይ ኦንነ ኡንቱንታ ቆሀናዉ ኮዮፐ፥ ሄዋዳንካ ሀይቃና። 6 ኡንቱንቱ ጾሳ ኪታ ኦድያ ዎድያን እራይ ቡከናዳን፥ ሳሉዋ ጎርዳናዉ ኡንቱንቶ ማታይ ደኤ። ኡንቱንቶ ሃ ሱ ከስያ ማታይካ ደኤ፤ ቃይ ኡንቱንቱ ባረና ኮሽያ ዎደ፥ ሳኣ ዱማ ዱማ ቦሻን ሾጫናዉ ኡንቱንቶ ማታይ ደኤ።✝11:6 1 ካታ. 17:1፤ ከሳ 7:17-19፤ 1 ሳሜላ 4:8

7 ኡንቱንቱ ባረንቱ ማርካተ ዉርሴዳዋፐ ጉይያን፥ ጪሞ ኦላፐ ፑደ ከስያ ዶአይ ኡንቱንቱና ኦለታና። ሄ ዶአይ ኡንቱንታ ጾኒደ ዎና።✝11:7 ዳኔላ 7:7፣ 21፤ ሳፃ 13:5-7፤ 17:8 8 ኡንቱንቱ ጎዳይ ማስቃልያ ቦላን ምስማርያን ሸቲደ ሱለቴዳ ካታማ ዎጋ ኦግያን ኡንቱንቱ አሃይ ግሳናዋ። ሄ ካታማይ ሌምሱዋን ሶዶማ ዎይ ግብጼ ጌተቲደ ጼሰቴ።✝11:8 ኢሳ. 1:9-10 9 ቃይ ያራ ኡባፐ፥ ቆሙዋ ኡባፐ፥ ዱማ ዱማ ቢታ ቃላፐነ ዛርያ ኡባፐ ዬዳ አሳይ ኡንቱንቱ አሃ ሄዙ ጋላሳነ ባጋ በአና። አሃይ ሞገተና ማላ፥ ሄ አሳይ ድጋና። 10 ሳኣን ደእያ አሳይ ሀ ትምቢትያ ኦድያ ላኡ አሳቱዋ ሀይቁዋን ናሸታና። አሳይ ኡንቱንቱ ሀይቁዋ እቱ እቱዋና እሞታ ላመቲደ ቦንቻናዋ፤ አያዉ ጎፐ፥ ሳኣን ደእያ አሳ ኡንቱንቱ ዳርስ መቶድኖ።

11 ሄዙ ጋላሳነ ባጋፐ ጉይያን፥ ደኡዋ ሸምፑዋ ጾሳይ ኡንቱንቱን ሸምፕና፥ ኡንቱንቱ ደንድ ኤቄድኖ። ኡንቱንታ በኤዳ ኡባይ ኢታ ያሻ ያዬዳ።✝11:11 ህዝ. 37:10 12 ሄዋፐ ጉይያን፥ ሄ ትምቢትያ ኦድያ ላኡ አሳቱ ሳሉዋፐ፥ "ሃ ፑደ ከስተ" ግያ ዎልቃማ ኮሻ ስሴድኖ። ባረንቱ ሞርከቱ ባረንታ ጼልሽን፥ ኡንቱንቱ ሻርያን ገሊደ፥ ፑደ ሳሉዋ ቤድኖ።✝11:12 2 ካታ. 2:11

13 ሄ ሳትያን ቢታይ ሎይ ቃጽና ካታማፐ ታሙን ኩሺ ዬዳ። ቃይ ቢታ ቃን ላፑ ሻአ አሳይ ሀይቄዳ። አቴዳ አሳይ ሎይ ኮኮር ያዪደ፥ ሳሉዋ ጾሳ ግታተ ሳቤዳ።

14 ላኤን አዬሮ ግያዌ አዳ። ሽን አኬክተ፤ ሄዘን አዬሮ ግያዌ ኤለካ ያናዋ።

ላፑን ማላካታ

15 ሄዋፐ ጉይያን፥ ላፑን ኪታንቻይካ ባረ ማላካታ ፑኔዳ። ሳሉዋን፥

"አላምያ ካዉተይ

ሀእ ኑ ጎዳሳነ

ክርስቶሳሳ፤

ቃይ መናፐ መና ጋካናዉ

እ ሞዳና"

ያግያ ዎልቃማ ኮሻይ ስሰቴዳ።✝11:15 ከሳ 15:18፤ ዳኔላ 2:44፤ 7:14፣ 27

16 ባረንቱ ኦይድያን ኡቴዳ ላታማነ ኦይዱ ጭማቱ ጾሳ ስንን ዱገ ጉፋኒደ፥ ጾሳዉ ጎይኒደ ሀዋዳን ያጌድኖ፤

17 "ሀእ ደእያዎ፥

ካሰፐካ ደእያዎ፥ ጎዳዉ፥

ኡባፐ ዎልቃማ ጾሳዉ፥

ነዉ ዎልቃማ ዎልቃይ ደእያ ድራዉነ፥

ኔን ሞዳናዉ ዶሜዳ ድራዉ፥

ኑን ኔና ጋላቴቶ።

18 አይሁዳ ግደና አሳይ ሀንቀቴዳ፤

ነ ሀንቁካ ዬዳ።

ሀይቄዳዋንቱ ፕርደትያ ዎዲ ሀአ፤

ቃይ ኔን ነ ኦሳንቻቶ፥ ናባቶ፥

ጌሻቶ፥ ነ ሱንዉ ያይያዋንቶ፥

ቃቶነ ላፋቶ ኡንቱንቱ ኦሱዋዳን፥

እምያ ዎዲካ ሀአ።

ሳኣ ይስያዋንታካ ኔን ይስያ ዎዲ ሀአ"

ያጌድኖ።✝11:18 ማዝ. 2:5፤ 110:5፤ 115:13

19 ሳሉዋን ደእያ ጾሳ ጌሻ ጎሊ ዶየቴዳ፤ አ ጌሻ ጎልያን ጾሳ ቃላ ጫቁዋ ታቦታይ ቤቴዳ። ቃይ ዋልቃንይ ዎልቃሜዳ፤ ጉንይ ስሰቴዳ፤ ጉጉንይ ጉሜዳ፤ ቢታይ ቃጼዳ፤ ዎልቃማ ሻቻይካ ሻጬዳ።