ታን ምሽራቶ፥ ናኣነ ዳዊያ በኣድ
1 ሄዋፐ ጉይያን፥ ሳሉዋን ዎልቃማ ማላይ ቤቴዳ። አዋ ማዬዳ እት ምሽራታ፥ አገና ቦላ ኤቄዳዉና፥ ታማነ ላኡ ጾልንትያ ካላቻ ባረ ሁጲያን ዎዳዉና ሄዋን ደአዉ። 2 ሄ ምሽራታ ሻሃራ፤ እዞ የሉዋ ኦይይ፥ ኡንኤና ዋሳዱ።
3 ሀራ እት ዎልቃማ ማላይ ሳሉዋን ቤቴዳ። ታሙ ካጭያና ደእያ ላፑ ሁጲያን ካላቻ ዎዳ እት ዎልቃማ ዞኦ ዳዊ ደኤ።12:3 ዳኔላ 7:7 4 ሄ ዳዊ ባረ ዱፍያን ሄዘን ኩሸ ጾልንትያ ሳሉዋፐ ዳፊደ፥ ሳኣን ኦሌዳ። ሄ ዳዊ የለት ዎሳናካ ናኣ ማናዉ የላና ሀንያ ምሽራት ስንን ኤቄዳ።12:4 ዳኔላ 8:10
5 ምሽራታ አቱማ ናኣ፥ አይሁዳ ግደና አሳ ኡባ ብራታ ጻምኣን ሞዳናዋ የላዱ። ሽን ናአይ ጾሳኮነ አ አራታኮ፥ ፑደ ኤለካ አከቴዳ።12:5 ኢሳ. 66:7፤ ማዝ. 2:9 6 ምሽራታ እት ሻአነ ላኡ ጼታነ ኡሱፑን ታሙ ጋላሳዉ ምዚደነ ኡሺደ ዎናዉ ጾሳይ ጊግስ ዎዳ ሳኣ ባዙዋ ባቃታዱ።
7 ሄዋፐ ጉይያን፥ ሳሉዋን ኦላይ ደንዴዳ። ምካኤል ባረ ኪታንቻቱዋና እትፐ ዳዊያ ኦለቴዳ፤ ዳዊካ ባረ ኪታንቻቱዋና ግዲደ፥ ዛር ኦለቴዳ።12:7 ዳኔላ 10:13፣ 21፤ 12:1፤ ዳኔላ 9 8 ሽን ዳዊ ጾነትና ዳዊያስነ አ ኪታንቻቶ ሳሉዋን ሳአይ ዬዳ። 9 ዎልቃማ ዳዊ፥ ጻላህያ ካፑዋ ዎይ ሴጻና ግያዌ፥ በን ሾሻይ፥ አላምያ ኡባ ባለያዌ ኦለቴዳ፤ እ ባረ ኪታንቻቱዋና እትፐ ዱገ ሳአዉ ኦለቴዳ።
10 ሄዋፐ ጉይያን፥ ታን ሳሉዋፐ ሀዋዳን ያግያ ኮሻ ስሳድ፤
"ጾሳ አቶተይ ሀእ ዬዳ።
ጾሳይ ባረዉ ካተ ግድያዋዳንካ፥
ባረ ዎልቃ በሴዳ፤
አ ክርስቶስ ባረ ማታ በሴዳ።
አያዉ ጎፐ፥
ቃማነ ጋላስ ጾሳ ስንን ኤቂደ፥
ኑ እሻቱዋ ሞትያዌ፥
ሳሉዋፐ ዱገ ኦለቴዳ።12:10 ኢዮባ 1:9-11፤ ዛካ. 3:1
11 ኑ እሻቱ ዶርሳ ሱንነ፥
ባረንቱ ቱሙ ማርካተን
ዳዊያ ኦለቲደ ጾኔድኖ።
ቃይ ኡንቱንቱ ባረንቱ ሸምፑዋ አ እምያዎ፥
ቃረትበይክኖ።
12 ሄዋ ድራዉ፥
ሳሉነ ሳሉዋ ግዶን ደእያዋንቱ፥
ናሸትተ።
ሽን ሳአዉነ አባዉ አዬሮ!
አያዉ ጎፐ፥
ጻላህያ ካፑ፥
ባረዉ ጉ ዎዲ አቴዳዋ ኤርያ ድራዉ፥
ዎልቃማ ሀንቁዋን፥
ዱገ ህንተንቱኮ ዎዳ"
ያጌዳ።
13 ቃይ ዳዊ ባረና ዱገ ሳኣ ኦሌዳዋ በኤዳዋፐ ጉይያን፥ ሄ አቱማ ናኣ የሌዳ ምሽራቶ የደርሱዋ ዶሜዳ። 14 ምሽራቶ ሾሻይ ቆሄና ማላ፥ ሄዙ ላይነ ባጋ ማደነ ኡሻደ እዛ ናገትያሳ ባዙዋ ፓላደ ባና ማላ፥ ላኡ ዎልቃማ አርጋን ቀፊ እዝዉ እመቴዳ።12:14 ዳኔላ 7:25፤ 12:7
15 ሄዋፐ ጉይያን፥ ምሽራቶ ድኡ ድኢደ አፋና ማላ፥ ሾሻይ ሻፋ ሃ ኬና ሃ ባረ ዶናፐ ምሽራት ጌዱዋን ጉሴዳ። 16 ሽን ቢታይ ምሽራቶ ማዴዳ፤ ቢታይ ባረ ዶና ዶዪደ፥ ዳዊያ ዶናፐ ከሴዳ ሃ ምት አጌዳ። 17 ዳዊ ምሽራትዉ ዳርስ ሀንቀቲደ፥ እዝ ዘረ ጾሳ አዛዙዋ ናግያ ኡባቱዋነ የሱስ ቆንጭሴዳ ቱሙ አማነትያዋንታ ኦላናዉ፥ 18 ቢደ አባ ዶናን ደእያ ሻፍያን ኤቄዳ።