ታን አባፐ ከስያ ላኡ ዶአቱዋ በኣድ
1 ሄዋፐ ጉይያን፥ እት ዶአይ አባፐ ከስሽን፥ ታን በኣድ። አዉ ታሙ ካጪነ ላፑ ሁጲ ደኤ፤ አ ታሙ ካጭያ ቦላን ታሙ ካላቻይ ደኤ። አ ሁጲያንካ ቦርያ ሱንይ ጻፈት ኡቴዳ።13:1 ዳኔላ 7:3፤ ሳፃ 17:3፣ 7-12 2 ታን በኤዳ ዶአይ ማህያ ማላቴ፤ አ ገዲ ባባን ጌተትያ ኢታ ዱኣ ገድያ ማላቴ፤ አ ዶናይ ጋሙዋ ዶና ማላቴ። ዳዊ ባረ ዎልቃ፥ ባረ ካዉተ ኦይድያነ ባረ ዎልቃማ ማታ ሄ ዶአዉ እሜዳ።13:2 ዳኔላ 7:4-6
3 ሄ ዶኣ ሁጰቱዋፐ እቱ ሀይቄዳዋ ማላትያዋ ታን በኣድ፤ ሽን ዎያ ማይይ ፓጼዳ። ሳኣ አሳይ ኡባይ ማላለቲደ፥ ሄ ዱኣ ጌዱዋ ካሌዳ። 4 ዳዊ ባረ ማታ ዶአዉ እሜዳ ድራዉ፥ አሳይ ኡባይ ዳዊያዉ ጎይኔዳ። ቃይ ሄ አሳይ፥ "ዶኣ ማላይ ኦኔ? አናና ኦለታናዉ ኦን ዳንዳዪ?" ያጊደ፥ ዶአዉ ጎይኔዳ።
5 ሄ ዶአዉ ፓላ የዉዋነ ቦርያ ሃሳይያ ዶናይ እመቴዳ። ኦይታማነ ላኡ አገናዉ ኦና ማላ፥ አዉ ማታይ እመቴዳ።13:5-6 ዳኔላ 7:8፣ 25፤ 11:36 6 ሄ ዶአይ ጾሳ፥ አ ሱን፥ እ ደኢያሳነ ሳሉዋን ደእያ ኡባቱዋ ቦርያ ዶሜዳ። 7 ሄ ዶአይ ጾሳ አሳቱዋና ኦለቲደ፥ ኡንቱንታ ጾናና ማላ፥ አዉ ማታይ እመቴዳ። ቆሙዋ ኡባ፥ ያራ ኡባ፥ ዱማ ዱማ ቢታ ቃላ ኡባነ ዛርያ ኡባ ሞድያ ማታይ አዉ እመቴዳ።13:7 ዳኔላ 7:21 8 ሳአይ መታናፐ ካሰ ሹከቴዳ ዶርሳ ደኡዋ ማጻፋን ሱንይ ጻፈትቤና አሳይ፥ ሳኣን ደእያዌ ኡባይ፥ ሄ ዶአዉ ጎይናና።13:8 ማዝ. 69:28
9 ስስያ ሀይይ ደእያ ኡራይ ስሶ።
10 ኦሞደታና አሳይ ደኦፐ፥
ኦንነ ኦሞደታናዋ።
ማሻን ሹከታና አሳይ ደኦፐ፥
ኦንነ ማሻን ሹከታናዋ።
ጌሻቱዋ ዳንዳያይነ፥
አማኑ ሀዋን ኤረታናዋ።13:10 ኤር. 15:2፤ 43:11
ታን ሳኣፐ ከስያ ዶኣ በኣድ
11 ሄዋፐ ጉይያን፥ ሀራ ዶአይ ሳኣፐ ከስያዋ ታን በኣድ። ዶርሳ ካጭያ ማላትያ ላኡ ካጪ አዉ ደኤ፤ ሽን ሄ ዶአይ ዳዊያዳን ሃሳዬዳ። 12 ሄ ዶአይ ኮይሮ ዶኣ ዎልቃማ ማታ ኡባ አ ስንን ኦዳ። ሳአይነ ሳኣን ደእያ አሳይ ኡባይ አ ዎያ ማይይ ፓጼዳ ኮይሮ ዶአዉ ጎይናና ማላ፥ ሄ ዶአይ ጎዳቴዳ። 13 ሄ ላኤን ዶአይ ዎልቃማ ማላታቱዋ ኦዳ፤ ሀራይ አቶ ታማ ሳሉዋፐ አሳ ኡባ ስን ሳኣ ዎና ጋካናዉ ማላታቱዋ ኦዳ። 14 ኮይሮ ዶኣ ስንን ኦናዉ፥ አዉ እመቴዳ ማላታቱዋን ሳኣን ደእያ አሳ ኡባ እ ባለዳ። ማሻን ማይቶፐነ ፓጻ ደእያ ኮይሮ ዶኣ ቦንቾ ምስልያ ጊግሳናዳን፥ ሳኣ አሳ ኡባዉ ላኤን ዶአይ ኦዴዳ። 15 ቃይ ኮይሮ ዶኣ ምስሊ ሃሳያናዳንነ ባረዉ ጎይነና ኡባ ዎናዳን፥ ላኤን ዶአይ ባረ ሸምፑዋ ኮይሮ ዶኣ ምስልያን ሸምፑዋ ገልሳናዉ አዛዘቴዳ።
16 አሳይ ኡባይ ዎጋይነ ቄራይ፥ ማንቁነ ዱሪ፥ ዎማኑነ አይሊ ባረ ኡሸቻ ኩሽያን ዎይ ባረ ዴሙዋን ማላ ዎናዳን፥ ሄ ላኤን ዶአይ ጎዳቴዳ። 17 ሄ ዶኣ ሱንይ ዎይ አ ሱን ፓይዱ ደእያ ማላይ ባይና አሳይ ኦንነ ዛልአናዉነ ሻማናዉ ዳንዳየና።
18 አዳ ኤራተይ ሀዋን ደኤ። ኤራይ ደእያ ኦንነ ሄ ዶኣ ፓይዱዋ ብለ ኤሮ፤ አያዉ ጎፐ፥ ሄ ፓይዱ እት አሳ ሱን። አ ፓይዱ ኡሱፑን ጼታነ ኡሱፑን ታማነ ኡሱፑና።