ታን ዶርሳነ 144,000 አሳቱዋ በኣድ
1 ሄዋፐ ጉይያን፥ ታን በኣድ። በእተ፥ ዶርሳይ ጽዮነ ደርያ ቦላ ኤቄዳ። አ ሱንይነ አ አቡ ሱንይ ዴሙዋን ጻፈቴዳ፥ እት ጼታነ ኦይታማነ ኦይዱ ሻአ አሳቱ አናና እትፐ ደኢኖ።14:1 ህዝ. 9:4፤ ሳፃ 7:3 2 ሳሉዋፐ ኩን ሃ ጉንነ ዳዳ ጉን ማላትያ ዎልቃማ ኮሻ ታን ስሳድ። ቃይ ታን ስሴዳ ኮሻይ ዲ ዲጽያዋንቱ ባረንቱ ዲ ዲጽና ስሰትያ ኮሻ ማላቴ። 3 እት ጼታነ ኦይታማነ ኦይዱ ሻአ አሳቱ ካዉተ ኦይድያ ስንን፥ ኦይዱ ፓጻ ደእያ መታቱዋ ስንንነ ጭማቱዋ ስንን ኤቄድኖ። ሳኣፐ ዎዘቴዳ ኡንቱንቱፐ አትን፥ ሀራይ ኦንነ ታማራናዉ ዳንዳየና ኦራ ማዝሙርያ የጼድኖ። 4 ሀዋንቱ ጌሻ አሳቱዋ ግድያ ድራዉ፥ ማጫዋንቱና ጋከቲደ ባረና ቱንስበይክኖ። ዶርሳይ14:4 ዶርሳ፦ የሱሳዉ እመቴዳ ሱን። ብያሳ ኡባ ኡንቱንቱ ካሊኖ። ኡንቱንቱ ጾሳዉነ ዶርሳዉ ባይራ ግዳናዉ፥ ሳኣ አሳ ግዶፐ ዎዘቴዳዋንታ። 5 ኡንቱንቱ ኡባካ ዎርዶት ኤርክኖ፤ ኡንቱንቱን ባይዙ ባዋ።14:5 ሶፎ. 3:13
ታን ጾሳ ኪታንቻ በኣድ
6 ሳኣን ደእያ አሳ ኡባዉ፥ ዛርያ ኡባዉ፥ ቆሙዋ ኡባዉ፥ ዱማ ዱማ ቢታ ቃላ ኡባዉነ ያራ ኡባዉ መና ዎንጋላ ምሽራቹዋ አዋያናዉ፥ ቦላ ሳሉዋን ፓልያ ሀራ ኪታንቻ ታን በኣድ። 7 ሄ ኪታንቻይ ባረ ቃላ ቁ ኦደ፥ "ጾሳዉ ያይተ፤ አ ቦንችተ። አያዉ ጎፐ፥ ሳኣ አሳ እ ፕርድያ ሳቲ ጋኬዳ። ሳሉዋ፥ ሳኣ፥ አባነ ሃ ፑልቱዋ መዳ ጾሳዉ ጎይንተ" ያጌዳ።
8 ሀራ ላኤን ኪታንቻይ፥ "ዎልቃማ ባብሎና ኩንዳዱ፤ እዛ ኩንዴዳ ጋሱነካ አሳ ዛርያ ኡባ ኢታ ኦሱዋ ኦስስያ ድራሳ" ያጊደ፥ ኮይሮ ኪታንቻ ካሌዳ።14:8 ኢሳ. 21:9፤ ኤር. 51:8፤ ሳፃ 18:2
9 ሄዘን ኪታንቻይ ባረ ኮሻ ቁ ኦደ፥ ሀዋዳን ያጊደ፥ ኮይሮ ላኡ ኪታንቻቱዋ ካሌዳ፤ "ዶአዉነ አ ምስለዉ ጎይንያ ኦንነ ቃይ አ ማላ ባረ ዴሙዋን ዎይ ባረ ኩሽያን ዎያ ኦንነ ደኦፐ፥ 10 ጾሳይ ባረ ዎልቃማ ሀንቁዋ ቡርጩኩዋን ኩንዳ ሀንቁዋ ዎይንያ ኤሳ እ ኡሻና። ሄዋ ኦዳ ኡባይ ጌሻ ኪታንቻቱዋ ስንንነ ዶርሳ ስንን፥ ታማንነ ኤጽያ ዲንያን ፓጻ ካኤታና።14:10 ኢሳ. 51:17፤ ዶመ 19:24፤ ህዝ. 38:22 11 ኡንቱንታ ፓጻ ካእያ ታማ ጩዋይ መ መናዉ ጩዋታና። ዶአዉነ ሄ ዶኣ ምስለዉ ጎይንያ ኦስነ ቃይ ሄ ዶኣ ሱን ማላታና ደእያ ኦስነ ቃማነ ጋላስ ሸምፑ ባዋ" ያጌዳ።14:11 ኢሳ. 34:10
12 ጾሳዉ አዛዘትያነ የሱሳዉ አማነትያ ጌሻቱ ዳንዳይያ ዳንዳያይ ሀዋና።
13 ሄዋፐ ጉይያን ሳሉዋፐ፥ "ሀዋ ጻፋ፤ ሀዋፐ ስንዉ ጎዳን ሀይቂያዋንቱ አንጀቴዳዋንታ" ያግያ ኮሻ ታን ስሳድ።
አያናይ፥ "ቱማ፤ ኡንቱንቱ ባረንቱ ዳቡራፐ ሸምፓና፤ አያዉ ጎፐ፥ ኡንቱንቱ ሎኦ ኪታዉ፥ ጾሳይ ሎኡዋን ዛራና" ያጌ።
ታን ቆይቻ ዎድያ በኣድ
14 ቃይካ ታን በኣድ። በእተ፥ ቦ ሻሪ ደኤ። ሻርያ ቦላን አሳ ናኣ ማላትያዌ ኡቴዳ፤ አ ሁጲያን ዎርቃ ካላቻይ፥ ቃይ አ ኩሽያን ቃራ ባጫይ ደኤ።14:14 ዳኔላ 7:13 15 ሀራ ኪታንቻይ ጌሻ ጎልያፐ ከሲደ፥ ሻርያ ቦላን ኡቴዳዎ ባረ ቃላ ቁ ኦደ፥ "ቆይቻ ሳቲ ጋኬዳ ድራዉ፥ ነ ባጫ የዳደ ካ ቆይጫ፤ አያዉ ጎፐ፥ ሳኣ ካይ መሌዳ" ያጌዳ።14:15 ኢዩ. 3:13 16 ሻርያ ቦላን ኡቴዳዌ፥ ባረ ባጫ ሳኣ የዲደ፥ ሳኣ ካ ጫኬዳ።
17 ቃይካ ሳሉዋን ደእያ ጌሻ ጎልያፐ ሀራ ኪታንቻይ ከሴዳ፤ አዉካ ኩሳ ባጫይ ደኤ።
18 ታማዉ ካፖ ግዴዳ ሀራ ኪታንቻይ ያርሽያ ሳፐ ከሲደ፥ ኩሳ ባጫይ ደእያ ኪታንቻዉ ባረ ቃላ ቁ ኦደ፥ "ዎይንያ አይፊ ቴሬዳ ድራዉ፥ ነ ኩሳ ባጫ የዳደ፥ ሳኣን ደእያ ዎይንያ ቱራፐ ሆንዶዳ አይፍያ ቃንጻ!" ያጌዳ። 19 ሄ ኪታንቻይ ባረ ባጫ ሳኣ የዲደ፥ ሳኣን ደእያ ዎይንያፐ ሆንዶዳ አይፍያ ቃንጼዳ፤ ጾሳ ዎልቃማ ሀንቁዋ ሄ ዎይንያ ጉምእያ ኦላን የጌዳ። 20 ካታማፐ ጋጻን ደእያ ዎይንያ አይፍያ ጉምእያ ኦላን ዎይንያ አይፊ ጉምኤቴ። ሱይ ከሲደ፥ ሄ ዎይንያ ጉምእያ ኦላፐ ሄዙ ጼቱ ኪሎ ሚትርያ ኬና ሃኪደ፥ ፓራዉ ፑሉዋ ጋክያዋ ኬና ቁ ጊደ ኤሌዳ።14:20 ኢሳ. 63:3፤ ሴላ 1:15፤ ሳፃ 19:15