ታን ቡርጩኩዋ አባ ቤኣድ
1 ታን ሳሉዋን ሀራ ዎልቃማነ ማላልስያ ማላ በኣድ። ጾሳ ሀንቁ ኡንቱንቱ ቦላን ፖለትያ ድራዉ፥ ዉርሰ ላፑ ቦሻና ደእያ ላፑ ኪታንቻቱ ደኢኖ።
2 ቃይካ ታን ቡርጩኩዋ አባ ማላትያዋ ታማና ዋላከቴዳዋ በኣድ። ቃይ ዶኣ፥ አ ምስልያነ አ ሱን ፓይዱዋ ጾኔዳዋንታ በኣድ። ጾሳይ ኡንቱንቶ እሜዳ ዲቱዋ ኦይቂደ፥ ቡርጩኩዋ ማላትያ አባ ማታን ኡንቱንቱ ኤቄድኖ። 3 ኡንቱንቱ፥ ጾሳ ኦሳንቻ ሙሴ ማዝሙርያነ ዶርሳ ማዝሙርያ ሀዋዳን የጼድኖ።
"ጎዳዉ፥ ኡባፐ ዎልቃማ ጾሳዉ፥
ነ ኪታይ ግታነ ማላልስያዋ።
አሳ ዛርያ ኡባ ካተዉ፥
ነ ኦጊ ጽሉዋነ ቱሙዋ።15:3 ከሳ 15:1
4 ጎዳዉ፥ ነዉ ያየናዌነ
ነ ሱን ቦንቼናዌ ኦኔ?
አያዉ ጎፐ፥ ጌሻይ ነ ጻላላ።
አሳ ዛርያ ኡባይ ዪደ፥
ነ ስንን ጎይናና፤
አያዉ ጎፐ፥ ነ ጽሎ ኪታይ
ኡባዉ ቆንጬዳ"
ያጊደ የጺኖ።15:4 ኤር. 10:7፤ ማዝ. 86:9
ላፑ ቦሻና ደእያ ላፑ ኪታንቻቱዋ
5 ሄዋፐ ጉይያን፥ ታን ሳሉዋን ደእያ ጌሻ ጎሊ ዶየቶዋ ሄዌካ ማርካተ ዱንካንያ በኣድ።15:5 ከሳ 38:21 6 ላፑ ቦሻና ደእያ ላፑ ኪታንቻቱ ጌሻ ጎልያፐ ከሴድኖ። ኡንቱንቱ ጶሊደ ቦጽያ ላይኑዋ ማዩዋ ማዬድኖ፤ ባረንቱ ትራ ዎርቃ ዳንጩዋን ዩሽ አደ ቃቼድኖ። 7 ደኡዋን ደእያ ኦይዱ መታቱዋፐ እቱ፥ መ መናዉ ጋካናዉ ደእያ ጾሳ ሀንቁ ኩሜዳ ላፑ ዎርቃ ከረቱዋ ላፑ ኪታንቻቶ እሜዳ። 8 ጾሳ ቦንቹዋፐነ አ ዎልቃፐ ዬዳ ጩዋይ ጌሻ ጎልያ ኩሜዳ። ላፑ ኪታንቻቱ አሄዳ ላፑ ቦሻቱ ፖለታና ጋካናዉ፥ ጌሻ ጎልያ ኦንነ ገላናዉ ዳንዳይቤና።15:8 ከሳ 40:34፤ 1 ካታ. 8:10-11፤ 2 ኦዱዋ 5:13-14፤ ኢሳ. 6:4