ዮሃንሳ ሳፃ 19

ቦ ፓራ ቶጌዳዋ

11 ያትና፥ ሳሉ ዶየቴዳዋ ታን በኣድ። ሄዋን ቦ ፓራይ ደኤ፤ ሄ ፓራ ቶጌዳዌ አማነትያዋነ ቱማንቻ ጊደ ጼሰቴ። ቶጌዳዌ ጽሎተን ፕርዴነ ባረ ኦላካ ኦለቴ።✝19:11 ህዝ. 1:1፤ ማዝ. 96:13፤ ኢሳ. 11:4 12 አ አይፊ ታማ ላጩዋ ማላቴ፤ ቃይ እ ባረ ሁጲያን ዳሮ ካላቻ ዎዳ። አ ቦላ ጻፈት ኡቴዳ ሱንይ ደኤ፤ ሽን ሄ ሱንይ አየንቶነ አፐ አትን፥ ኦንነ ኤረና።✝19:12 ዳኔላ 10:6 13 እ ማዬዳ ማዩ ሱን ናቂ ከሴዳዋ። አ ሱንይካ ጾሳ ቃላ። 14 ሳሉዋ ዎታዳራቱ ቦ ጌሻ ሱፍያ ጌተትያ ክርያን ዳደቴዳ ማዩዋ ማዪደ፥ ቦ ፓራቱዋ ቶጊደ፥ አ ጌዱዋ ካሊኖ። 15 አሳ ዘረ እ ይስያ ኩሳ ማሻይ አ ዶናፐ ከሴ። ብራታ ጻምኣን አሳ እ ሞዳና። ኡባፐ ዎልቃማ ጾሳይ ባረ ሀንቁዋ ዎይንያ ኤሳይ ጉምኤትያሳን፥ ጉምኢደ በሳና።✝19:15 ማዝ. 2:9፤ ኢሳ. 63:3፤ ኢዩ. 3:13፤ ሳፃ 14:20 16 አ ማዩዋ ቦላነ አ ዎድርያ ቦላ፥ "ካታቱዋ ካትያነ ጎዳቱዋ ጎዳ" ያግያ ሱንይ ጻፈት ኡቴዳ።

17 ሄዋፐ ጉይያን፥ ታን እት ኪታንቻይ አዋን ኤቄዳዋ በኣድ። ሄ ኪታንቻይ ሳሉዋን ቂደ ፓልያ ካፉዋ ኡባቶ ባረ ኮሻ ቁ ኦደ፥ "ሃ ዪተ። ጾሳ ካዎ እትሳ ሺቅተ።✝19:17-18 ህዝ. 39:17-20 18 ዪደ ካታቱዋ አሹዋ፥ ሻላቃቱዋ አሹዋካ ዎታዳራቱዋ አሹዋ ሚተ፤ ፓራቱዋ አሹዋካ ፓራቱዋ ቶጌዳዋንቱ አሹዋካ ሚተ፤ ቃይ አሳ ኡባ አሹዋ አይልያዋነ ዎማኑዋ፥ ቃዋነ ሆካዋ ሚተ" ያጌዳ።

19 ፓራ ቶጌዳዋናነ አ ዎታዳራቱዋና ኦለታናዉ፥ ዶአይነ ሳኣ ካታቱ ቃይ ኡንቱንቱ ዎታዳራቱ እት ሳኣ ሺቅ ኡቴዳዋንታ ታን በኣድ። 20 ሄ ዶአይ አ ስንን ማላታ ኦዳ ዎርዶ ናብያና እትፐ ኦይቀቴዳ። ዶኣ ማላይ ደእያዋንታነ ዶኣ ምስለዉ ጎይኔዳዋንታ እ ባለዳዌ ሄ ኦያ ማላታቱዋና። ዶአይነ ዎርዱዋ ትምቢትያ ኦድያዌ ላአቱካ ዲንያን ኤጽያ ታማ አባን ፓጻ የገቴድኖ። 21 ኡንቱንቱ ዎታዳራቱ ፓራ ቶጌዳዋ ዶናፐ ከስያ ማሻን ሀይቄድኖ። ካፋቱ ኡባቱ ኡንቱንቱ አሹዋፐ ባረንቶ ዳንዳዬዳዋ ኬና ሜድኖ።