ሻአ ላይ ካዉተ
1 ጪሞ ኦላ ቁልፕያነ ዎልቃማ ሳንላታ ባረ ኩሽያን ኦይቄዳ እት ኪታንቻይ ሳሉዋፐ ይያዋ ታን በኣድ። 2 ኪታንቻይ ዳዊያ፥ ሄ በን ሾሻ፥ ጻላህያ ካፑዋ ዎይ ሴጻና ግያዋ ኦይቄዳ፤ ያቲደ ሻአ ላይዉ ቃቼዳ።20:2 ዶመ 3:1 3 ኪታንቻይ ጪሞ ኦላን አ የጊደ፥ ሻአ ላይይ ዉራናዉ፥ አሳ ዘረ ላኤንዋ ባለተና ማላ፥ ሄ ጪሞ ኦላ ቁልፕ ጎርዲደ አታሜዳ። ሄዋፐ ጉይያን፥ ዳዊ አማሬዳ ዎድያ ብለታናዉ በሴ።
4 ሄዋፐ ጉይያን፥ ታን አራታቱዋነ ኡንቱንቱን ኡቴዳዋንታ በኣድ፤ ኡንቱንቶ ፕርድያ ማታይ እመቴዳ። የሱስ ቆንጭሴዳ ቱሙዋነ ጾሳ ቃላ አዋዬዳ ድራዉ፥ ባረንቱ ቆያ ቃንጸቴዳ አሳ ሸምፑዋካ ታን በኣድ። ኡንቱንቱ ዶአዉ ዎይ ዶኣ ምስለዉ ጎይንበይክኖ። ኡንቱንቱ ዶኣ ማላ ባረንቱ ዴሙዋን ዎይ ባረንቱ ኩሽያን ዎቤይክኖ። ኡንቱንቱ ሀይቁዋፐ ደንዲደ፥ ክርስቶሳና እትፐ ካተቱዋዳን ሻአ ላይዉ ሞዴድኖ።20:4 ዳኔላ 7:9፣ 22 5 ሀይቄዳዋንቱፐ ጮራቱ ሻአ ላይይ ዉራና ጋካናዉ፥ ሀይቁዋፐ ደንድበይክኖ። ሄዌ ኮይሮ ደንዱዋ። 6 ኮይሮ ደንዱዋን ደንዴዳዋንቱ አንጀቴዳዋንታነ ጾሳ አሳቱዋ። ኡንቱንቱ ቦላ ላኤን ሀይቆ ዎልቃይ ባዋ። ኡንቱንቱ ጾሳዉነ ክርስቶሳዉ ቄሳቱዋ ግዳና፤ ኡንቱንቱ አናና እትፐ ሻአ ላይዉ ሞዳና።
ሴጻናይ ጾነቴዳ
7 ሻአ ላይይ ዉሬዳዋፐ ጉይያን፥ ሴጻናይ ቃሹዋፐ ብለታና። 8 እ ሳኣን ኡባ ሳን ደእያ አሳ ዘረ ባለናዉ ከሳና፤ ሄዌ ጎጋነ ማጎጋ ጌተትያዋ። ሴጻናይ አባ ሻፍያ ኬና ዘረ ኦላዉ ሺሻና።20:8 ህዝ. 7:2፤ 38:2፣ 9፣ 15 9 ሄ ዛራቱ ቢታ ኡባ ማዪደ ጌሻቱዋ ሄራነ ጾሳይ ሲቅያ ካታማቶ ዩይ አ ኤቄድኖ። ሽን ታማይ ሳሉዋፐ ዎደ፥ ኡንቱንታ ሜዳ።
10 ዶአይነ ዎርዶ ናቢ የገቴዳ ኤጽያ ዲንያ ታማ አባን ጻላህያ ካፑ፥ አሳ ዘረ ባለዳዌ፥ የገቴዳ። ኡንቱንቱ ቃማነ ጋላስ መ መናዉ ፓጻ ካኤታና።
ዉርሰ ፕርዳ
11 ሄዋፐ ጉይያን፥ ታን ዎልቃማ ቦ አራታነ ሄ አራታን ኡቴዳዋ በኣድ። ሳአይነ ሳሉ አ ስንፐ ባቃቴድኖ፤ ላኤን ቤትበይክኖ።20:11-12 ዳኔላ 7:9-10 12 ሀይቄዳዋንቱ፥ ቁ ግያዋንቱነ ጉቱ አራታ ስንን ኤቄዳዋንታ ታን በኣድ። ማጻፋቱ ዶየቴድኖ፤ ሀራ ማጻፋይ፥ ደኡዋ ማጻፋይካ ዶየቴዳ። ሀይቄዳዋንቱ ባረንቱ ኦሱዋዳን፥ ማጻፋቱዋን ጻፈት ኡቴዳዋዳንካ ፕርደቴድኖ። 13 አባይ ባረ ግዶን ደእያ ሀይቄዳዋንታ እሜዳ፤ ሀይቁነ ስኦሊ ባረንቱ ግዶን ደእያ ሀይቄዳዋንታ እሜድኖ። ኡባይካ ባረንቱ ኦሱዋዳን ፕርደቴድኖ። 14 ሄዋፐ ጉይያን፥ ሀዩነ ስኦሊ ታማ አባን የገቴድኖ። ሄ ታማ አባይ ላኤን ሀይቁዋ። 15 ደኡዋ ማጻፋን ባረ ሱንይ ጻፈትቤና አሳይ ኦንነ ታማ አባን የገቴዳ።