(5) የሱስ ሳርዴሳን ደእያ ዎሳ ጎለዉ ጎዋ
1 ሳርዴሳን ደእያ ዎሳ ጎልያ ኪታንቻዉ ሀዋዳን ያጋደ ጻፋ:
"ጾሳ አያና ላፑናቱነ ላፑ ጾልንታቱ ደእያዌ ሀዋዳን ያጌ። ታን ነ ኪታ ኤራይ፤ አሳይ ኔና ሸምፑዋና ደኣሳ ግንቶካ፥ ኔን ሀይቃዳ። 2 ቤጎታ! አቴዳዋነ ሀይቃናዉ ማቴዳዋ መን። አያዉ ጎፐ፥ ነ ኪታይ ታ ጾሳ ስንን ፖሎ ግደናዋ ታን ደማድ። 3 ስም ኔን አኬዳዋነ ስሴዳዋ አኬካ፤ ናጋ፤ ነ ናጋራፐካ ስማ። ኔን ቤጎተናዋ ግዶፐ፥ ታን ኔኮ ካይሱዋዳን ያና፤ ታን ዎይሳደ ያነንቶ ኔን ኤራካ። 4 ሽን ባረንቱ ማዩዋ ቅትስቤና አማሬዳ አሳቱ ሳርዴሳን ኔናና ደኢኖ። ኡንቱንቱ ቦ ማዩዋ ማዪደ ታናና ሀመታና፤ አያዉ ጎፐ፥ ኡንቱንቱ ቦ ማዩዋ ማያናዉ በስያዋንታ። 5 ጾንያዌ ሄዋዳንካ ቦ ማዩዋ ማያና። ታን አ ሱን ደኡዋ ማጻፋፐ3:5 ደኡዋ ማጻፋ፦ ጾሳ አሳቱዋ ሱንይ ጻፈትያ ማጻፋ። ቁጭከ፤ ታን ታ አቡ ስንንነ አ ኪታንቻቱዋ ስንን እ ታዋ ግድያዋ ማርካታና።3:5 ከሳ 32:32-33፤ ማዝ. 69:28፤ ሳፃ 20:12፤ ማቶሳ 10:32፤ ሉቃሳ 12:8
6 "ስሳናዉ ሀይይ ደእያ ኡራይ ጌሻ አያናይ ዎሳ ጎለቶ ግያዋ ስሶ ያጌ"
ያጋደ ጻፋ።
(6) የሱስ ፕላደልፍያን ደእያ ዎሳ ጎለዉ ጎዋ
7 ፕላደልፍያን ደእያ ዎሳ ጎልያ ኪታንቻዉ ሀዋዳን ያጋደ ጻፋ:
"ዳዊተ ቁልፕያ3:7 ዳዊተ ቁልፕያ፦ ሀዋ ጉሳይ ዳዊተ ካዉተ አይሱዋ ማታ ኦድያዋ። ኦይቄዳዌ፥ ኦንነ ጎርዳናዉ ዳንዳየናዳን ዶይያዌ፥ ቃይ ኦንነ ዶያናዉ ዳንዳየናዳን ጎርድያዌ ጌሻይነ፥ ቱማንቻይ ሀዋዳን ያጌ።3:7 ኢሳ. 22:22፤ ኢዮባ 12:14 8 ታን ነ ኪታ ኤራይ። በአ፥ ታን ነ ስንን ኦንነ ጎርዳናዉ ዳንዳየና ፐንግያ ዎድ፤ አያዉ ጎፐ፥ ነ ዎልቃይ ጉ ግዶፐነ፥ ታ ቃላ ናጋዳነ ታ ሱንካ ኤርከ ጋበይካ። 9 በአ፥ አይሁዳ ግድክኖ ሽን ባረና፥ ‘ኑን አይሁዳ’ ጊደ ዎርዶትያ ሴጻና አይሁዳ ዎሳ ጎልያ ታን አሃደ፥ ነ ስንን ጎይንሳናነ ኔና ሲቅያዋካ ኡንቱንታ ኤርሳና።3:9 ኢሳ. 49:23፤ 60:14፤ 43:4 10 ኔን ገንጩዋን ታ አዛዙዋ ናጌዳ ድራዉ፥ ሳኣን ደእያ አሳ ፓጫናዉ ኩመን ሳኣ ቦላ ይያ ዋይያ ዎድያፐ ታንካ ኔና ናጋና። 11 ታን ኤለካ ያና፤ ኦንነ ነ ካላቻ አከና ማላ፥ ነዉ ደእያዋ ምንሳ ኦይቃ። 12 ታን ጾንያ ኡራ ታ አዉዋ ጌሻ ጎልያን ቱሳ ኦና፤ እ ሄዋፐ ኡባካ ከሰና። ታን ታ ጾሳ ሱን፥ ታ ጾሳ ካታማ ሱንነ ታ ጾሳ ማታፐ ዎና ኦራ የሩሳላመ ሱን አ ቦላ ጻፋና። ቃይ ታን ታ ኦራ ሱንካ አ ቦላ ጻፋና። 13 ስሳናዉ ሀይይ ደእያ ኡራይ ጌሻ አያናይ ዎሳ ጎለቶ ግያዋ ስሶ ያጌ"
ያጋደ ጻፋ።
(7) የሱስ ሎዶቅያን ደእያ ዎሳ ጎለዉ ጎዋ
14 ሎዶቅያን ደእያ ዎሳ ጎልያ ኪታንቻዉ ሀዋዳን ያጋደ ጻፋ:
"አማነቴዳ ቱማንቻ ማርካይ፥ ጾሳይ መዳዋ ኮይሩ፥ አመንእ ግያዌ ሀዋዳን ያጌ። 15 ታን ነ ኪታ ኤራይ። ኔን እርጻ ግዳካ፤ ዎይ ሴልያዋ ግዳካ፤ እርጻ ዎይ ሴልያዋ ግዳርኪ። 16 ኔን እርጻ ዎይ ሴልያዋ ግደናን፥ ዶምቦሎላ ግድያ ድራዉ፥ ታን ኔና ታ ዶናፐ ጩቻና ሀናይ። 17 አያዉ ጎፐ ኔን፥ ‘ታን ዱረ፤ ሚሻና ደአይ፤ ታና አይነ ኮሸና’ ያጋሳ። ሽን ኔን መቶትያ አሳ፥ ቃረያ አሳ፥ ህዬሳ፥ ቆቃነ ካሎቴዳ አሳ ግድያዋ ኤራካ። 18 ሄዋ ድራዉ፥ ኔን ዱረታና ማላ፥ ታማን ጌዬዳ ዎርቃ፥ ኔና ዬላይያ ነ ካሉዋ ካማናዉ ቦ ማዩዋነ ቃይ ሎይ ጼላናዉ ነ አይፍያ ኦክያ ልያ ታፐ ሻማናዳን፥ ታን ኔና ዞራይ። 19 ታን ሲቅያ ኡባ ሴራይነ ሙራይ፤ ስም ሎይ ሴለታ፤ ነ ናጋራፐካ ስማ።3:19 ሌም. 3:12፤ እብራ. 12:6 20 በአ፥ ታን ካረን ኤቃደ ጼሳይ። ኦንነ ታን ጼስያዋ ስሲደ፥ ካርያ ዶዮፐ፥ ታን አኮ ገላደ አናና እትፐ ካዉዋ ማና፤ እካ ታናና እትፐ ማና። 21 ቃይ ታን ጾናደ ታ አዉዋና አ ካዉተ ኦይድያን ኡቴዳዋዳን፥ ጾንያ ኡራዉ ታናና ታ ካዉተ ኦይድያን ኡትያ ማታ እማና።
22 "ስስያ ሀይይ ደእያ ኡራይ ጌሻ አያናይ ዎሳ ጎለቶ ግያዋ ስሶ ያጌ ያጋደ ጻፋ"
ያጌዳ።