1 ዶርሳይ ላፑ ማታፋቱዋፐ እቱዋ ዶይሽን በኣድ፤ ቃይ ሸምፑዋና ደእያ ኦይዱ መታቱዋፐ እቱ ጉጉን ጉን ማላትያ ኮሻን፥ "ሃያ!" ያግያዋ፥ ታን ስሳድ። 2 ታን እት ቦ ፓራ በኣድ። ሄ ፓራ ቶጌዳዌ ዎንዳፍያ ኦይቄዳ፤ ቃይ አዉ ካላቻይ እመቴዳ። ኦላ እ ጾኒድነ ቃይካ ጾናናዉ ከሴዳ።✝

3 ዶርሳይ ላኤን ማታፋ ዶዬዳ ዎደ፥ ሸምፑዋና ደእያ መታቱዋ ላኤን፥ "ሃያ!" ያግያዋ፥ ታን ስሳድ። 4 ቃይ ሀራ ዳማ ፓራይ ከሴዳ። አሳይ እቱ እቱዋና ሹከታና ማላ፥ ሄ ፓራ ቶጌዳዎ ሳኣን ሳሮተ ድግያ ዎልቃይ እመቴዳ። ዎጋ ማሻይ አዉ እመቴዳ።✝

5 ዶርሳይ ሄዘን ማታፋ ዶዬዳ ዎደ፥ ደኡዋን ደእያ መታቱዋ ሄዘን፥ "ሃያ!" ያግያዋ፥ ታን ስሳድ። ያታደ ካረ ፓራይ ከሴዳዋ በኣድ፤ ቃይ ሄ ፓራ ቶጌዳዌ ባረ ኩሽያን ሚዛንያ ኦይቄዳ።✝ 6 ታን ደኡዋን ደእያ ኦይዱ መታቱዋ ግዶፐ ኮሻ ማላትያባ ስሳድ። ሄ ኮሻይ፥ "እት ጋላሳ ኦሶ ድርጉ ባጋ ኪሉዋ ዛርጋ፤ ቃይ እት ጋላሳ ኦሶ ድርጉ እት ኪሉዋ ባጋ ባንጋ። ሽን ዛይትያነ ዎይንያ ኤሳ ቆሆፓ" ያግያዋ ስሳድ።

7 ዶርሳይ ኦይደን ማታፋ ዶዬዳ ዎደ፥ ደኡዋን ደእያ መታቱዋ ኦይደን፥ "ሃያ!" ያግያዋ፥ ታን ስሳድ። 8 ታን ግራጨ ፓራይ ከሴዳዋ በኣድ። ሄ ፓራ ቶጌዳዋ ሱንይ ሀይቁዋ፤ አ ጌዱዋ ስኦሊ ካሌዳ። ሀይቁነ ስኦሊ ሳኣፐ ኦይደን ኩሽያ ኦላን፥ ኮሻን፥ ሀርግያን፥ ዶኣን ዎሳና ማላ፥ ኡንቱንቶ ማታይ እመቴዳ።✝

9 ዶርሳይ እቼሸን ማታፋ ዶዬዳ ዎደ፥ ኡንቱንቱ ጾሳ ቃላ ኦዴዳ ድራዉነ ባረንቱ ማርካተን አማነቴዳ ድራዉ፥ ሹኬዳ አሳ ሸምፑዋ ያርሹዋ ያርሽያ ሳፐ ጋርሳን በኣድ። 10 ኡንቱንቱ ባረንቱ ቃላ ቁ ኦደ፥ "ኡባ ሞድያ ጎዳዉ፥ ጌሻዉ፥ ቱማንቻዉ፥ ሳኣን ደእያ አሳ ቦላ አዉደ ፕርዳይ? ቃይ ኑ ሱ አዉደ ጭገታይ?" ያጌድኖ። 11 ኡንቱንቶ ሁጲያን ሁጲያን ቦ ማዩ እመቴዳ። ኡንቱንቱዋዳን ሀይቃናዉ በስያ ኡንቱንቱ ላገ ኦሳንቻቱዋ ፓይዱነ ኡንቱንቱ እሻቱዋ ፓይዱ ኩማና ጋካናዉ፥ ኡንቱንቱ አማሬዳ ዎድያ ታክሻና ማላ፥ ኡንቱንቶ ኦደቴዳ።

12 ዶርሳይ ኡሱፑን ማታፋ ዶዬዳ ዎደ፥ ታን በኣድ፤ ቢታይ ሎይ ቃጼዳ። አዋይፊ ካረ ማዩዋዳን ካረጼዳ፤ አገናይካ ሙለ ሱ ማላቴዳ። 13 ባላስያ ግያ ምት ጋምኤ አይፊ፥ ዎልቃማ ጫርኩ ቃና፥ ሳኣን ቆቆፈትያዋዳን፥ ጾልንታቱ ሳሉዋፐ ሳኣን ቆቆፈቴድኖ።✝ 14 ሳሉ ጻጸቶ ማጻፋይ ጻጸትያዋዳን፥ ጻጸቲደ ይ አጌዳ፤ ደር ኡባቱነ ሃን ዶደቴዳ ሳአይ ኡባይ ባረንቱ ደኢያሳፐ ክች አጌድኖ። 15 ሄዋፐ ጉይያን፥ ሳኣ ካታቱ፥ ደርያ ሞድያዋንቱ፥ ሻላቃቱ፥ ዱራቱ፥ ዎልቃማቱ፥ ቃይ ሀራ አሳይ ኡባይ፥ አይለቱ፥ ዎማናቱ፥ ደርያ ከሲደ፥ ጎንጎሉዋ ግዶንነ ደርያን ደእያ ዛላ ጉየ ባጋን ቆሰቴድኖ።✝ 16 ያቲደ ደረቱዋነ ሹቻ፥ "ካዉተ ኦይድያን ኡቴዳዋ አይፍያፐነ ዶርሳ ሀንቁዋፐ ኑ ቦላ ኩንዲደ፥ ኑና ገንርክቴሻ!✝ 17 አያዉ ጎፐ፥ ኡንቱንቶ ዎልቃማ ሀንቁዋ ጋላሳይ ጋክ ክቼዳ፤ ሄ ሀንቁዋ ዳንዳያናዌ ኦኔ?" ያጌድኖ።✝