ባቃቲደ አትያ ካታማቱዋ
(ፓይ. 35:9-34፤ ኢያሳ 20:1-9)
1 "መና ጎዳይ ህንተ ጾሳይ ህንተንቶ እምያ ጋድያን ደእያ ካዉተ ይስያ ዎደ፥ ቃይ ህንተካ ኡንቱንታ የደርሲደ፥ ኡንቱንቱ ካታማቱዋንነ ኡንቱንቱ ጎለቱዋን ደኡዋ ዶምያ ዎደ፥ 2 መና ጎዳይ ህንተ ጾሳይ ላታ ኦደ እምያ ጋድያን ደእያ ካታማቱዋፐ ሄዙ ካታማቱዋ ህንተንቶ ዱማይተ። 3 መና ጎዳይ ህንተ ጾሳይ ህንተንቶ ላታ ኦደ እምያ ቢታ ሄዙ ከሲደ ሻክተ። ያቲደ አሳ ዎዳ ኦንነ ሄ ካታማቱዋኮ ባቃታናዳን ኦግያ ጊግስተ።
4 "እት አሳይ ካሰ ሞርከተይ ባይናን ደእሽን፥ ኤረናን ባረ ሾሩዋ ዎፐ፥ እ ሄ ካታማቱዋፐ እቶ ባቃቲደ፥ ባረ ሸምፑዋ አሾ። 5 ላኡ አሳይ ም ቃንጻናዉ ዎራ ቢና፥ እቱ ም ቃንጽሽን፥ ቱትያፐ አይፊ ኮለት ዎደ ህንኩዋ ዎፐ፥ ሄ ዎዳዌ ሀ ሄዙ ካታማቱዋፐ እቱዋ ባቃቲደ፥ ባረ ሸምፑዋ አሾ። 6 ቆሰት አትያ ካታማይ እቱዋ ጻላላ ግዶፐ፥ ዎጺደ ኤለካ ጋካናዉ ኦጊ አዱቄዳ ጋሱዋን ሱ አችያዌ ሱልያ ሀንቁዋን ደንዲደ፥ የደርስ ጋኪደ፥ ሀይቃናዉ በሰናዋ ዎናዉ ዳንዳዬ፤ አያዉ ጎፐ፥ እ ባረ ሾሩዋ ዎዳዌ ካሰ ሞርከተይ ደእያ ድራሳ ግደና። 7 ህንተ ሄዙ ካታማቱዋ ዱማይ ዎናዳን፥ ታን ህንተና አዛዜዳዌ ሄዋሳ።
8 "መና ጎዳይ ህንተ ጾሳይ ካሰ ህንተ ማይዛ አዋቶ ጫቄዳዋዳን ህንተ ዛዋ አሶፐ፥ ቃይ ህንተ ማይዛ አዋቶ እማና ጌዳ ቢታ ኡባ ህንተንቶ እሞፐ፥ 9 ሀ ሄዙ ካታማቱዋፐ ሀራ ሄዙ ካታማቱዋ ጉጂታ። ሀቼ ታን ህንተና አዛዝያዋ ኡባ ህንተ ፖሎፐ፥ መና ጎዳ ህንተ ጾሳ ዶሶፐነ እ ህንተና ታማርሴዳ ኦግያን ምኒደ ደኦፐ፥ ሀ ቢታይ ህንተንቶ እመታና። 10 ሄዋ ኦፐ፥ መና ጎዳይ ህንተ ጾሳይ ላታ ኦደ ህንተንቶ እምያ ጋድያን ጌሻ አሳ ሱይ ጉከና፤ ቃይ ህንተካ ሱ ጉስያ ናጋራፐ አቲታ።
11 "ሽን እት አሳይ ባረ ሾሩዋ እጺደ፥ ዙግ ናጊደ አ ዎደ፥ ሀ ካታማቱዋፐ እቶ ባቃቶፐ፥ 12 አ ካታማ ጭማቱ እ ባቃቴዳ ካታማፐ ኪት አሂሲደ፥ ሀሉዋ ከሳናዉ አ ኮይያዎ አ እምኖ። 13 አዉ አይነ ቃረቶፕተ፤ ህንተንቶ ኡባባይ ሎአ ግዳና ማላ፥ ጌሻ ሱ ጉስያዋ እስራኤልያ ግዶፐ ይስተ።
በን ዛዋቱዋ
14 "መና ጎዳይ ህንተ ጾሳይ ህንተ ላታናዳን እምያ ጋድያን፥ በን አሳይ ኤሴዳ ነ ሾሩዋ ቢታ ዛዋ ሾዶፓ።19:14 ዛረ. 27:17
ማርካቱዋባ
15 "እት አሳ ባይዛንቻ ጋናዉ እት ማርካ ጻላላይ ግደና። ላኡ ዎይ ሄዙ ማርካይ ማርካትና፥ ሄ ሞቱ ፕርደታናዉ ኮሼ።19:15 ፓይ. 35:30፤ ዛረ. 17:6፤ ማቶሳ 18:16፤ ዮሃ. 8:17፤ 2 ቆሮ. 13:1፤ 1 ጽሞ. 5:19፤ እብራ. 10:28
16 "እት አሳይ ሀራ ዎርዱዋን ሞታናዉ ደንዶፐ፥ 17 ሄ ሞትያዌነ ሞተትያዌ ላኡካ መና ጎዳ ስንን፥ ቄሳቱ ዋ ስንንነ ሄ ዎደ ፕርድያ ዳናቱዋ ስንን ኤቂኖ። 18 ያቶፐ ዳናቱ ሄ የዉዋ ምንሲደ ብድኖ፤ ሄ ሞትያዌ ባረ እሻ ዎርዱዋን ሞቴዳዋ ግዶፐ፥ 19 እ ሄ ሞቱዋን ባረ እሻ ሙርሳናዉ ቆፔዳ ሙራ ባረዉ ሙረቶ፤ ሄዋዳን ኦደ፥ ሄዋ ማላ ኢታ ህንተ ግዶፐ ድግተ። 20 ያቶፐ፥ ሀራ አሳይ ሄዋ ስሲደ ያያና፤ ሄዋ ማላ ኢታ ኦሱዋ ላኤን ኦና። 21 ሄዋ ማላ ኢታ ኦዳዎ አይነ ቃረቶፕተ፤ ሸምፑዋ ዎዳዌ ሀይቆ፤ አይፍያ ድራዉ አይፍያ፤ አቻ ድራዉ አቻ፤ ኩሽያ ድራዉ ኩሽያ፤ ገድያ ድራውካ ገድያ።19:21 ከሳ 21:23-25፤ ዎጋ 24:19-20፤ ማቶሳ 5:38