ዛረዋ 2

መላ ቢታን ቱጋቴዳ ዎደቱዋ

1 "ሄዋፐ ጉይያን ኑን፥ መና ጎዳይ ታና አዛዜዳዋዳን፥ ዞኦ አባ አፍያ ኦግያ ኦይቂደ፥ ጉየ ስሚደ፥ መላ ቢታ ቤዶ፤ ሄዋን መቶቲደ፥ ደረትያ ኤዶማ ጋድያን ዳሮ ጋላሳ ዩዬዶ።✝2:1 ፓይ. 21:4

2 "ሄዋፐ ጉይያን፥ መና ጎዳይ ታና ሀዋዳን ያጌዳ፤ 3 ‘ሀ ደረትያ ቢታ ዩሻይ ህንተንቶ ግዳናዋ፤ ጉየ ስሚደ፥ ሁጲሳ ባጋ ቢተ። 4 አሳ ኔን ሀዋዳን ያጋደ አዛዛ፤ "ኤዶማን ደእያ ህንተ እሻቱዋ ግድያ ኤሳ ናናቱ ቢታና ህንተ አታ። ኡንቱንቱ ህንተንቶ ያያና፤ ሽን ህንተ ሎይ ናገትተ።✝2:4 ዶመ 36:8 5 ታን ኡንቱንቱ ጋድያፐ ገዲ የያ ሳ ኬሻነ ህንተንቶ እመና ድራዉ፥ ኡንቱንቱና ዋለቀቶፕተ፤ አያዉ ጎፐ፥ ታን ደረትያ ኤዶማ ቢታ ላታ ኦደ ኤሳዉ እማ ድጋድ። 6 ህንተ ምያ ቁማነ ኡሽያ ሃ፥ ኡንቱንቱፐ ሻሉዋን ሻምተ ያጋደ አዛዛ" ያጌዳ።

7 " ‘መና ጎዳይ ህንተ ጾሳይ ህንተ ኦዳዋ ኡባ አንጄዳ፤ ህንተ ሀ ዎልቃማ መላ ቢታን ሀመትያ ዎደ፥ ህንተና ናጌዳ። ሀ ኦይታሙ ላይ ኡባን መና ጎዳይ ህንተ ጾሳይ ህንተናና ደኤዳ። አያነ ህንተንቶ ፓጭስቤና።

8 " ‘ሄዋ ድራዉ፥ ኑን ኑ እሻቱዋ ግድያ ኤሳ ናናይ ደእያ ኤዶማ ቢታና አደ ቤዶ። ቃይ ኤላታነ ኤጽዮን-ጋብራ ግያ ካታማቱዋፐ ደንዲደ፥ አራባኮ ጋያ ኦግያ አጊደ፥ ሞኣባ መላ ቢታ አዶ።

9 " ‘መና ጎዳይ ታና ሀዋዳን ያጌዳ፤ "ታን ኡንቱንቱ ጋድያፐ አያነ ህንተንቶ እመና ድራዉ፥ ሞኣባ አሳና ዋለቀቶፕተ ዎይ ኡንቱንታ ኦሎፕተ፤ አያዉ ጎፐ፥ ኤራ ካታማ ታን ላታ ኦደ ሎጸ ዛረቶ እማ ድጋድ" ያጌዳ’ ያጌዳ።"✝2:9 ዶመ 19:37

10 (ሄ ጋድያን ካሰ ምኖነ ጮራ ግዴዳ፥ ቃይ አናቀ ዛራቱዋዳን አዱሳ ግዴዳ ኤመታ ጌተትያ አሳቱ ደኤድኖ። 11 ኡንቱንቱ አናቀቱዋዳንካ ራፋየቱዋ ጌተቲኖ። ሽን ሞኣባ አሳይ ኡንቱንታ ኤመታ ጊደ ጼሴ። 12 ሆራ ቢታ አሳይ ቃይ ካሰ ኤዶማን ደኤዳ፤ ሽን እስራኤላቱ ላታናዳን መና ጎዳይ ኡንቱንቶ እሜዳ ጋድያን ኡንቱንቱ ኦዳዋዳን፥ ኤሳ ዛራቱ ሆራታ ኡንቱንቱ ጋድያፐ ሾዴድኖ፤ ቃይ ባረንቱ ስንፐ ኡንቱንታ ይሲደ፥ ኡንቱንቱ ሳኣን ኡቴድኖ።)

13 ሙሴ፥ "መና ጎዳይ ኑና፥ ‘ሀእ ደንድተ፤ ዘሬዳ ሻፋ ፕንተ’ ያግና፥ ኑን ዘሬዳ ሻፋ ፕኔዶ። 14 ኑን ቃዴሳ-ባርነፐ ደንዲደ፥ ዘሬዳ ሻፋ ፕናና ጋካናዉ ደእያ ዎዲ ሀታማነ ሆስፑን ላይ፤ ሄ ዎደ መና ጎዳይ ኡንቱንቶ ጫቄዳዋዳን፥ ኦላዉ ጋኬዳ ሄ የለታ አቱማዋንቱ ኡባይ ዉሬድኖ።✝2:14 ፓይ. 14:28-35 15 ዱንካኔዳ ሳፐ ኡንቱንቱ ኡባና ድምእ ጊደ ያና ጋካናዉ፥ መና ጎዳ ኩሺ ኡንቱንቱ ቦላ ደኤ።

16 "ኦላዉ ጋኬዳ አቱማ አሳይ ኡባይ ኡባና ዬዳዋፐነ አሳ ግዶፐ ሀይቂዴ ዉሬዳዋፐ ጉይያን፥ 17 መና ጎዳይ ታና ሀዋዳን ያጌዳ፤ 18 ‘ኤራ ኦግያና ሀች ህንተ ሞኣባ ቢታ አታ። 19 ህንተ አሞና አሳቱ ቢታ ጋክያ ዎደ፥ ኡንቱንታ ቃሰረፕተ ዎይ ኡንቱንቱና ዋላቀቶፕተ። አያዉ ጎፐ፥ አሞና አሳቱ ጋድያፐ አያነ ታን ህንተንቶ ላታ ኦደ እምከ። ታን ሄ ቢታ ሎጸ ዛርያዉ ላታ ኦደ እማ ድጋድ’ ያጌዳ።✝2:19 ዶመ 19:38

20 "(ሄ ቢታይ ካሰ ያን ደእያ አሳይ ጼሰትያ ሱንን ራፋየቱዋ ቢታ ጌተቲደ ጼሰቴ። ቃይ አሞናቱ ኡንቱንታ ዛምዙሚም ጊደ ጼሲኖ። 21 ኡንቱንቱካ አናቀቱዋዳን አዱሳ፥ ምኖነ ጮራ ጋደ፤ ሽን መና ጎዳይ ኡንቱንታ ይስና፥ አሞናቱ ኡንቱንቱ ቢታ ላቲደ ኡቴድኖ። 22 መና ጎዳይ ኤዶማን ደእያ ኤሳ ዛረቶ ኦዳዋዳን፥ ኡንቱንቶካ ኦዳ፤ ሄዌካ እ ሄ ጋድያን ደእያ ሆራታ ይስና፥ ኤሳ ዛራቱ ኡንቱንቱ ቢታ ላቲደ ሀቼ ጋካናዉ ኡቴድኖ። 23 ጋዛ ጋካናዉ ደእያ ሄራቱዋን ደእያ አዎቱዋ ግዶፐ፥ ካፍቶራ ግያ ጋድያፐ ዬዳ ካፍቶረቱ ኡንቱንታ ይሲደ፥ ኡንቱንቱ ሳኣን ኡቴድኖ።)

24 "ቃይካ ጾሳይ ኑና ሀዋዳን ያጌዳ፤ ‘ደንድተ፤ አርኖና ሻፋ ፕንተ። በእተ፥ አሞረ ቢታ አሳ ግድያ ሀሰቦና ካትያ ስሆናነ አ ቢታ ታን ህንተ ኩሽያን አደ እማድ፤ አ ኦሊደ አ ቢታ ላትያዋዳን ዶምተ። 25 ሀቼፐ ዶሚደ ሳሉዋፐ ጋርሳና ደእያ አሳይ ኡባይ ህንተንቶ ያያናዳን ታን ኦና፤ ኡንቱንቱ ህንተዋ ስስያ ዎደ ኡባን፥ ያሻን ኮኮራና’ ያጌዳ።

እስራኤልያ አሳይ ካትያ ስሆና ጾኔዳ

26 "ሄዋፐ ጉይያን፥ ቅደሞታ መላ ቢታፐ ሀሰቦና ካትያ ስሆናዉ ሳሮ ቃላ ኪተትያዋንቱ ቦላ ሀዋዳን ያጋደ ኪታድ፤ 27 ‘ኑና ነ ቢታና አርኪ! ኑን ዎጋ ኦገ ጻላ ኦይቂደ ባና፤ አፐ ኡሸቻ ዎይ ሀድርሳ ስሞኮ። 28 ኑን ምያ ቁማዉነ ኡሽያ ሃው ሚሻ ቃንጻና። ኑ ኮይያዌ ነ ቢታና አናዋ ጻላላ። 29 ኤዶማን ደእያ ኤሳ ዛራቱነ፥ ኤራን ደእያ ሞኣባ ዛራቱ ኑና አዋዳን፥ መና ጎዳይ ኑ ጾሳይ፥ ኑዉ እምያ ቢታዉ ዮርዳኖሳ ሻፋ ኑን ፕናና ጋካናዉ፥ ኦገ ጻላላና ኑና አ’ ያጋድ።

30 "ሽን ሀሰቦና ካቲ ስሆን ኑና አናን ድጌዳ። አያዉ ጎፐ፥ መና ጎዳይ ህንተ ጾሳይ ሀች ህንተ በእያዋዳን፥ አ ህንተ ኩሽያን አደ እማናዉ አ ዎዛና ምንሲደ፥ አ ሞርግያ ዞዱ ኦዳ።

31 "ሄዋፐ ጉይያን መና ጎዳይ ታና፥ ‘በአ፥ ስሆናነ አ ቢታ ታን ነዉ እሙሳ ዶማድ፤ ሀእ ጾናደ፥ አ ቢታ ላታ’ ያጌዳ።

32 "ያትና፥ ስሆን ባረ አሳ ኡባ አኪደ፥ ያሃጻ ግያ ሳን ኑናና ኦለታናዉ ደንዴዳ። 33 ሽን መና ጎዳይ ኑ ጾሳይ ኑዉ አ አ እሜዳ፤ አ፥ አ አቱማ ናናቱዋነ አ አሳ ኡባ ኑን ዎዶ። 34 ሄ ዎደ ኑን አ ካታማቱዋ ኡባ ኦሞዲደ፥ ሙለ ካታማቱዋካ፥ አን ደእያ አቱማ አሳና፥ ማጫ አሳናነ ናናቱዋና ይሴዳ፤ አያነ አሽበይክኖ። 35 ኡንቱንቱ መህያነ ኑን ኦይቄዳ ካታማቱዋፐ ኦሞዴዳባቱዋ ጻላላ ኑዉ አኬዶ።

36 "አርኖና ዛንጋራ ጋጻን ደእያ አሮኤራፐነ ሄ ዛንጋራ ግዶን ደእያ ካታማፐ ዶሚደ ቢደ ጋላኣደ ቢታ ጋካናዉ፥ ኑዉ ምኔዳ እት ካታምነ ደእቤና። መና ጎዳይ ኑ ጾሳይ ኡንቱንታ ኡባ ኑ ኩሽያን አ እሜዳ። 37 ሽን ኑን አሞና ዛራቱዋ ጋድያኮ፥ ሄዌካ ያቦቃ ሻፋ ዶና ኡባኮ፥ ደረትያ ቢታ ካታማቱዋኮነ መና ጎዳይ ኑ ጾሳይ ኑን ባናዳን አዛዝቤና ሳ ኡባኮ ሺቅበይኮ።