ዛረዋ 29

ቃላ ጫቁዋ ኦራጹሳ

1 መና ጎዳይ ሲና ደርያን እስራኤላቱዋና ጫቀቴዳ ጫቁዋ ቃላ ቦላ ሀራ ሞኣበን ኡንቱንቱና ጫቀታናዉ ሙሳ አዛዜዳ ጫቁዋ ቃላቱ ሀዋንታ። 2 ሙሴ እስራኤልያ አሳ ኡባ ጼስ ሺሺደ፥ ኡንቱንቶ ኦድያባይ ሀዋ፦

"መና ጎዳይ ህንተ ስንን ግብጼ ካትያ ቦላ፥ አ ኦላንቻቱዋ ኡባ ቦላነ አ ቢታ ኡባ ቦላ ኦዳዋነ ጋዳዋ ህንተ አይፍያን በኤድታ። 3 ሄ ኢታ መቶቱዋ፥ ዎልቃማ ማላልስያዋንታነ ኦራባቱዋ ህንተ አይፍያን በኤድታ። 4 ሽን ሀች ጋካናዉ፥ መና ጎዳይ ህንተንቶ አኬክያ ዎዛና፥ ጼልያ አይፍያነ ስስያ ሀይ እምቤና። 5 ጾሳይ ኦይታሙ ላይ ኩመን ህንተና ቢታ ባዙዋን ካለያ ዎደ፥ ህንተ ማዩ ህንተ ቦላፐ ዉርቤና፥ ህንተ ጫማይካ ህንተ ገድያፐ ዉርቤና። 6 ህንተ ምያ ኡክይ፥ ኡሽያ ዎይንያ ኤሳይ፥ ዎይ ሀራ ማይያ ኡሻይ ባዋ፤ ዮፐካ መና ጎዳይ ህንተንቶ ጾሳ ግድያዋ ኤርሳድ።

7 "ኑን ሀ ሳኣ ጋኬዳ ዎደ፥ ሀሰቦና ካቲ ስሆንነ ባሳነ ካቲ ኦግ ኑናና ኦለታናዉ ዬድኖ፤ ሽን ኑን ኡንቱንታ ጾኔዶ።✝29:7 ፓይ. 21:21-35 8 ኡንቱንቱ ቢታ አኪደ፥ ሮቤላነ ጋዳ ዛራቱ ቃይ ምናሰ ዛርያፐ ባጋዉ ላታ ኦደ እሜዶ።✝29:8 ፓይ. 32:33

9 "ህንተ ኦይቆባይነ የባይ ህንተንቶ አንጀታና ማላ፥ ሀ ጫቁዋ ቃላቱዋ አማነቲደ ፖልተ። 10 ሀቼ ህንተ ኡባይ፥ ዛርያ ካፓቱ፥ ጭማቱ፥ ሱንቱነ እስራኤልያ አሳይ ኡባይ ሀዋን መና ጎዳ ስንን፥ 11 ህንተ ናናቱዋና፥ ህንተ ማጫ አሳና ህንተ ግዶን ደእያ ካረ ቢታ አሳናነ ህንተ ሶን ም ቆርያነ ሃ ትክያ ኦሳንቻቱዋና እትፐ፥ ሀዋን ኤቄድታ። 12 መና ጎዳና፥ ህንተ ጾሳና፥ ቃላ ጫቁዋ ገላናዉ፥ መና ጎዳና ጫቁዋን ማዬዳዋ ፖላናዉ ጊጊደ ሺቄድታ። 13 መና ጎዳይ ህንተና ባረ አሳ ኦደ ምንሳና፤ ህንተንቶነ በን ህንተ ማይዛ አዋቶ፥ አብራሃማዉ፥ ይሳቃዉነ ያቆባዉ ገሌዳ ጫቁዋ ቃላዳን፥ እ ህንተንቶ ጾሳ ግዳናዋ። 14 ታን ሀ ጫቁዋ ሚኖ ቃላ ጫቁዋ ኡዳ ዎያዌ ህንተ ጻላላና ግዲደ፥ 15 ሀቼ ሀዋን ኑናና መና ጎዳ ኑ ጾሳ ስንን ኤቄዳ ኑ ኡባናነ ስንናዉ ያና ኑ የለታ ኡባና ዎይ።

16 "ኑን ግብጼን ዋን ደኤደንቶነ ቃይ ሀዋ ጋካናዉ፥ ኦግያን ደእያ ካዉተቱዋ ግዱዋና ዋን አደ ዬደንቶ ኤሪታ። 17 ኡንቱንቱ ግዶን ደእያ ቱና ኤቃ፥ ማሴዳ ም፥ ሹቻ፥ ብራነ ዎርቃ ኤቃ ምስለቱዋ በኤድታ። 18 ሀ ህንተፐ ኦንነ አቱማዋ ግድና ማጫዋ ግድና፥ እት ጎልያ አሳ ግድና ዛረ ግድና፥ መና ጎዳፐ፥ ኑ ጾሳፐ፥ ሸርእ ጊደ፥ ሀራ ካዉተቱዋ ጾሳቶ ጎይነናዳን ናገትተ። ሄዋ ኦያ አሳይ ጫምያነ ዎያ አይፍያ አይፍያ ም ጻጱዋ ግዳናዋ።✝29:18 እብራ. 12:15

19 "ሀ ጫቁዋ ቃላ ስሲደ፥ ባረ ዎዛናን፥ ‘ታ ሸንያን ታን ቦፐካ፥ አያ መቱነ ባዋ’ ያጊደ ባረና ጭሞፐ፥ ሄዋ ማላ አሳይ ሎኦቱዋ ቦላነ ኢታቱዋ ቦላ ባሻ አሀና። 20 መና ጎዳ ሀንቁነ ቃናቲ ሄዋ ማላ አሳ ቦላ ኤጽ ከሳናፐ አትና፥ መና ጎዳይ አ ማረና። ሀ ማጻፋን ጻፈቴዳ ሸቃ ኡባይ አ ቦላ ያና፤ ሳሉዋፐ ጋርሳ ባጋፐ አ ሱን መና ጎዳይ ይሳና። 21 መና ጎዳይ ሀ ህግያ ማጻፋን ጻፈቴዳ ሸቃ ጫቁዋዳን ሄ አሳ እስራኤልያ አሳፐ ሻኪደ ይሳና።

22 "ስንፐ ይያ የለታይ፥ ህንተ ዛሪነ ሃኮ ደርያፐ ይያ ሀራ ቢታ አሳይ መና ጎዳይ ህንተ ቦላ አሄዳ ቦሻነ ሀርግያ በአና። 23 ቢታ ኡባይ ዲንያንነ ማጽንያን ካመቲደ፥ አያ ጎአነ እመናዋ ግዳናዋ፤ አያነ ዘራናዉነ ሞክሳናዉ ዳንዳየተና፤ እን ማታይ ምይ ድጨና። መና ጎዳይ ባረ ሀንቁዋን ይሴዳ ሶዶማዳንነ ጋሞራዳን፥ አዳማዳንነ ጻቦይማ ካታማቱዋዳን ሀናና።✝29:23 ዶመ 19:24-25 24 ካዉተ ኡባይ ሀዋዳን ያጋና፤ ‘መና ጎዳይ ሀ ጋድያን ሀዋ ማላባ አያዉ ኦዴ? ሀ ዎልቃማ ሀንቁዎ ጋሶ ግዴዳባይ አዬ?’ ያጋና።

25 "አሳይ ዛሪደ፥ ‘ኡንቱንቱ መና ጎዳይ፥ ኡንቱንቱ አዎቱዋ ጾሳይ፥ ኡንቱንታ ግብጼፐ ከስያ ዎደ፥ ኡንቱንቱና ገሌዳ ጫቁዋ ቃላ መንዳ ድራሳ። 26 ቃይ ኡንቱንቱ ቢደ፥ ኤረና ጾሳቶነ እ ኡንቱንታ ጎይኖፕተ ጌዳ ጾሳቶ ጎይኔድኖ። 27 ሄዋ ድራዉ፥ መና ጎዳይ ሀንቀቲደ፥ ሀ ማጻፋን ጻፈቴዳ ሸቃ ኡባ ኡንቱንቱ ቦላ አሄዳ። 28 መና ጎዳይ ዎልቃማ ሀንቁዋ ሀንቀቲደ፥ ኡንቱንቱ ጋድያፐ ኡንቱንታ ሾዲደ፥ ሀዋዳን ሀራ ቢታ የደርሴዳ’ ያጋና።

29 "ጹራ የዎቱ መና ጎዳ ኑ ጾሳሳ፤ ሽን ኑን ሀ ህግያ ቃላ ኦናዳን፥ ቆንጬዳ የዎቱ መናዉ ኑሳነ ኑ ናናቱዋሳ።