ዛረዋ 9

አሳይ አዛዘተናን እጼዳዋ

1 "ህንተኖ እስራኤልያ አሳዉ ስስተ፤ ህንተ ህንተፐ ግታትያነ ዎልቃምያ ካዉተቱዋ፥ ቃይ ዩሹዋ ግምቢ ሳሉዋ ጋኬዳ ዎልቃማ ካታማቱዋካ ላታናዉ ሀች ዮርዳኖሳ ፕኒታ። 2 ሄ ጋድያን ደእያ አሳይ ምኖነ አዱሳ፤ ኡንቱንቱ፥ ‘ኦንነ ኡንቱንቱና ኤቀታናዉ ዳንዳየና አናቀ ዛራቱዋ’ ጊሽና፥ ህንተ ስሴድታ። 3 ሽን ምያ ታማዳን ህንተፐ ስንና ብያዌ መና ጎዳ ህንተ ጾሳ ግድያዋ ሀች ኤርተ። እ ኡንቱንታ ይሳናነ ህንተ ስንን ኡንቱንታ ካዉሻና። መና ጎዳይ ህንተንቶ ጌዳዋዳን ህንተ ኡንቱንታ የደርሲደ ከሳናነ ባሱዋናካ ይሳና።

4 "መና ጎዳይ ህንተ ጾሳይ ኡንቱንታ ህንተ ስንፐ የደርሴዳዋፐ ጉይያን፥ ህንተ ህንተ ዎዛናን፥ ‘ኑን ጽሎ ግድያ ድራዉ፥ ሀ ቢታ ኑን ላታና ማላ፥ መና ጎዳይ ኑና ገልሴዳ’ ያጎፕተ። መና ጎዳይ ኡንቱንታ ህንተ ስንፐ የደርሲደ ከስያዌ፥ ኡንቱንቱ ኢታ ግድያ ግሻሳ። 5 ህንተ ኡንቱንቱ ቢታ ላታናዉ ገልያዌ ህንተ ጽሎነ ሱረ ግድያ ድራሳ ግደና፤ ሽን ጾሳይ ህንተ ጾሳይ ኡንቱንታ ህንተ ስንፐ የደርስያዌ ሀ ካዉተቱ ኢታ ግድያ ድራሳነ በን ህንተ ማይዛ አዋቶ፥ አብራሃማዉ፥ ይሳቃዉነ ያቆባዉ ጫቄዳ ቃላ ናጋናሳ። 6 ስም ሄዋ ግዶፐ ህንተ ሀዋ አኬክተ፤ መና ጎዳይ ህንተ ጾሳይ ሀ ሎኦ ቢታ ህንተና ላትስያዌ ህንተ ጽሎተ ግሻሳ ግደና፤ አያዉ ጎፐ፥ ህንተ ሞርግያ ዞዱ ጌዳ አሳ።

7 "ህንተ መና ጎዳ ህንተ ጾሳ መላ ቢታን ዎት ሀንቀድተንቶ ዶጎፕተ፤ ህንተ ግብጼ ጋድያፐ ከሴዳ ጋላሳፐ ዶሚደ፥ ሀች ሀ ሳኣ ጋኬዳ ጋላሳይ ጋካናዉ፥ መና ጎዳ ቦላ ማካሌድታ። 8 ሲና ደርያ ቦላካ መና ጎዳይ ህንተና ይሳናዉ ደንዳና ጋካናዉ፥ ህንተ መና ጎዳ ሀንቀድታ። 9 መና ጎዳይ ህንተናና ጫቀቴዳ ጫቁ ጻፈቴዳ ማሰቴዳ ሹቻቱዋ አካናዉ ታን ደርያ ሁጲያ ከሴዳ ዎደ፥ ሄዋን ካ ሜናንነ ሃ ኡሸናን፥ ኦይታሙ ጋላሳነ ኦይታሙ ቃማ ጋምኣድ።✝9:9 ከሳ 24:18 10 ሄዋፐ ጉይያን፥ ጾሳ ብራያን ጻፈቴዳ ላኡ ማሰቴዳ ሹቻቱዋ መና ጎዳይ ታዉ እሜዳ። ሄ ማሰቴዳ ሹቻቱ ቦላ ህንተ ሺቁዋ ኦዳ ጋላስ ደርያ ቦላን ታማ ግዶን ግዲደ፥ መና ጎዳይ ህንተንቶ ሃሳዬዳ ቃላቱ ኡባይ ጻፈት ኡቴድኖ። 11 ሄ ኦይታሙ ጋላሳፐነ ኦይታሙ ቃማፐ ጉይያን፥ መና ጎዳይ ባረ ጫቁ ጻፈቴዳ ላኡ ማሰቴዳ ሹቻቱዋ ታዉ እሜዳ።

12 "ሄዋፐ ጉይያን፥ መና ጎዳይ ታና ሀዋዳን ያጌዳ፤ ‘ሀዋፐ ኤለካ ዎ፤ አያዉ ጎፐ፥ ኔን ግብጼፐ ከሴዳ ነ አሳይ ቱን ክቼዳ፤ ታን ኡንቱንታ አዛዜዳ አዛዙዋፐ ኤለካ ዎራ ስሚደ፥ ሲልሲደ መዳ ኤቃ ባረንቶ ጎይናናዉ ጊግሴድኖ’ ያጌዳ።

13 "መና ጎዳይ ቃይካ ታና፥ ‘ታን ሀ አሳ በኣድ፤ ኡንቱንቱ ቱሙካ ሞርግያ ዞዛ አሳ። 14 ያቶፐ፥ ታን ኡንቱንታ ይሳናዋነ ኡንቱንቱ ሱንካ ሳሉዋፐ ጋርሳ ባጋፐ ቁጫናዋ ታና ድጎፓ። ያታደ ኔና ኡንቱንቱፐ ምንያነ ጮራትያ ካዉተ ከሳና’ ያጌዳ።

15 "ታን ጫቁዋ ቃላይ ጻፈቴዳ ላኡ ማሰቴዳ ሹቻቱዋ ላኡ ኩሽያን ቶካደ ደርያፐ ዎአድ፤ ሄ ዎደ ደርያ ቦላ ታማ ላጩ ቤቴ። 16 ታ ጼልያ ዎደ፥ ህንተ መና ጎዳ ህንተ ጾሳ ቦላ ናጋራ ኦዳዋ በኣድ፤ ህንተ ሲልሲደ መዳ ኮሩማ ምስልያ ህንተንቶ ኤቃ ኦደ ጊግሴድታ። ህንተ መና ጎዳይ ህንተና አዛዜዳ ኦግያፐ ኤለካ ዎራ ስሜድታ። 17 ያትና፥ ታን ታ ላኡ ኩሽያን ኦይቄዳ ላኡ ማሰቴዳ ሹቻቱዋ ኦላደ፥ ህንተ ጼልሽን መንድ።

18 "ሄዋፐ ጉይያን፥ ታን ህንተ ኦዳ ናጋራ ኡባ ድራዉ፥ ሄዌነ መና ጎዳ ሀንቀናዉ ህንተ አ ስንን ኢታባ ኦዳ ድራዉ፥ ካሰዋዳንካ ኦይታሙ ጋላሳነ ኦይታሙ ቃማ መና ጎዳ ስንን ጉፋናደ ጋምኣድ፤ ሄ ዎደ ታን ቁማ ማበይከ፤ ሃካ ኡሻበይከ። 19 መና ጎዳይ ህንተ ቦላን ሀንቀቴዳ አ ኤጽያ ሀንቆ ታን ያያድ፤ አያዉ ጎፐ፥ እ ህንተና ይሳናዉ ጊጌዳ፤ ሽን መና ጎዳይ ዛረደካ ታዉ ስሴዳ።✝9:19 እብራ. 12:21 20 ቃይ መና ጎዳይ አሮናካ ይሳናዉ ሎይ ሀንቀቴዳ፤ ያትና፥ ሄ ዎደ ታን አሮናዉካ ዎሳድ። 21 ታን ህንተ መዳ ሄ ናጋራን ኩሜዳ ኮሩማ ምስልያ አካደ፥ ታማን ጹጋድ፤ ያታደ አ ክንቼሬደ እ ባናዳን ሊቃና ጋካናዉ ጋጫድ፤ ሄ ባና ደርያፐ ጎግያ ሃን ኦላድ።

22 "ህንተ ቃይካ ታብኤራን፥ ማሳሃንነ ቅብሮተ-ሀታዋን (አሙዋ ዱፉዋን) መና ጎዳ ሀንቀድታ።✝9:22 ፓይ. 11:3፣ 34፤ ከሳ 17:7 23 መና ጎዳይ ህንተና፥ ‘ቢተ፥ ታን ህንተንቶ እሜዳ ቢታ ላትተ’ ያጊደ፥ ቃዴሳ-ባርነፐ የዴዳ ዎደካ፥ ህንተ መና ጎዳ ህንተ ጾሳ አዛዙዋ እጺደ ማካሌድታ፤ አን አማነትበይክታ ዎይ አ ቃላዉካ አዛዘትበይክታ።✝9:23 ፓይ. 13:25—14:38፤ ዛረ. 1:21፣ 26፤ እብራ. 3:16 24 ታን ህንተና ኤሮደፐካ ዶሚደ፥ ህንተ መና ጎዳ ቦላን ማካላንቻ።

25 "መና ጎዳይ ህንተና ይሳና ጌዳ ድራዉ፥ ታን ሄ ኦይታሙ ጋላሳነ ኦይታሙ ቃማ መና ጎዳ ስንን ጉፋናደ ጋምኣድ። 26 ታን መና ጎዳ ሀዋዳን ያጋደ ዎሳድ፤ ‘አቤት ኡባ ሞድያ መና ጎዳዉ፥ ኔን ነ ዎልቃማ ዎልቃን ዎዜዳነ ነ ምኖ ኩሽያን ግብጼፐ ከሴዳ፥ ነዉ ላታ ግድያ ነ አሳ ይሶፓርኪ! 27 ነ ቆማቱዋ፥ አብራሃማ ይሳቃነ ያቆባ ቆፓ፤ ሀ አሳ ሞርግያ ዞዱ ኦያዋ፥ ኡንቱንቱ ኢታተነ ኡንቱንቱ ናጋራ ፓይዶፓ። 28 ሄዌ ዮፐ፥ ኔን ኑና ያፐ ከሴዳ ግብጼ ቢታ አሳይ፥ "መና ጎዳይ ኡንቱንታ ገልሳና ጌዳ ቢታ ገልሳናዉ ዳንዳይቤና ድራዉነ ኡንቱንታ እጼዳ ድራዉ፥ መላ ቢታን ዎና ጊደ ከሴዳ" ያጋና። 29 ግዶ ሽን፥ ሀ አሳይ ኔን ነ ዎልቃማ ዎልቃንነ ነ ምጨቴዳ ቀስያን ግብጼፐ ከሴዳ ነ ላታ ግድያ ነ አሳቴ’ ያጋድ።