ዛረዋ 23

አሳ ማባራፐ ሻክያ ሀኖታ

1 "ሳንግሰቴዳ ዎይ ቃራተቴዳ አቱማ አሳይ፥ መና ጎዳ ሺቁዋ ግዶን ቤቶፖ።

2 "ሻርሙጻን የለቴዳ አሳይ መና ጎዳ አሳ ማባራ ገሎፖ፤ ሀራይ አቶ ቢደ ታማን የለታ ጋካናዉካ፥ አ ዛርያፐ ኦንነ መና ጎዳ አሳ ማባራ ግዶ ገሎፖ።

3 "አሞና አሳ ግድና፥ ዎይ ሞኣባ አሳ ግድናካ፥ መና ጎዳ አሳ ማባራ ገሎፖ፤ ሀራይ አቶ ቢደ ታማን የለታ ጋካናዉካ፥ ኡንቱንቱ አሳ ግዴዳ ኦንነ መናዉካ መና ጎዳ አሳ ማባራ ገሎፖ።✝23:3-5 ናህ. 13:1-2 4 አያዉ ጎፐ፥ ህንተ ግብጼፐ ከሲደ ሄመትሽን፥ ኡንቱንቱ ህንተና ካናነ ሃና ሞክበይክኖ። ሄዋዳንካ፥ ማስጰጾምያን ፓቶራ ግያ ካታማን ደእያ ብኦራ ናኣ ባላም ህንተና ሸቃና ማላ ቃጻሬድኖ።✝23:4 ፓይ. 22:1-6 5 መና ጎዳይ፥ ህንተ ጾሳይ፥ ባላም ግያዋ ስሳናዉ ኮይቤና፤ አ ሸቃ ህንተንቶ አንጆ ላሜዳ። አያዉ ጎፐ፥ መና ጎዳይ ህንተ ጾሳይ ህንተና ሲቄ።✝23:5 ፓይ. 23:7—24:9 6 ህንተ ደኦ ላይ ኡባን መናዉካ ኡንቱንቱ ሳሮ ደአናዳንነ ኡንቱንቱ ዱረታናዳን አሞቶፕተ።

7 "ህንተዉ ኡንቱንቱ ዳቦ ግድያ ድራዉ፥ ኤዶማቱዋ ካደ እጾፕተ፤ ቃይ ግብጼቱዋካ እጾፕተ። አያዉ ጎፐ፥ ህንተ ኡንቱንቱ ጋድያን በተ ግዲደ ደኤድታ። 8 ኡንቱንቶ ሄዘን የለታ ናናይ መና ጎዳ አሳ ማባራ ገላናዉ ዳንዳዪኖ።

ኦላዉ ዱንካኔዳ ሳኣ ዎጋዳን ጌሻን ናጉሳ

9 "ህንተ ህንተ ሞርክያ ኦላናዉ ከሲደ እትሳን ካምቡዋ መ ዎደ፥ ህንተና ቱንስያዋፐ ኡባፐ ሻከትተ። 10 ቃማ አኩሙዋን ማጫ አሳና ጋከቴዳዋ ኤርስያ እርጻባይ አን ደእያ አይ አሳይነ ደኦፐ፥ ዱንካኔዳ ሳኣፐ ጋጻ ከሲደ ያን ጋምኦ። 11 ሳአይ ኦማርስያ ዎደ፥ ባረ ቦላ ሜጨቲደ፥ ለለምእያ ዎደ ዱንካኔዳሳ ስሞ።

12 "ህንተ ሼሻዉ ኡትያሳ ዱንካኔዳ ሳኣፐ ካረና ጊግስተ። 13 ሼሻዉ ኡትያሳ ቦካናዉ ዞሩዋ ህንተ ኦላ ሚሻና ጋ ኦይቂተ፤ ሼሻዉ ኡት ስሚደ፥ ኦላን ቢታ ዛርተ። 14 አያዉ ጎፐ፥ መና ጎዳይ ህንተ ጾሳይ ህንተና ናጋናዉነ ህንተ ሞርከቱዋ ህንተ ኩሽያን አ እማናዉ፥ ህንተ ሄራን ያነ ሃነ ሀመቴ። ሄዋን እ ሸነይያባ አያነ በኢደ፥ ህንተፐ ዎራ ስመናዳን፥ ህንተ ሄራን ጌሻ ግዳናዉ ኮሼ።

ዱማ ዱማ ህገቱዋ

15 "ባረ ጎዳፐ ባቃቲደ፥ ኔኮ ዬዳ አይልያ ዛራደ አ ጎዳዉ እሞፓ። 16 እ ህንተ ካታማቱዋፐ ባረ ኮዬዳዋን ደኦ፤ አ ኡቁኖፕተ።

17 "እስራኤልያ አሳፐ ኦንነ አቱማ ግድና፥ ማጫ ግድናካ፥ አላጋ ጾሳዉ ጎይንያዋንቱ ኦያዋዳን፥ ሻርሙጽያዋ ግዶፖ።✝23:17 ዎጋ 19:29 18 ሄዋዳንካ፥ አቱማዋ ግድና፥ ማጫውኖ ግድና፥ ሻርሙጻን ደሜዳ ሚሻ ሺቁዋ ጋናዉ መና ጎዳ ህንተ ጾሳ ጎልያ አሆፕኖ። አያዉ ጎፐ፥ ኡንቱንቱ ላኡዋካ መና ጎዳይ ህንተ ጾሳይ ሻቴ።

19 "ነ ዛረ ግድያ እስራኤልያ አሳዉ ሚሻ፥ ካ ግድና ሀራባ ታልአደ ድቻ አኮፓ።✝23:19-20 ከሳ 22:25፤ ዎጋ 25:36-37፤ ዛረ. 15:7-11 20 ሀራ ቢታ አሳፐ ድቻ ኦቻናዉ ዳንዳያሳ፤ ሽን ኔን ላታናዉ ገልያ ጋድያን ኔን ኦያባን ኡባን መና ጎዳይ ነ ጾሳይ ኔና አንጃና ማላ፥ ነ ዛረ ግድያ እስራኤልያ አሳዉ ድቻዉ ታልኦፓ።

21 "መና ጎዳዉ፥ ነ ጾሳዉ፥ እማናዉ ገፔዳዋ እማናዉ ጋምኦፓ። መና ጎዳይ ነ ጾሳይ ኔን ገፔዳዋ ኩመንን ኔፐ ኮይያ ድራዉ፥ ፖላና ዮፐ፥ ነዉ ናጋራ ግዳና።✝23:21 ፓይ. 30:1-16፤ ማቶሳ 5:33 22 ሽን ኔን ገፓና ዮፐ፥ ሄዋን ነዉ ናጋራይ ባዋ። 23 መና ጎዳዉ፥ ነ ጾሳዉ፥ እማና ጋደ ኔን ዶናን ሃሳዬዳዋ ነ ዶሱዋን እማና ጌዳ ድራዉ፥ ነ እንጻርሳን ሃሳዬዳዋ ፖላ።

24 "ነ ሾሩዋ ዎይንያ ግዱዋና አያ ዎደ፥ ዎይንያፐ ነ ኮዬዳ ኬና ማፐ አትና፥ አፐ አያነ ነ ኦይቄዳ ሚሻን የጎፓ። 25 ነ ሾሩዋ ሾይቃና ካንያ ዎደ፥ ሄ ሾይቃን ደእያ ትሻፐ ዱደ ማፐ አትና፥ ነ ሾሩዋ ካ ባጫን ጫካደ ጎለ አፎፓ።