ዛረዋ 25

1 "ላኡ አሳቱ ዋላቀቲደ ፕርዳ ጎልያ ዮፐ፥ ዳናቱ ጌሻ ነ ልከ ጊደ፥ ናቄዳዋ ነ ባይዛንቻ ጊደ ፕርድኖ። 2 ባይዛንቻይ ዋ በስያዋ ግዶፐ፥ ትራን ግስሲደ ዞክያ ሾጫናዉ ዳናይ አዛዞ፤ ያቶፐ ባይዛንቻይ ዳና ስንን ባረ ባይዙዋ ኬና ሾጨቶ። 3 እ ኦይታሙዋ ጋካናዉ ሾጨቶፐ አትና፥ ሄዋፐ ዳሩዋ ሾጨቶፖ። ሄዋፐ ዳሩዋ አ ሾጮፐ፥ ነ እሻይ ነ ስንን ካዉሻና።✝25:3 2 ቆሮ. 11:24

4 "ኡዱማን ካ የያ ቦራ ዶና ቃቾፓ።✝25:4 1 ቆሮ. 9:9፤ 1 ጽሞ. 5:18

ሀይቄዳ እሻዉ ኦናዉ በስያባቱዋ

5 "እትፐ ደእያ እሻቱዋፐ እቱ ናኣ የለናን ሀይቆፐ፥ አ ማቻታ ሀራ ባደ ገሉፑ፤ እዝ አስና እሻይ እዞ አኮ፤ እዝዉ ኮሽያዋ ፖሎ።✝25:5-6 ማቶሳ 22:24፤ ማር. 12:19፤ ሉቃሳ 20:28 6 ያቶፐ ሀ ሀይቄዳዋ ሱንይ እስራኤልያፐ ፕተት የናዳን፥ አ ኮይሮ የልያ አቱማ ናአይ ሀ ሀይቄዳዋ ሱንን ጼገቶ።

7 "ግዶ ሽን፥ እ ባረ እሻ ማቻቶ አካናዉ ኮያና ዮፐ፥ እዛ ካታማ ፐንግያን ኡቴዳ ጭማቱዋኮ ባደ፥ ‘ታ አስና እሻይ ባረ እሻ ሱንይ እስራኤልያን ደአናዉ ኮይቤና፤ ታና አኪደ፥ ታዉ ኮሽያዋ ኩንናን እጼዳ’ ያጋደ ማጋኑ።✝25:7-10 ኡሩቶ 4:7-8 8 ካታማ ጭማቱ አ ጼጊደ ኦችኖ፤ ሀእካ፥ ‘ታን እዞ አክከ’ ጊደ እጾፐ፥ 9 ሄ ሀይቄዳዋ ማቻቶ ጭማቱዋ ስንን አኮ ሺቃደ፥ አ ገድያ ጫማፐ እቱዋ ከሳደ፥ አ ሶምኡዋን ጩቻ ጩቻደ ሀዋዳን ያጉ፤ ‘ባረ እሻዉ ዘረይ ደአናዉ ኮየና አሳ ቦላ፥ ሀዋ ማላ ካዉሻይ ጋካናዉ በሴ’ ያጉ። 10 አ ዛሪ እስራኤልያን፥ ‘ጫማ ከሴዳዋንቱ ሶያ’ ጌተት ጼገቲደ ደአና።

ሀራ ህገቱዋ

11 "ላኡ አሳቱ ዋትሽን፥ እቱዋ ማቻታ ያደ፥ ባረ አስና ሾጭያዋ ኩሽያፐ አሻናዉ፥ ባረ ኩሽያ የዳደ ህንኩዋ አቱማተ ኦይቆፐ፥ 12 እዝዉ አይነ ቃረተናን እ ኩሽያ ቃንጽተ።

13 "ነ ኬሻ ግዶን ዴጾነ ካዉሻ ግዴዳ ላኡ ሚዛናቱ ደኦፕኖ።✝25:13-16 ዎጋ 19:35-36 14 ነ ሶን ዳርሲደነ ጉደ ልክያ ላኡ ማክያባይ ደኦፖ። 15 መና ጎዳይ ነ ጾሳይ ነዉ እምያ ጋድያን አዱሳ ላይ ነ ደአናዳን ኩመንነ ልከ ሚዛናይነ ማክያባይ ነዉ ደኦ። 16 አያዉ ጎፐ፥ መና ጎዳይ ነ ጾሳይ ሄዋ ማላባ ኦደ፥ ባለያ አሳ ኡባ ሻቴ።

አማሌቃቱዋ ዎናዉ እመቴዳ አዛዙዋ

17 "ህንተ ግብጼፐ ከሲደ ቢደ ደእሽን፥ አማሌቃቱ ህንተ ቦላ ኦዳዋ ሀሳይተ።✝25:17-19 ከሳ 17:8-14፤ 1 ሳሜላ 15:2-9 18 ኡንቱንቱ ጾሳዉ ያየና አሳ፤ ህንተ ኦግያን ህንተናና ኤቀቴድኖ። ህንተ ሄመትሽን፥ ዳቡሪደ ጉየ አቴዳ አሳ ኡባ ዎድኖ። 19 ሄዋ ድራዉ፥ መና ጎዳይ ህንተ ጾሳይ ህንተና ሄ ቢታ ላትሲደ፥ ህንተ ዩሹዋን ደእያ ሞርከቱዋ ኡባፐ ህንተና ሸምፕስያ ዎደ፥ ሀ ጋድያን ኡንቱንታ ሀሳይያ አሳይ ያና ጋካናዉ፥ አማሌቃቱዋ ኡባ ሳሉዋ ጉፋንፐ ይስተ፤ ሄዋ ኦናዋ ሙለካ ዶጎፕተ።