1 "ሄዋፐ ጉይያን ኑን ስሚደ፥ ባሳነ አፍያ ኦግያና ከሲደ፤ ያትና፥ ባሳነ ቢታ ካቲ ኦግ ባረ ኦላንቻቱዋ ኡባና ኤድራአ ግያ ካታማን ኑናና ኦለታናዉ ከሴዶ። 2 ሽን መና ጎዳይ ታና፤ ‘አዉ ያዮፓ! አያዉ ጎፐ፥ ታን አ፥ አ ኦላንቻቱዋ ኡባናነ አ ቢታና ነ ኩሽያን አደ እማድ። ሀሰቦናን ኡቲደ ካተቴዳ አሞረቱ ካትያ ስሆና ቦላ ኦዳዋዳን፥ ኔን አ ቦላካ ኦና’ ያጌዳ።

3 "ሄዋ ድራዉ፥ መና ጎዳይ ኑ ጾሳይ ባሳነ ቢታ ካትያ ኦጋነ አ አሳ ኡባ ኑ ኩሽያን አደ እሜዳ፤ ኑን ኡንቱንቱፐ እቱዋነ አሸናን ዉርስ ዎዶ። 4 ሄ ዎደ ኑን አ ካታማቱዋ ኡባ ኦይቄዶ፤ ኑን ኦይቂቤና እት ካታማይካ ባዋ፤ ሄዋንቱካ ባሳነ ካትያ ኦግ አርጎባ ጋድያን አይስያ ኡሱፑን ታሙ ካታማቱዋ። 5 ሀ ካታማቱ ኡባይካ አዱሳ ግምቢያን ድረቴዳዋንታነ ፐንግያናነ ጎርድያ ምና ደእያዋንታ። ቃይ ግምቢያ ድርሳይ ባይና ሎይ ዳሮ ሞቱካ ደኢኖ። 6 ሀሰቦና ቢታ ካትያ ስሆና ቦላ ኦዳዋዳን፥ ኑን ኡንቱንታ ኡባና ይሴዶ። ኡንቱንቱ ካታማቱዋ ኡባ፥ ኡንቱንቱን ደእያ አቱማዋና ማጫዋነ ናናቱዋናካ ሙለ ይሴዶ። 7 ሽን መህያ ኡባነ ካታማቱዋፐ ቦንቄዳ ኦሞዱዋ ኦደ፥ ኑዉ አኬዶ።

8 "ሄ ዎደ ኑን አርኖና ሻፋፐ ቢደ ሄርሞነ ደርያ ጋካናዉ ደእያ ቢታ ዮርዳኖሳ ሻፋፐ አዋይ ዶልያ ባጋና ደእያዋ ሄ ላኡ አሞረ ቢታ ካተቱዋፐ አኬዳ። 9 (ሲዶና ቢታ አሳይ ሄርሞነ ደርያ ስርዮነ ደርያ ጊደ ጼጊኖ፤ አሞረ ቢታ አሳይ ቃይ ሳኒራ ጊደ ጼጊኖ።) 10 ኑን ደምባ ጋድያን ደእያ ካታማቱዋ ኡባ፥ ጋላኣደ ቢታ ኡባ፥ ባሳነ ቢታ ኡባነ ባሳነ ጋድያን ኦግ ሞድያ ሳላካነ ኤድራአ ካታማቱዋ ጋካናዉ ደእያ ሳኣ ኦይቄዶ። 11 (ራፋየቱዋፐ አቴዳዌ ባሳነ ቢታ ካትያ ኦጋ ጻላላ። አ አርሳይ ብራታ አርሳ፤ ሄ አርሳይ ሀቼ ጋካናዉካ ራባ ጌተትያ አሞናቱዋ ካታማን ደኤ፤ አዉ ጌሳይ ኡዱፑን ዋ፤ ጎምፓይካ ኦይዱ ዋ።)

12 "ሄ ቢታ ኑን ላቴዳዋፐ ጉይያን፥ አርኖና ሻፋ ዶናን ደእያ አሮኤራ ካታማፐ ዶሚደ ደእያ ሳኣነ፥ ደረትያ ጋላኣደ ጋድያፐ ባጋ አ ካታማቱዋናካ ሮቤላ ዛረቶነ ጋዳ ዛረቶ ታን እማድ። 13 ጋላኣደፐ አቴዳዋነ ኦግ ሞድያ ባሳነ ቢታ ኡባ፥ ሄዌካ አርጎባ ካዉተ ቃይ ምናሰ ዛርያፐ ባጋቶ እማድ። (ሄ ባሳነ ቢታይ ኡባይ ራፋየቱዋ ቢታ ጌተት ጼሰቴዳ። 14 ምናሰ ዛርያፐ ያኢር፥ ኩመን አርጎባ ቢታ ላቴዶ፤ ሄዌካ ጋሹራቱነ ማእካቱ ቢታ ጋጻ ጋካናዉ ደእያ ባሳነ ቢታ። እ ቄር ካታማቱዋ ባረ ሱንን ጼሰታናዳን ኦዳ፤ ሄዋ ድራዉ፥ ኡንቱንቱ ሀቼ ጋካናዉ፥ ሀቦት-ያኢራ ካታማቱዋ ጌተት ጼሰቲኖ።)

15 "ቃይ ጋላኣደ ቢታካ ምናሰ ዛረ ግድያ ማኪራሳዉ እማድ። 16 ሮቤላነ ጋዳ ዛርያዉ ጋላኣደፐ ቢደ አርኖና ሻፋ ማታ ጋካናዉ ደእያ ቢታ እማድ። ገድሳ ባጋና ኡንቱንቶ አርኖና ሻፋዉ ባጋይ ዛዋ፤ ቃይ ሁጲሳ ባጋና አሞናቱዋ ቢታ ጋጻ ግድያ ያቦቃ ሻፋይ ዛዋ። 17 አዋይ ዉልያ ባጋና፥ ኡንቱንቱ ዛዋይ አራባን ደእያ ዮርዳኖሳ ሻፋ ጋኬ፤ ሄዌካ ጋሊላ አባፐ ዶሚደ ፕስጋ ደርያ ጻጱዋን ደእያ ሀይቁዋ አባ፥ ሄዌነ ማጽንያ አባ ጋካናሳ።

18 "ሄ ዎደ ታን ህንተና ሀዋዳን ያጋደ አዛዛድ፤ ‘መና ጎዳ ህንተ ጾሳይ ሀ ቢታ ህንተ ላታናዳን ህንተንቶ እሜዳ። ስም ህንተንቶ ደእያ ቶራንቻ አሳ ኡባ ኦላ ሚሻ ግጽሲደ፥ ህንተ እሻቱዋ ግድያ እስራኤልያ አሳፐ ስንና ኦለታናዉ አተ።✝ 19 ህንተዉ ዳሮ መሂ ደእያዋ ታን ኤራይ፤ ሄዋ ድራዉ፥ ህንተ ማቼቱ፥ ህንተ ጉ ናናይነ ህንተ መሂ ታን ህንተንቶ እሜዳ ካታማቱዋን ደእሽኖ። 20 ሄዌነ፥ መና ጎዳይ ህንተና ሸምፕሴዳዋዳን፥ ህንተ እሻቱዋካ ሸምፕሳና ጋካናዉነ፥ ቃይ ዮርዳኖሳ ሻፋ ሄፍንን፥ መና ጎዳይ ህንተ ጾሳይ ኡንቱንቶ እምያ ቢታ ኡንቱንቱ አካና ጋካናሳ። ሄዋፐ ጉይያን፥ ህንተ ሁጲያን ሁጲያን፥ ታን ህንተንቶ እሜዳ ቢታ ስሚታ’ ያጋድ።

21 "ታን ሄ ዎደ ያሳ ሀዋዳን ያጋደ አዛዛድ፤ ‘መና ጎዳይ፥ ህንተ ጾሳይ፥ ሀ ላኡ ካተቱ ቦላ ኦዳዋ ኡባ ኔን ነ አይፍያን በኣዳ፤ ህንተ ኦይቃናዉ ብያ ካዉተቱዋ ኡባ ቦላካ መና ጎዳይ ሄዋዳን ኦና። 22 ህንተ ድራዉ ኦለትያዌ፥ መና ጎዳ ህንተ ጾሳ ግድያ ድራዉ፥ ኡንቱንቶ ያዮፕተ’ ያጋድ።

23 "ሄ ዎደ ታን ሀዋዳን ያጋደ መና ጎዳ ሎይደ ዎሳድ፤✝ 24 ‘ኡባ ሞድያ መና ጎዳዉ፥ ነ ግታተነ ነ ምኖ ኩሽያ ታና፥ ነ ቆማ በሳናዉ ዶማዳ፤ አያዉ ጎፐ፥ ነዋዳን ሀዋ ማላ ኦሶቱዋነ ዎልቃማባ ኦናዉ ዳንዳይያዌ ሳሉዋን ግድና ሳኣን አይ ጾሳይ ደኢ? 25 ጾሳዉ! ታን ባደ ዮርዳኖሳ ሻፋፐ፥ ሄፍንን ደእያ ሄ ሎኦ ደረትያ ቢታነ ሊባኖሳ በአናዳን ታና የዳርኪ!’ ያጋድ።

26 "ሽን መና ጎዳይ ህንተ ጋሱዋን ታና ሀንቀቲደ፥ ታዉ ስሰናን እጼዳ፤ መና ጎዳይ ታና ሀዋዳን ያጌዳ፤ ‘ስም ነዉ ግዳናዋ፤ ሀ የዉዋ ደንደ ላኤን ታዉ ሃሳዮፓ። 27 ሄዋ አጋደ ደንዳ፥ ፕስጋ ደርያ ሁጲያ ከሳ፤ ሄዋን ኤቃደ ቢታዉ አዋይ ዶልያ ባጋ፥ ሁጲሳ፥ ገድሳነ አዋይ ዉልያ ባጋ ነ አይፍያ ደንደ ጼላ። አያዉ ጎፐ፥ ኔን ሀ ዮርዳኖሳ ሻፋ ሙለካ ፕናካ። 28 ማታ ኔን ኢያሱዉ አዛዙዋ እማ፤ አ ጻልሳነ ምን፤ አያዉ ጎፐ፥ እ ሀ አሳ ካለደ ፕንናነ ሀ ኔን በእያ ቢታ እ ኡንቱንታ ላትሳናዋ’ ያጌዳ።

29 "ሄዋ ድራዉ፥ ኑን ቤት-ፓኦራ ካታማ ስንን ደእያ ዛንጋራን ጋምኤዶ" ያጌዳ።