Miquéias 7

እስራኤልያ አሳ ቱናተ

1 አየ አና ታኖ! ታን ቴራይ ማጸት ዉር ክችና ዪደ፥ ዎይንያ ቱራፐነ ባላስያ ምፐ ባረ አሞቴዳዋ ደማናዉ ዳንዳይቤና ኮሻቴዳ ብታንያ ማላ ግዳ ክቻድ። 2 ጾሳ ዶስያ ኬካ አሳይ ጋድያን ሙለካ ባዋ፤ አሳ ጋርሳን ሱረ አሳይ ዬዳ። አሳይ ኡባይ አሳ ሱ ጉሳናዉ ዙጊድ ናጌ፤ ቃይ ኡባይካ ባረ እሻ ግትያን ኦይቃናዉ ካሌ። 3 ኡንቱንቱ ኩሸቱ ላኡካ ኢታባ ኦናዉ ሎህ ኡቴድኖ። ካፑነ ዳናይ ማታይያ ኦቺኖ፤ ዎልቃማ አሳቱ ባረንቱ አሞቴዳዋ ኦዲኖ፤ ኡንቱንቱ ኡባይካ እትፐ ኢታ ኦኖ። 4 ኡንቱንቱ ጋርሳን ኤበሎ ኬካ ግያዌ አጉን ማላ፤ ቃይ ኤበሎ ሱረ ግያዌ ጎምኦርያ ማላ። ጾሳይ ትምቢትያ ኦድያዋንቱ ባጋና ኦዴዳዋዳን፥ እ ባረ አሳ ሙሪያ ጋላሳይ ጋኬዳ፤ ኡንቱንቱ ሻቢረትያ ዎዲካ ሀአ።

5 ነ ሾሩዋ አማኖፓ፤ ነ ላግያካ አማነቶፓ። ኔን ቆማደ አቅያ ነ ማቻትዉካ ኦድያዋካ አኬካደ ኦዳ። 6 አያዉ ጎፐ፥ ናአይ ባረ አዉዋ ካ፤ ናታ ባረ ዳይ ቦላ፥ ናኣ ማቻታካ ባረ ቦሎታት ቦላ ደንድኖ፤ አዎ አዉ ሶ አሳይ ሞርከ ግዴ።✝7:6 ማቶሳ 10:35-36፤ ሉቃሳ 12:53

7 ሽን ታና ግዶፐ፥ ታን ህዶታን መና ጎዳ ጼላሻና፤ ታና አሽያ ጾሳ ታን ናጋሻና፤ ታ ጾሳይ ታዋ ስሳና።

አሳይ ጾሳኮ ስሙሳ

8 ታ ሞርክያዉ፥ ታ መቱዋን ናሸቶፓ። ታን ኩንዶፐካ ደንዳና፤ ታን ማን ኡቶፐካ፥ መና ጎዳይ ታዉ ፖአና። 9 ታን ጾሳ ናቃድ፤ ሄዋ ድራዉ፥ እ ታዉ ሞተቲደ፥ ታ ፕርዳ ከሳና ጋካናዉ፥ ታን አ ሀንቁዋ ዳንዳያና። እ ታና ፖኡዋ ከሳና፤ ታንካ እ አሽያ አሹዋ በአና። 10 ሄ ዎደ ታ ሞርኪካ በአና፤ ቃይ ታና፥ "መና ጎዳይ ነ ጾሳይ ሀቃን ደኢ?" ያግ ያግ ቅሊጭያዌ ዬላ ማያና፤ እ ኦግያን ደእያ ኡርቃዳን የትሽንካ ታን ታ አይፍያን በአና።

11 ህንተኖ፥ እስራኤልያ አሳቶ፥ ህንተ ካታማ ግምቢያ ድርሳቱ ድረትያ ጋላሳይ ያና፤ ሄ ጋላስ ህንተ ዛዋይካ አካና። 12 ሄ ጋላስ ህንተ አሳይ ህንተኮ ስማና። ኡንቱንቱ አሶረ ጋድያፐ፥ ግብጼ ካታማቱዋፐ፥ ኤፍራጺሳ ሻፋ ሄራን ደእያ ሳአቱዋፐነ ቃይ ሃኮ ሳን ደእያ አባቱዋ ዶናፐነ ቃ ደረቱዋፐ ህንተኮ ስማና። 13 ሽን ቢታይ አን ደእያ አሳ ኢታተ ጋሱዋን አሳይ ባይና መላ ግዳና።

መና ጎዳይ እስራኤልያዉ ቃረቴዳ ቃረታ

14 ኔን ነ አሳ፥ አራዳ ቢታይ ዩሹዋን ደእያ ባዙዋን ባረካ ደእያ ነ ቡዞ ዶርሳ ዉድያ ነ ጋትማን ሄማ። ኡንቱንቱ ካሰዋዳንካ ባሳነንነ ጋላኣደን ሄመትኖ።

15 መና ጎዳይ፥ "ህንተ ግብጼ ጋድያፐ ከሴዳ ዎድያዳን፥ ታን ህንተና ማላልስያባ በሳና" ያጌ።

16 ካዉተቱ ኡባይ ሄዋ በኢደ ዬላታና፤ ኡንቱንቱ ዎልቃይካ ሀዳ ግድያ ድራዉ፥ ኡንቱንቱ ዬላቲደ፥ ባረንቱ ዶና ኦይቃና፤ ኡንቱንቱ ሀይይካ ቱላና። 17 ኡንቱንቱ ሾሻዳን፥ ቢታ ላጫና፤ ሳኣና ትራን ጎሸትያ መታቱዋዳን ኮኮሪደ፥ ባረንቱ ጌሱዋፐ ከሳና። ዎልቃማ ዳጋማን መና ጎዳኮ፥ ኑ ጾሳኮ፥ ስማና፤ ኡንቱንቱ ኔና ያዪደ ደአና።

18 ናቁዋ አቶ ያግያዌ፥ ባረ አሳ አቴዳዋንቱ ማካላ ፓይደናዌ ነ ማላ ጾሳይ ኦኔ? ኔን ሀንቁ ሀንቆሽን፥ መናዉ ደአ አጋካ፤ አያዉ ጎፐ፥ ኔን ነ አሳዉ ነ አገና ሲቁዋ በስያዋን ናሸታሳ። 19 ኔን ኑዉ ቃይካ ቃረታና፤ ኑ ናቁዋ ነ ገድያን የና፤ ኤ ኑ ናጋራካ አባ ጪሙዋን ኦላና። 20 ኔን በንፐካ ዶማደ ኑ ማይዛ አዋቶ ገፓደ ጫቄዳዋዳን፥ አብራሃማነ ያቆባ ዛረ ግዴዳ ነ አሳዉ ነ አማነትያዋነ ነ አገና ሲቁዋ በሳና።