1 जब उ ओरागिल, तब वहाँ एकथो अचम्मक चिन्हा रहे, जिहिहे आकाशमे देखे सेकजाइतेहे। काकरेकी जोन्ह्यँक उप्पर ठरह्याइल एकथो जन्नी मनैया देखा परल, जे असिन लुग्गा घालल रहे, जोन लुग्गा सूर्य हस चम्कतेहे। उ अपन कपारीमे एकथो मुकुट घालल रहे, जेम्ने बाह्रथो तोरैयाँ रहिँत। 2 उ जन्नी मनैया पैनाहाँ रहे, और ओकर लरका पैना समय आगिलिस। और ऊ लरका पैना व्यथक कारण चिल्लाइतेहे। 3 आकाशमे एकथो दोसुर चिन्हा देखा परल। एकथो बहुत बरवार सँप्वा रहे, जे शैतान हो। ओकर सातथो कपार रहिस, और ओम्ने दशथो सीङ रहिस, और ओकर सातु कपारीम सातथो मुकुट लगाइल रहिस। 4 ऊ अपन पूँछीलेके स्वर्गक एक तिहाई तोरैयनहे सिमोत्के पृथ्वीमे फेँकादेहल। उ बरवार सँप्वा उ जन्नी मनैयक आघे ठरह्यागिल, ताकि ओकर बच्चाहे जल्मति किल खाजाए। 5 तब उ जन्नी मनैया एकथो छावा लरका पाइल। पर उहिहे सँप्वा खाई नै सेक्लिस। काकरेकी ऊ तुरुन्ते छिनागिलस, और उहिहे परमेश्वरके और हुँकार सिंहासनके आघे नानगिलस। उ लौँदा एकथो लोहक बर्छीलेके सक्कु जातिनके उप्पर राज करी। 6 उ जन्नी भर उजाड़-ठाउँक भित्तर भागल, जहाँ एक हजार दुई सौ साठी दिनसम ओकर पालनपोषण होए कहिके परमेश्वर ओक्रेहे लग ठाउँ तयार करल रहिँत।

7 तब स्वर्गमे लड़ाई होगिल। परमेश्वरके स्वर्गदूतनमेसे एकथो जेकर नाउँ मिखाएल हो। ऊ अपन अधिनमे रहुइया दोसुर स्वर्गदूतनके संग मिलके उ बरवार सँप्वक विरोधमे लड़ाई लरल। और उ बरवार सँप्वा और ओकर दूत मिखाएलके विरोधमे लड़ाई लरलाँ। 8 सँप्वा लड़ाई हारगिल। सँप्वा और ओकर दूतनके स्वर्गमे नै रहे भेटैलाँ। 9 तबेकमारे उ सँप्वा और ओकर दूतनके पृथ्वीमे फेँकागिलाँ। यी बरवार सँप्वा वहे हो, जे बहुत समय आघे सँप्वक रुपमे देखा परल रहे। जिहिहे शैतान या दोष लगुइया फेन कहिजाइत। यी वहे हो, जे यी संसारके मनैनहे धोखा देती आइल बा। 10 तब मै स्वर्गमे असिक कती रहल एकथो बरवार आवाज सुन्नु,

"आब हमार परमेश्वर अपन मनैनहे बँचैहीँ।

आब ऊ अपन शक्तिक प्रयोग करहीँ और रज्वक रुपमे राज करहीँ।

आब हुँकार ख्रीष्ट संसारमे अपन अधिकारके दाबी कर्हिन।

काकरेकी आब शैतान हमार परमेश्वरके हाजिरीमे ठरह्याके हमार विश्वासी संघरियनहे दिनरात दोष नै लगैहिन। काकरेकी ऊ स्वर्गमेसे फेँकागिल बा।

11 हमार विश्वासीन शैतानहे जितदेले बताँ।

ओइने उहिहे पठ्वक खुनके शक्तिसे जित्ले बताँ, जे ओइन्हे ओइन्के पापसे बँचाइक लग मुगिलाँ।

ओइने उहिहे हटादेलाँ, काकरेकी ओइने यी स्वीकार कर्ती रलाँ कि पठ्वा ओइन्के परमेश्वर हुइतिन।

जब ओइन्हे सतागिलिन यहाँतक कि ओइने मुवागिलाँ। पर ओइने स्वीकार करनासे पाछे नै हट्लाँ।

12 तुहुरे सक्कु जाने जेने स्वर्गमे रथो, तुहुरिन्हे आनन्दित हुई परना हो।

पर तुहुरे जेने पृथ्वीमे और समुन्दरमे रथो, तुहुरे एकदम डरलग्तिक विपत भेटैबो।

काकरेकी शैतान तुहुरिन्के थेन तरे आइल बा। और ओकर मन बहुत रिसाइल बतिस।

काकरेकी ऊ जानत कि ओकर थेन काम करक लग धेउर समय नै हुइतिस।"

13 जब उ बरवार सँप्वा अपनहे पृथ्वीमे फेँकाइल महसुस करल। तब ऊ छावा पउइया उ जन्नी मनैयाहे सतैलस। 14 पर परमेश्वर उ जन्नी मनैयाहे बरवार चिल्हरियक दुईथो पख्ना देलाँ। ताकि ऊ उरके उ ठाउँमे जाई सेके, जोन उजाड़-ठाउँमे ओकर लग तयार करगिल रहिस। और वहाँ साह्रे तीन सालसम ओकर रेखदेख हुइलिस, ताकि सँप्वा ओकर थेन पुगे ना सेके। 15 तब सँप्वा उ जन्नीक ओहोँर अपन मुहेमेसे लदियक हस पानी उल्दल, ताकि बहार उहिहे पुहाके लैजाए। 16 पर उ जन्नीक सहायता करक लग पृथ्वी उ पानीहे सोँखलेहल, जोन पानी उ बरवार सँप्वा अपन मुहेमेसे उल्दल रहे। 17 ओकर कारण, बरवार सँप्वा उ जन्नीसे गजब जोरसे रिसागिल। तबेकमारे जन्नीक लर्कनके विरोधमे ऊ लड़ाईक घोषणा करदेहल। अथवा उ मनैनके विरोधमे, जेने परमेश्वरके आज्ञाहे पालन करथाँ, और जेने येशूक सिखाइल सच्चा शिक्षक अनुशरण करनामे बल्गर पलिरथाँ। 18 तब उ सँप्वा चलगिलस, और समुन्दरके आँरितिर ठरह्यागिलस।