1 जब बल्गर स्वर्गदूत बोलके ओरवाइल। तब मै ज्या सुन्नु उ असिके रहे, जसिके कि स्वर्गमे बहुत जाने गीत गाइतताँ: "हालेलुइया*! हमार परमेश्वर हमार लग मुक्ति नन्ले बताँ! महिमा और शक्ति हमार परमेश्वरेके हुइतिन। 2 हुँकार स्तुति करो, काकरेकी हुँकार हरेक निर्णय सहि और उचित बतिन। ऊ नामी व्यश्यक न्याय करलाँ। काकरेकी ऊ संसारके मनैनहे पाप करक लग प्रभावित कर्लस। परमेश्वर ओकर ईनाम देले बताँ। काकरेकी ऊ परमेश्वरके दासनहे मुवाइल।" 3 ओइने फेनदोस्रे एकचो जोरसे कलाँ, "हालेलुइया! बेबिलोनहे नाश करुइया आगीमसे निकरना धुवाँ कबु नै बन्द हुई।" 4 तब् ऊ चौबीसै अगुवन और ऊ चारथो जित्ती प्राणीन घोपत्या होके सिंहासनमे विराजमान हुइल परमेश्वरहे असिक कहिके आराधना करलाँ, "आमेन! (यकर मतलब हुइत, अस्तेहेँ होए।), हालेलुइया!" 5 तब् मै किहुहे बोलत सुन्नु, और महिन्हे असिन लागल कि यी आवाज परमेश्वरके सिंहासनसे आइता। ऊ कहल, "हे हमार परमेश्वरके सेबकनके और हुँकार डर मनुइयन, चाहे तुहुरे भारी पदके रहो या छुटी पदके। परमेश्वरके प्रशंसा करो।" 6 तब मै ज्या सुन्नु उ बहुत धेउर मनैनके चिल्लैलक आवाज हस लागतेहे। यी एकथो बरवार झरनक आवाज हस जोरसे रहे, और बद्रिक गर्जल हस रहे। ओइने कलाँ, "आऊ, हम्रे परमेश्वरके प्रशंसा करी! हमार सर्वशक्तिमान परमेश्वर रज्वा हुइँत।" 7 आऊ, हम्रे रमाई और खोब खुशी हुई और हुँकिन्हे महिमा दि! काकरेकी पठ्वक भोज हुइक लग बा। दुल्हन्याँ अपन शृंगार करके हुँकार लग तयार हुइल बा। 8 परमेश्वर उहिहे सफा और चहकार सूतिक लुग्गा घालक लग देले बताँ, जोन लुग्गा विश्वासीनके मजा कामके प्रतिक हो। 9 तब् उ स्वर्गदूत महिन्हे कहल, "यी लिखो, कि धन्य हुइँत उ मनै, जेने पठ्वक भोजक खुशियाली मनाइक लग बलागिल बताँ।" ऊ महिन्हे फेनदोस्रे कहल, "परमेश्वरके कहल यी बात सच्चा बा।" 10 जब मै यी बात सुन्नु ते मै ओकर आघे लिहुरगिनु, जे महिन्से बात बत्वाइतेहे। काकरेकी मै ओकर आराधना करे जाइतुहुँ। पर ऊ महिन्हे कहल, "महिन्हे दण्डवत् ना करो। जसिके तुँ और तोहाँर भैयन बताँ, जेने येशूक माध्यमसे देखागिलक सच्चा शिक्षामे विश्वास करथाँ और पालन करथाँ। ओस्तेहेँके मै फेन एकथो परमेश्वरके सेबक किल हुइतुँ। परमेश्वर किल बताँ, जेकर तुहिन्हे आराधना करे परना हो। काकरेकी यी पवित्र आत्मा हुइँत, जे परमेश्वरके मनैनहे येशूक बताइल सच्चाइक घोषणा करना लायकके बनैथाँ।"

11 तब मै स्वर्गहे खुलल देख्नु और वहाँ एकथो उज्जर घोरवा रहे। ओकरमे सवार रहुइया परमेश्वरके विश्वासयोग्य और सच्चा सेबक हुइँत। एकथो धार्मिक तरिकासे ऊ अपन दुश्मननके न्याय करथाँ, और ओइन्के विरोधमे लड़ाई लरथाँ। 12 हुँकार आँखी आगिक मोँजा हस चम्कतिहिन, और ऊ बहुत्ते मुकुट घालल रहिँत। और ओम्नेसे हुँकार एकथो नाउँ लिखल रहिन। पर उ नाउँक मतलब हुँकिन्हे किल पता बतिन। 13 ऊ खुनमे बोरल लुग्गा घालल रहिँत, और हुँकार नाउँ "परमेश्वरके वचन" रहे। 14 स्वर्गक बहुत्ते सेना हुँकार पाछेपाछे रहिन। ओइने उज्जर घोरवामे सवार हुइल रहिँत। और ओइने उज्जर मलमलके लुग्गा घालल रहिँत, जोन लुग्गामे एकथो फेन दाग नै रहे। 15 हुँकार मुहेमेसे एकथो चोखुर तरवाल निकर्लिन, जिहिसे उ सक्कु जाति-जातिनहे हरादिहीँ। ऊ एकथो लोहक बर्छीलेके सक्कु मनैनके उप्पर राज करहीँ। और जे हुँकार अधिकारहे स्वीकार नै करी, ऊ ओइन्हे पूरा रुपमे दण्ड दिहीँ। ऊ सर्वशक्तिमान परमेश्वरके डरलग्तिक प्रकोपहे ओस्तेहेँके छोरदिहीँ, जसिके एकथो रसकुण्डमेसे अंगुरके रस बहत। 16 हुँकार लुग्गा और जाँघेम "ऊ प्रभुनके प्रभु और रज्वनके फेन रज्वा हुइँत" कहिके लिखल बा। 17 तब् मै एकथो स्वर्गदूतहे सुर्यमे ठरह्याइल देख्नु। ऊ आकाशमे उरना सिकार खउइया सक्कु चिरैँनहे जोरसे असिक कहल, "आऊ, उ बरवार खानपीनमे जमा होजाऊ, जोन खाना परमेश्वर तुहुरिन्के लग तयार कर्ले बताँ। 18 आऊ, और रज्वनके, सेननके अगुवन, बल्गर-बल्गर सेननके, घोरवनके और ओइन्केमे सवार रहुइयनके सिकार खाऊ। तुहुरे सक्कु मेरिक मुअल मनैनके सिकार खाई सेक्थो। अथवा गुलाम रहल मनै और गुलाम नै रहल मनैनके, और महत्त्वपूर्ण रहल और महत्त्व नै रहल दुन्हुनके सिकार खाई सेक्थो।" 19 तब् मै उ दैँतुरवाहे देख्नु जे समुन्दरमेसे बाहेर आइल रहे। और पृथ्वीक रज्वनहे और ओइन्के सेननहे देख्नु। ओइने घोरवामे सवार होउइयक और हुँकार सेननके विरोधमे लड़ाई लरक जमा हुइलाँ। 20 तब् उ दैँतुरवा और ओकर हाजिरीमे अचम्मक काम करुइया और झूँटा सन्देश देहुइया दैँतुरवा दुनु जाने पकरवा पागिलाँ। उ झूँटा सन्देश देहुइया दैँतुरवा यी दैँतुरवक ओहोँरसे चमत्कारके काम देखाइल। और ऊ उ सक्कु मनैनहे धोखा देहल, जेने दैँतुरवक छाप अपन लिल्हारीमे लग्वाइल रहिँत। और जेने ओकर मूर्तिक पुजा करिँत। यी दुनु जाने बर्ती रहल गन्धकके आगिक कुण्डामे जित्ती फेँकागिलाँ। 21 यकर पाछे, जे घोरवामे बैठल रहिँत ऊ अपन मुहेमेसे निक्रल तरवालहे प्रयोग करके दोसुर सक्कु जहनहे मारदेलाँ। तब आकाशमे उरुइया चिरैँ तबसम लाहाशके सिकार खैती रलाँ, जबसम ओइन्के पेट नै भरगीलिन।