Jeremijaš 13

O podobenstvo pal o sirimos

1 Kada mange phenďa o RAJ: „Dža a cin tuke o ľanovo sirimos a thov tuke les pašal o klubi, ale ma thov les andro paňi." 2 Avke mange cinďom o sirimos, sar mange phenďa o RAJ, a thoďom mange les pašal o klubi.

3 Paľis ke ma o RAJ prevakerďa dujtovar kavke: 4 „Le o sirimos, so tuke cinďal a hino tute pašal o klubi, ušťi a dža ko paňi Eufrat a ode les garuv andre chev andre skala." 5 Avke me geľom a garuďom les paš o Eufrat, sar mange prikazinďa o RAJ.

6 Sar pregele but dživesa, phenďa mange o RAJ: „Ušťi a dža ko Eufrat a le odarik o sirimos, savo tuke prikazinďom ode te garuvel." 7 Avke me geľom ko Eufrat, kopaľinďom avri o sirimos a iľom pal oda than, kaj les garuďom. O sirimos imar sas zňičimen a na sas lačho pre ňisoste.

8 Akor ke ma avľa o lav le RAJESKRO: 9 „Kada phenel o RAJ: ‚Kavke zňičinava o baripen le Judaskro the o baro baripen le Jeruzalemoskro. 10 Kala nalačhe manuša doperena avke sar kada sirimos, so nane lačho pre ňisoste, bo na kamen te šunel mire lava, džan pal peskre zacata jile a phiren pal aver devla, hoj lenge te služinen a te klaňinen pes lenge. 11 Se avke sar o murš phandel o sirimos pašal peste, avke me phandľom pašal mande savore izraelike manušen the savore judske manušen,‘ phenel o RAJ, ‚hoj te aven mire manuša a te anen mange e slava, e chvala the e pačiv. Ale on man na šunenas.‘ "

O podobenstvo pal o džbani

12 „Phen lenge kala lava: ‚Kada phenel o RAJ, o Del le Izraeloskro: Dojekh džbanos ela naplňimen la moľaha.‘ Pre ada tuke phenena: ‚So na džanas, hoj dojekh džbanos ela naplňimen la moľaha?‘ 13 Phen lenge: ‚Kada phenel o RAJ: Dikh, savore kale manušen naplňinava la moľaha, medik na ena mate: le kraľen, so bešen pre le Davidoskro tronos, le rašajen, le proroken the savore manušen, so bešen andro Jeruzalem. 14 Phagerava len sar o džbani jekh avreha, le phuren the le ternen jekhetane. Na ela mange pharo, ňikas na kidava avri, zňičinava len bi e milosť, phenel o RAJ.‘ "

Pal o baripen

15 „Šunen, prithoven o kan, ma lašaren tumen,

bo o RAJ prevakerďa.

16 Den e chvala le RAJESKE, tumare Devleske,

medik na anela o kaľipen,

medik tumenge na poddžana o pindre

pro skali andro kaľipen.

Užarena pro švetlos,

ale ov les čerinela pro kaľipen;

kerela lestar baro kaľipen.

17 Ale te kada na šunena,

miri duša počoral rovela;

angle tumaro baripen igen rovela

a mire jakhendar čuľana o apsa,

bo le RAJESKRO stados

ela ľigendo andro zajaťje."

O judska manuša ena zaile

18 O RAJ mange phenďa:

„Phen le kraľiske the leskra dake:

‚Aven tele pal tumare troni

a bešen tumenge teleder,

bo tumare slavna koruni

tumenge perena tele pal o šere.

19 O fori pro juhos ena zaphandle andre

a ňiko len na otkerela.

Savore manušen andral e Judsko ľidžana andre aver phuv,

ľidžana len calkom avrether.‘ "

O zajaťje – o trestos vaš o binos

20 „Hazden upre o jakha a dikhen pre ola,

ko aven pal o severos.

Kaj hino o stados, so tuke sas dino?

Kaj hine tire šukar bakrore?

21 So pheneha akor, sar o manuša,

pal save tuke gondoľinehas, hoj hine tire prijaťeľa,

tut domarena a vladňinena upral tu?

Či na avela pre tu ajse dukha

sar pre džuvľi, so ločhol?

22 Te tutar phučeha:

‚Soske pre mande kada avľa?‘

Oda hin vaš tiro baro binos.

Vašoda tuke hazdle upre o rokľi

a pašľile tuha našilu.

23 Či šaj o Kušijcos čerinel e farba pre peskri cipa?

Abo o leopardos peskre škvrni?

Avke aňi tumen, ko san sikade pro nalačhipen,

našťi keren o lačho.

24 Roztradava len sar phus,

savo ľecinel andre balvaj pal e pušťa.

25 Kada hin tiro losos,

tiro kotor, so tuke merinďom avri,"

phenel o RAJ,

„bo bisterďal pre ma

a mukehas tut pro klamišagos.

26 Me tuke hazdava tiri rokľa pro muj,

hoj tuke te dičhol tiri ladž.

27 Me dikhľom tiro džungipen,

tiro lubipen, lubikano dživipen;

sar džan jekh pal aver sar o graj pal e kobila andre ruja,

sar lašaren le modlen pro verchi the pro maľi.

Vigos tuke, Jeruzalemona!

Medik dži kana kames te ačhel nažužo?"