1 Ɛmɛnɛ mi, igyima iyi egbo mi lɛɛbi mbala Ukpo mi ilɛma kwuwo mbo gba akwu te, lo fya isama ma. 2 Imi mafyi mi mi mi to mbo izɔgɔ tee, umba o bɔ kwushi mu Ukpo imbwaluma, i bɔ kwushi mba ɛlɛ ba akwu mu iyitu mo. 3 Moo umba o yitu iyi ɔgwuzɛ uwu bɔkɔ Ukpo e wo bɔkɔ enzu o yi ongbulolo mbala wu mo, akwɛyi umba ba o gyakpɔɔ mu ɔgwuzɛ mba imbwaluma; akwɛyi umba o ra la ɛmba o shi mu ɔgwuzɛ uwu Ukpo uwu bɔkɔ ee shi enzu oo yi ototo mbala wu mo. 4 Moo Okrasi gba akwu imbwama iyi ɛrama iyi Omosisi le, kaa onzu uwunawuna uwu bɔkɔ akwu idu lu fulo mawu, ee yi ototo mbala wu.

5 Moo Omosisi a ka iso meka iyi ototo uwu bɔkɔ oo fya wu mu ɛrama imbwaluma tee: <<Onzu uwu bɔkɔ a mbwalu apula iyi bɔkɔ ɛrama ɛlɛ i zɔ te lo wo, le lomo la yi iyɔkpɔɔ.>> 6 Kwokpo ungwu Ukpo ba kwu so iso meka iyi iŋɔma iyi ototo mbala Ukpo mu ɔgwuzɛ iyi ikwu idu lu fulo tee: <<Ki za la ɛŋɔ te uwe aa yama moshi?>> (iyi bɔkɔ mi yi mu isomo gba akwu tee, kaa le bo la Okrasi mɛzhi). 7 <<Nana ki yo kwuyo tee, uwe bɔkɔ e ri ngbaa mɛzhi mu aleku?>> (iluma i yi tee, kaa le yi Okrasi mo mu kuvɔ). 8 Iso iyi Ukpo i so te?>> Iso i yi kɛlɛ mbala ŋa, i yi mu kenzu ŋɔ mbala egbo ŋɔ>>, iyi bɔkɔ mi yi mu isomo gba akwu te, ilɔ iyi ikwu idu fulo iyi bɔkɔ ki yeyi mu izɛma. 9 Ilɔ gba akwu tee, gba ŋɔ zɔ mu kenzu ŋɔ gedegede tee Ɔzhizɔsi akwu Ɔkwu akwɛyi ŋɔ shi egbo tee Ukpo e yi wu mo mu lukwu, ŋɔɔ fya isama ma. 10 Moo akwu mu ikwidu fulo nzu gba kii yi ototo midu iyi Ukpo le; moo akwu mu izɔma gedegede mu kenzu nzu gba kii fa isama ma le. 11 Kwokpo ungwu Ukpo kwu zɔ tee, <<Onzu uwunawuna uwu bɔkɔ e shi egbo mawu lovya luu wo wu mo mo.>> 12 Isɛma i yi mo, laa Azhu loo laa umba bɔkɔ akwu Azhu mo, enzu lɛɛbi akwu wakpɛyi; Ukpo akwu Ɔkwu ukpɛnyi, uwuwuu gba akwu Ɔkwu uwu uwewe le ba ee shi rɛshi gyɔɔ la onzu uwu bɔkɔ a nda wu. 13 Mate bɔkɔ kwokpo ungwu Ukpo kwu so tee, <<Onzu uwunawuna uwu bɔkɔ a ya Ɔkwu ma aa fya isama ma.>>

14 I wo te ba o ya wu ma iyi imbwama akwiyi gba o o kwu idu lu fulo ma wu mo? Akwiyi gba o do zɛ mba ilɔ mo, oo wo te o kwu idu lu fulo? Akwiyi gba o do zɛ mba ilɔ mo, oo wo te ba oo pwa? 15 Oo wo te ba oo zilɔ akwiyi gba wa zilɔ o lɔ mba ma mo. Mate bɔkɔ kwokpo ungwu Ukpo kwu zɔ tee, <<Akwu kiya ingyeshi gba enzu o zɛ mu alɛ mba o bo la ilɔ iyesheshi iyi Okrasi!>> 16 Akwu enzu lɛɛbi gba ba o nyama la ilɔ iyesheshi iyi Okrasi ɛlɛ le mo. Moo Anukenzu Azaya mafyiwu a zɔ tee, <<Ɔkwu, uwe a nyama la ilɔ nzu?>> 17 Kwuwo kwɔlɛ, ikwu idu lu fulo i ngyi mu ilɔ iyesheshi ipwama, akwɛyi ilɔ ba i ngyi mu rɛnu ingyi Okrasi itama.

18 Imi ba mi yo kwuyo tee: enzu o do pwa ɛlɛ mo re? Ee o pwa yi ee, moo kwokpo ungwu Ukpo kwu zɔ tee,

<<Ilɔ mba i kama munamuna mu kwudu kwɔlɛ ee;

iso mba i kama mu ibwama iyi kwudu kwɔlɛ ee.>>

19 Mi gba mi yo kwuyo kpɔ tee: enzu umba Izirɛ o zɔngɔma yi ma mo re? Omosisi mafyi wu gba akwu onzu uwu kwonze uwu a zɔ tee:

<<Mi to ɛzhi iyi bɔkɔ akwu kiya kyinyinyi te mo

kaa la lu wo rise mbo;

akwɛyi mi to enzu umba bɔkɔ o yi iyitu mo

kaa la mi shi mbo lo wo amba.>>

20 Tete Anukenzu Azaya e so gedegede tee,

<<Enzu umba o yemi mu igagyima mo gba o fya mi ma le;

Imi mi zɛ mi ma la enzu umba bɔkɔ o yo kwuyo mi mo.>>

21 Mɛka iyi enzu umba Izirɛ ba a zɔ tee, la utu la ɔnu enzu umba bɔkɔ oo lo mi mo mo ba oo towo mi mo awu, mi yembo mu iyama.>>