1 Ongbulolo gba mi so yi le tee Imi mi kwu uwu Okrasi, akwu imulo gba mi so yi le mo. Mu ekpasu iyi Kwundu uwu Ukpo egbo mi i ye mi mu isomo tayi 2 te mi yi ubugyi uwakuu mbala oga ilomo uwu bɔkɔ u bomo mu akɔ mi mo. 3 Moo akwiyi gba ii wo mo, Ukpo la ba ta mi kenzu akwɛyi oo ka mi ma mbala Okrasi kwuwongu ɛmɛnɛ mi umba bɔkɔ ki kwu ɛnzhi wakpɛnyi awu. 4 Umba akwu enzu umba Azhu. Umba Ukpo e to mbo akwɛyi e wo mbo ɛmɛ wu, mbala inzumbɛku, mbala iso i shi mɛzhi, mbala ɛrama inama, mbala oya igbomo kpɛkpɛyi akwu iyamba. 5 Umba o yi kwomba mbala umba asɔkwu umba Azhu, akwɛyi oo wa kwomba ungwu Okrasi te a wɔ munyi mba, uwu akwu Ukpo uwu ingyinangyina, iduma akwu iyawu iyɔkpɔ! Li yi tayi.

6 Akwu te iso iyi Ukpo i fɔma le mo, moo akwu enzu umba Izirɛ lɛɛbi gba akwu enzu umba Ukpo le mo. 7 Nana kwuwongu umba akwu ɛdɔ wu akwɛyi umba akwu ɛmɛ umba Aburamu mo. Ukpo a za la Aburamu tee: <<Akwu mu Aziki gba ŋɔɔ yi eye umba bɔkɔ mi siso mi shi mɛzhi le.>>. 8 Iyi bɔkɔ mi yi mu isomo gba i yi te mɛɛ, akwu ɛmɛ umba bɔkɔ o mba mba imbama gba akwu ɛmɛ umba Ukpo le mo, ɛmɛ umba bɔkɔ Ukpo e siso e shi mɛzhi le gba akwu ɛdɔ iyi Aburamu le. 9 Iso iyi Ukpo e so e shi mɛzhi i yi tee: Aburamu, kari ngafo kwuye kwɔlɛ te shaka mii gbama, Osera aa mba umɛ ɔnzɔnu>> 10 Akwu ɛnyi kɛɛki mo, Orebeka a mba ɛmɛ apiri laa onzu ukpɛnyi, usɔkwu nzu Aziki. 11 Keyi kaa lo mba apiri mbɔlɛ, mbala keyi kaa lo wo kiya ingyeshi naa ingyira, kaa mu amasa ikama iyi Ukpo, kiya ingyi bɔkɔ uwu a ŋa la gba kii yi le, 12 akwu kwuwongu ɛduma mo akwu kwuwongu onzu uwu bɔkɔ a yama awu, mu kwokpo ungwu Ukpo, o za wu te, <<Umɛ uwakɔ aakwu unye uwu umɛ uwɛri.>> 13 Tatayi gba o ka le tete mu kwokpo ungwu Ukpo tee: <<Mi mi gyi Ɔzhɛkɔbu, Isɔ ba mi towo wu mo.>> 14 kekelele kii zɔ te Ukpo e wo nzu ɔnyɛ mo awu mo? Ayimo ndii! 15 Moo Ukpo a za la Omosisi te, <<Onzu uwu mi gyi te mi ma eyembembyi wu, gba mi ma eyembembyi wu le, onzu uwu mi gyi te la mi ma inyashi wu gba mi ma inyashi wu le.>> 16 Kwuwo kwɔlɛ, akwu mu inyama naa ekpasu iyi onzu mo, ɛlɛ akwu kwuwongu eyembembyi iyi Ukpo imama. 17 Moo mu kwokpo ungwu Ukpo, o za la Ofero ɔsu uwu Izhipiti tee: <<Kwuwongwu ɛlɛ gba mi shi ŋɔ ɛsu iyi Izhipiti le, kaa la mi zɔ ekpasu mi mu reshi ŋɔ, akwɛyi enzu umba kwudu kwɔlɛ lɛɛbi oo pwa ɛnyi mi.>> 18 Kwuwo kwɔlɛ Ukpo a ma eyembembyi iyi onzu uwu bɔkɔ a gyi le, onzu uwu ba a gyi te egbo wu li kɔma ba ee shi yi i kɔma le.

19 Igboshimo ukpɛnyi yi ee yo tee, <<Kimbe ki shi ba Ukpo a gba a ma ingbomo nzu? Uwe ba e do isama mbala wu ngyɔ?>> 20 Uŋɔ ba ŋɔ kwu uwe ngyɔ bɔkɔ ŋɔ do Ukpo opwu igbama? I shoshi te kiya ingyi bɔkɔ onzu e wo ngyi le la ki za wu te, <Kimbe ki shi bɔkɔ ŋɔ wo mi te?> >> 21 U mbo lu wu mu lo mbo e yi ekpasu iyi ee wo ɛduma mu lo mbo ewo iyi bɔkɔ a gyi. Mu lo mbo ndɔndu, e do te ee mbo lu wu undufo ka lo wo ɛduma iyeshi ma ndu, undufo ba lo wo ɛduma iyi umbwa ma ndu.

22 Akwiyi gba Ukpo a gyi te la zɔ amba wu ma, kaa la gba la zɔ ekpasu wu ma, akwɛyi e yidu a ra la amba wu meka iyi enzu umba bɔkɔ a ba zɔ mba amba wu, umba bɔkɔ Ukpo e shi mbo te o ngbɛ mba ɛdɔma awu. 23 Ukpo e yidu kwuwongu kaa lo zɔ inzumbɛku iyɛku wu laa enzu umba bɔkɔ a ma inyashi mba awu, umba bɔkɔ a nɔngɔ mba ma ngbaa mu iyemo kwuwongu inzumbɛku wu 24 kinzu, e kyo a ya nzu tete, akwu mɛmi iyi Azhu kɛɛki mo, i kyo enzu umba bɔkɔ akwu Azhu mo tete. 25 Mate bɔkɔ e so mu kwokpo ungwu Osiya tee:

<<Enzu umba bɔkɔ akwu enzu mi mo mi ya mba te <enzu mi>;

umba bɔkɔ mi gyi mbo mo awu ba mi ya mba te <Umba igyima mi.>

26 Tetete,

<<Mu riyi ngyɛngyi mbaa bɔkɔ Ukpo a za mba tee, lu kwu enzu mi mo awu,

Mu riyi ngyɛngyi Mi ya mba tee ɛmɛ umba Ukpo ureyi.> >>

27 Anukenzu Azaya e siso mu opwu uwɔkwu meka iyi Izirɛ tee: Enzu umba Izirɛ o yi riba mate ɔgyɛ uwu risu tayi lala, akwu enzu kɛki meka mba gba oo fya isama ma le. 28 Moo Ukpo a ŋaa zɔ umbu wu meka iyi kwudu kwɔlɛ lɛɛ efyefya.>> 29 I yi mate bɔkɔ Azaya e so kwonze: Lakwu te Ɔkwu edego-ala e shi ɛdɔ nzu rito mo, la ki bi yi mate Ɔsɔdɔmu tayi, la ki bi yi mate Ogomora tayi.>>

30 Kekelele kinzu ki so te? Te enzu umba bɔkɔ akwu Azhu mo, umba o gagyi iŋɔma iyeshi mbala Ukpo mo, o fya yi ma, iŋɔma iyeshi mbala Ukpo mu ikwu idu lu fulo mbo; 31 enzu umba Izirɛ ba o mbwalu ɛrama kaa lo yi ototo midu iyi Ukpo, umba ba o fya yi ma mo. 32 Kwuwongwu kwuwongumbe? Akwu kwuwongu o gagyi mu ɔgwuzɛ uwu ikwu idu lu fulo mo, akwu mu ɔgwuzɛ uwu ɛduma iwomo mbo. Akwɛyi umba o lɛfyi mu <<kwoki kwu lɛfyi.>> 33 Mate bɔkɔ o ka mu kwokpo ungwu Ukpo tee:

<<La lu yese, Imi mi bɔ kwoki mu Ɔzayɔ,

ungwu kwuu shi enzu o lɛfyi,

kwoki ungwu kwuu shi o kpa mɛzhi,

onzu uwu ba e fulo idu mawu o lo wu lovya gbee mo.>>