1 Tabɔkɔ Ukpo e to ombu o sha nzu kwuwongu ikwu idu lu fulo nzu awu, ki yi idigbomo iyi Ukpo mu Ɔkwu nzu Ɔzhizɔsi Okrasi. 2 Ki fya ɔgwuzɛ ma meka wu mu ikwu idu lu fulo nzu akwɛyi ki fye mu esheshi iyi bɔkɔ ki rima ma yi kekelele le. Kinzu ki kwɛnwu mu eyifulomo iyi inzumbɛku iyi Ukpo. 3 Akwu mu ɛlɛ kɛɛkyi mo, ki gba ki kwɛnwu meka iyi inyashi tete, moo inyashi i bo la idu kwɔku, 4 idu kwɔku ba i bo la luzɛ undu esheshi, luzɛ undu esheshi ba lu bo la eyifulomo. 5 Eyifulomo ɛlɛ ba i lo nzu lovya mo, kwuwongu Ukpo a nyɔlɔ egbo nzu ma mu idɛnyi wu i zɛ mu Kwundu uwu Ukpo uwu bɔkɔ e shi nzu awu.

6 kwuyengwu ki yi ekpasu iyi ki mbwama laa enzu mo, akwɛyi Okrasi e bo tabɔkɔ kwuye ku kpokya, akwɛyi e kpomo kwuwo nzu, kinzu enzu umba ingbomo. 7 Ikɔma kaa onzu le kpomo kwuwongu onzu ototo. Igɔ mo onzu uwufo a bɔ ɛwu kepo mu idu kaa le kpomo kwuwongu onzu uweshi bi. 8 Ukpo ba a zɔ nzu idɛnyi wu gyɔɔ - akwu kwuyengwu bɔkɔ ki kwu enzu umba ingbomo bɛnɛ, gba Okrasi e kpomo kwuwo nzu le.

9 Kwuwongwu lukwu wu, ki yi ototo mbaa Ukpo; akwɛyi a sa nzu ma mbaa amba umba Ukpo tete! 10 Kinzu ki kwu agewa umba Ukpo mekyi, tetete e wo nzu ki kwu enzu ɛmɛza wu kwuwongu lukwu undu Umɛ wu. Kekelele bɔkɔ ki kwu ɛmɛza umba Ukpo ŋa le, uwu a sa nzu ma mu Okrasi! 11 Ba akwu ɛlɛ kɛɛkyi mo; ki mwɔnyɛ kwuwongu kiya ingyi bɔkɔ Ukpo e wo mu Ɔkwu nzu Ɔzhizɔsi Okrasi uwu bɔkɔ e lonzu mesu mbala Ukpo awu.

12 Kyamate bɔkɔ ingbomo i zɛ mu onzu ɛnyi gba i fye mu kwudu kwɔlɛ le akwɛyi lukwu ba lu zɛ mu ingbomo lu fye, tatayi gba lukwu lu du uwewe le, moo enzu ndii o ngbomo. 13 Ingbomo i yi mu kwudu kwɔlɛ dɛ gba o bo la Ɛrama le; gba ɛrama i yi mo, enzu o yitu iyi ingbomo mo. 14 I na mu kwuyengwu Adɛmu nzhii ba mu kwuyengwu Omosisi, lukwu lu ri ɛsu iyi enzu, laa umba bɔkɔ o ngbomo mo kyamate Adɛmu bɔkɔ e fo ɔkpa uwu Ukpo ma awu.

Adɛmu e yi kyamate onzu uwu bɔkɔ a ba nyɔ awu.

15 Rɛshi gyɛngyi mbala ikpamɛzhi ɛnyi ba i yi kya mo, moo rɛshi ingyi Ukpo ri yi kyamate ingbomo iyi Adɛmu te mo. Enzu gyɔɔ o kpomo kwuwongu ingbomo iyi onzu ɛnyi, esheshi iyi Ukpo ba i ka le, enzu gyɔɔ o fya rɛshi ingyi esheshi iyi Ukpo i zɛ mu onzu ukpɛnyi uwu gba akwu Ɔzhizɔsi Okrasi le. 16 Rɛshi ingyi Ukpo ba ri yi ikikɔ mbala ingbomo iyi onzu ɛnyi awu. Ombuwoyi uwu bɔkɔ u mbwalu ingbomo iyi onzu ukpɛnyi ɛnyi i bo la ombu uwoyi uwu <<Lukwu>>; rɛshi ingyi Ukpo ba ri shi nzu ototo mbaa Ukpo akwɛyi ri bo la <<Ombwu uwoshi!>> 17 I zɛ mu ingbomo iyi onzu ukpɛnyi, gba lukwu lu ri ɛsu kwuwongu onzu ɛnyi awu le. Enzu umba bɔkɔ o na esheshi mbala rɛshi ingyi Ukpo ingyɛkwu bɔkɔ onzu ukpɛnyi Ɔzhizɔsi Okrasi! I yi bɔkɔ e wo awu, i ka le, i zɛ mu onzu ukpɛnyi awu gba ki fya irɛsu iyi ototo le.

18 Te gba i yi le, mate bɔkɔ ingbomo iyi onzu ukpɛnyi i ka la enzu lɛɛbi la lukwu awu, te gba ototo uwu onzu ukpɛnyi a ka la enzu lɛɛbi la kwunyɔ le. 19 Kyamate bɔkɔ i pwa alu mo iyi onzu ukpɛnyi i ka la enzu lɛɛbi la lukwu awu, te gba ototo uwu onzu ukpɛnyi a ka la enzu lɛɛbi ototo mbaa Ukpo le.

20 O bo la ɛrama kaa ingbomo li kyomo; mbaa bɔkɔ ingbomo i kyomo ba esheshi iyi ukpo ikyomo i ka le. 21 Moo tabɔkɔ ingbomo i shi lukwu kaa la lu ri ɛsu awu, te gba esheshi iyi Ukpo ii shi ototo e ri ɛsu kaa le bo lo lakwunyɔ ungwɔkpɔɔ i zɛ mu Ɔzhizɔsi Okrasi Ɔkwu nzu le.