1 Kinzu umba ki kɔma mu ikwu idu lu fulo la ki mbwala enzu umba bɔkɔ o kɔma mu ikwu idu lu fulo mo mu ewulo mbo ishimo. La ki wo kiya ingyi bɔkɔ kinzu ki gyi bi mo. 2 La ki wo kiya ingyi bɔkɔ ki shela wa mbwalu Ɔzhiisɔs umbafo kaa lakwu iyesheshi nzu, kaa li nɔngɔ mba ma mu ikwu idu lu fulo mbo. 3 Moo Okrasi e wo kiya ingyi ki shela ɛnwu wu byi mo, kyamate bɔkɔ o ka mu kwokpo awu te: <<Ari iyi bɔkɔ enzu o kpa ŋa awu i kpo ma mi.>> 4 Moo apula iyinayina iyi bɔkɔ o ka yi ma mekyi awu o ka yi te kaa li zɔ nzu kiya, kwuwongu kaa la ki yi idu kwɔku mbala ɛnwu ɛkɔ iyi kwokpo ungwu Ukpo kwu shi nzu kaa la ki yi eyifulomo awu.

5 Ukpo uwu bɔkɔ ee shi idu iyimo mbala ɛnwu ɛkɔ awu le shi yi Kwundu ungwu ikpa kyaa mate bɔkɔ lu mondo luzɛ undu Okrasi Ɔzhiisɔs, 6 kwuwongu kaa lɛɛbi yi la lu kpa kya kaa la lu du Ukpo mbala ete uwu Ɔkwu nzu Ɔzhiisɔs Okrasi ma mu opwu ukpɛnyi.

7 La lu na esu mu egbo ikpɛnyi, kyamate bɔkɔ Okrasi a na yi tayi kaa Ukpo la fya iduma ma. 8 La lu lolo te Okrasi akwu Umɛgba uwu enzu umba Azhu kaa li zɔ te Ukpo e wo iyi iso iyi bɔkɔ e so e shi mɛzhi te e wo, kaa iyi bɔkɔ e so e shi mɛzhi la asɔkwu mba li nyɔlɔma 9 kwuwongu kaa enzu umba bɔkɔ akwu Azhu mo awu lo shi Ukpo inzumbɛku kwuwongu eyembembyi wu kyamate bɔkɔ o ka mu kwokpo ungwu Ukpo te:

<<Kwuwo kwɔlɛ Mii du ŋɔ ma mbaa enzu umba bɔkɔ akwu Azhu mo;

Mii so ŋɔ amu.>>

10 Kwokpo kwu gba kwu so kpɔ tee,

<<La lu mwɔnyɛ, lunyi enzu umba bɔkɔ lu ku Azhu mo, mbala enzu umba Ukpo.>>

11 Kwokpo kwu so kpɔ tee,

<<La lu du Ukpo ma lɛɛbi lunyi umba bɔkɔ lu ku Azhu mo awu,

la lu so amu iyi iduma la wu, enzu lɛɛbi.>>

12 Kwokpo ungwu Azaya kwu so kpɔ tee,

<<Onzu uwufo aa wɔ mu ɛdɔ iyi Ozhese,

uwu bɔkɔ e rɛsu mu ɛzhi lɛɛbi;

enzu umba bɔkɔ akwu Azhu mo awu o fulo eyi ma wu.>>

13 Ukpo u shi eyi ifulomo awu la nyɔlɔ yi ma mu ɔnyɛ mbala idigbomo uwu bɔkɔ lu fulo egbo ma wu awu, kwuwongu eyi ifulomo yi li sheyi keyi mu ekpasu iyi Kwundu uwu Ukpo.

14 Ɛmɛza mi, Imi mafyi mi mi nyama tee, lunyi lu nyɔlɔma mu esheshi, lu nyɔlɔma mu iyitu, ba lu do esu kiya izɔma. 15 Imi mi ka kwupu kwɔlɛ laa iyi mo meka iyi iso iyifo iyi bɔkɔ mi gyite la mi lolo yi kpɔ, kwuwongu esheshi iyi bɔkɔ Ukpo e shi mi 16 kaa mi kwu Umɛgba uwu u tanu iyi Okrasi Ɔzhiisɔs la enzu umba bɔkɔ akwu Azhu mo. Mi gbo oya kyamate oboshi tayi mu anu itama iyi ilɔ iyesheshi iyi bɔkɔ i wɔ mu Ukpo, kaa enzu umba bɔkɔ akwu Azhu mo awu lo na Ukpo ma, Kwundu uwu Ukpo e to mbo e shi Ukpo. 17 Ikpa kyaa mbala Okrasi Ɔzhiisɔs akwɛyi mi kwɛnwu kwuwongu ɛduma iyi mii wo la Ukpo. 18 Imi mi so gedegede iyi kiya ingyi bɔkɔ Okrasi e wo meka mi iyi kaa la mi bo la enzu umba bɔkɔ akwu Azhu mo kaa lo lomo la Ukpo. Okrasi e wo ɛlɛ mu iso mi mbala kiya ingyi mi wo, 19 mu ekpasu iyi apula iyi amɛ mbala iyi izele, mbala mu ekpasu iyi Kwundu uwu Ukpo. Kwuwo kwɔlɛ, i na mu Ɔzhɛrusalɛ nzhii ba Iliriku, Mi tanu iyi ilɔ iyesheshi iyi Okrasi marimari. 20 Egbo mi i yi te mi tanu iyi ilɔ iyi Isheshi iyi Okrasi mɔgɔ bɔkɔ o yitu iyi Okrasi mo, kwuwongu kaa la mi la ɔla la onzu uwufo. 21 Kyamate bɔkɔ kwokpo ungwu Ukpo kwu so te:

<<Enzu umba bɔkɔ o so mbo iso wu awu o ma wu,

akwɛyi enzu umba bɔkɔ o di pwa dɛ mo o zɔngɔma.>>

22 Kwuwo kwɔlɛ gba o koko o se mi ɔgwuzɛ uwu i bo munyi yi ma le. 23 Imi ba mi mbwa ɛduma iya mi ma-a mu ɛzhi ɛlɛ, lɔri guruguru Mi gyikpɔ kaa la mi so munyi yi kaa la mi ma yi, 24 mi ka amasa kaa la mi so munyi yi kwuyengwu mi ka mu Osupeni. Mi ka te mi zɛ munyi yi kwuyengwu mi yi mu ipikama awu kaa la lu mbwa mi ma ka la mi so mɔmɔ, mizhikembo iyi mi mwɔnyɛ iyi imama iyi bɔkɔ mi ma yi kwuye bwɛɛ awu. 25 Kekelele ba mi sheyimo mu Ɔzhɛrusalɛ ka la mi ka la wa mbwalu umba bɔkɔ o yi mɔmɔ awu la rɛshi. 26 Moo wa mbwalu umba Omasedoniya mbala Akaya o ka amasa ka lo wo rɛshi la ayirewa meka iyi enzu umba Ukpo umba o yi mu Ɔzhɛrusalɛ. 27 O mwɔnyɛ kaa lo wo ɛlɛ kwuwongu o ma te o rala kwokpa mba. Moo akwiyi gba enzu umba bɔkɔ o kwu Azhu mo o yi kwuwo mu esheshi iyi Kwundu iyi bɔkɔ akwiyi umba Azhu, o rala enzu umba Azhu kwokpa ungwu kaa lo ka apula mba ma mbala mba. 28 Kwuwo kwɔlɛ mizhikembo iyi Mi mbwa ɛduma ɛlɛ ma akwɛyi mi gbala lɛɛbi iyi eduwo iyi bɔkɔ o kpala yi ɛlu awu mi shi mbo, mi re mu Osupeni akwɛyi mi ma yi kwuyengwu mi sheyimo. 29 Kwuye ungwu mi bo munyi yi, mi yitu te mi nyɔ mbala esheshi iyi Okrasi duduu.

30 Mi so yi, ɛmɛmbɛnɛ mi, meka iyi Ɔkwu nzu Ɔzhiisɔs Okrasi mbala meka iyi idɛnyi iyi Kwundu, kaa lo lɛ Ukpo kwuwo mi. 31 La lu lɛ Ukpo te la wa mi ma mu kwuwo ungwu enzu umba bɔkɔ akwu wa mbwalu mo umba bɔkɔ o yi mu Ozhudiya awu akwɛyi enzu umba Ukpo umba bɔkɔ o yi mu Ɔzhɛrusalɛ mɔmɔ awu o do te o na ɔya mi. 32 Kwuwongu kaa mu inyama iyi Ukpo mi nyɔ munyi yi la ɔnyɛ akwɛyi ki ka esu ɛnwu ma. 33 Mii lɛ Ukpo te Ukpo u shi idigbomo le yi mbala yi lɛɛbi. Li yi tayi.