1 La lu na enzu umba bɔkɔ ikwu idu lu fulo mbo i funyashi, lunyi ba la lu ri kambu mbala mba mɔgɔ uwu apula iyi bɔkɔ o ka amasa yi mo. 2 Ikwidufulo iyi enzu umbafo i shi mbo o ri kiya ingyinangyina bi, onzu uwu bɔkɔ a funyashi iyi ikwu idu lu fulo e ri epu kɛɛkyi. 3 Onzu uwu bɔkɔ e ri kiya ingyinaingyina awu la nzhii onzu uwu bɔkɔ e ri mo awu mo, onzu uwu bɔkɔ e ri kiya ingyinaingyina mo awu ba laa zɔ ombu uwu onzu uwu bɔkɔ e ri awu mo, moo Ukpo a na wu-a. 4 Uŋɔ ba ŋɔ kwu uwe bɔkɔ ŋɔɔ zɔ ombu uwu Umɛgba uwu onzu uwufo? Akwu Adakwogba mba gba aa zɔ le te e wo ɔnyɛ naa e wo ɔnye mo le. Akwɛyi aa rima, moo Ɔkwu e do te ee shi wu kaa la rima.

5 Enzu umbafo o ka te kwɔfyi ungufo kwu ka afyi iyifo ma; onzu uwufo a ma yi te afyi i yi kyakya. Onzonzu la rala iyi egbo wu. 6 Enzu umba bɔkɔ o to kwɔfyi ungufo te kwu ka le awu, o wo tayi kaa lo lomo la Ɔkwu, kwuwongu o gbɛlɛ Ukpo ɛnyi iyi kiya ingyirimo. Enzu umba bɔkɔ o towo apula iyifo irimo awu o wo tayi kaa lakwu ilomo la Ɔkwu, akwɛyi o gbɛlɛ Ukpo ɛnyi. 7 Moo onzu ukpukpɛnyi te e yi la reyi kwuwongu ɛnwu wu kɛɛkyi mo, tayi gba onzu ukpukpɛnyi te e kpomo kwuwongu ɛnwu wu kɛɛkyi mo le . 8 Akwiyi gba ki yi lareyi, ki yi lareyi la Ɔkwu; tayi gba i yi le akwiyi gba ki kpomo, ki kpomo la Ɔkwu. Kwuwo kwɔlɛ gba ki yi la reyi naa ki kpomo, ki kwu umba Ɔkwu.

9 Kwuwo kwɔlɛ gba Okrasi e kpomo akwɛyi a gba e yi la reyi kaa la kwu Ɔkwu uwu umba bɔkɔ o yi la reyi mbala umba bɔkɔ o kpomo-o. 10 Uŋɔ kɔ, kimbe ki shi bɔkɔ ŋɔɔ zɔ ombu uwu umɛnɛ ŋɔ? Naa kimbe ki shi bɔkɔ ŋɔɔ zhii umɛnɛ ŋɔ ma? Moo lɛɛbi nzu kii rima mu keyi unga ukpa uwu ombu uwu Ukpo. 11 Moo kwokpo ungwu Ukpo kwu zɔ te:

<<Ɔkwu a zɔ te, tabɔkɔ mi yi la reyi,>

<Epunu lɛɛbi ii kwumo midu mi;

enzu lɛɛbi oo nyama te Imi mi kwu Ukpo.>>

12 Kwuwo kwɔlɛ onzonzu nzu a zɔ kiya ingyi bɔkɔ e wo laa Ukpo.

13 Kwuwo kwɔlɛ la ki lafya la ombu uwesu izɔma. I yi bɔkɔ i shoshi tee ka wo gba akwu tee, ki nyama kaa kwu kwoki ungwu ɛfi ilama naa kiya ingyi ingbomo la umɛnɛ ŋɔ mo. 14 Tabɔkɔ mi yi mbala Ɔkwu Ɔzhiisɔs le, mi nyama te kiya ingyirimo ingyi bɔkɔ ki wuluma mo ki yi mo. Onzu uwunawuna uwu bɔkɔ e to kiya te ki wuluma mo, de kiya ngyɛngyi ki wuluma mbaa onzu awu mo. 15 Akwiyi gba enzu umbafo o wo ubugyi kwuwongu kiya ingyi bɔkɔ ŋɔ ri, de ba ŋɔ yi mu luzɛ mu idɛnyi mo. Ki shi kaa kiya ingyi bɔkɔ ŋɔ ri la ki shi onzu uwu bɔkɔ Okrasi e kpomo kwuwo wu awu la tama mo. 16 Ki lafya la kiya ingyi bɔkɔ ŋɔ ma te ki shoshi kaa lo siso ngyi kyamate ingyira mo. 17 Moo irɛsu iyi Ukpo akwu kwuwongu kiya irimo mbala embyi iwomo bi mo, inyi ba akwu ototo, idigbomo mbala ɔnyɛ iyi bɔkɔ Kwundu uwu Ukpo e shi, 18 kwuwongu onzu uwunawuna uwu bɔkɔ e gbo Okrasi ɔya mu ɔgwuzɛ ɔlɛ, de ba Ukpo a mwɔnyɛ mbala akwɛyi enzu ba oo pwɔ wu ma.

19 Kwuwo kwɔlɛ, la ki yi esu idu mo kaa la ki wo kiya ingyi ki bo la idigbomo mbala i yi bɔkɔ i mbwa nzu ma kaa la ki ka esu ɛnwu ma. 20 Ki tutu ɛduma iyi Ukpo ma kwuwongu kiya ingyirimo mo. Kiya ingyirimo lɛɛbi ki wuluma, inyi gba ishoshi te ka onzu le ri kiya ingyinaingyina ingyi bɔkɔ ki bi shi onzu le ngbomo mo. 21 Ishoshi kaa onzu le kwu kwuvye naa le wo atɛ naa le wo kiya ingyi bɔkɔ ki shi umanyi wu la kpa mɛzhi mo.

22 Kwuwo kwɔlɛ, rala ikwu idu lu fulo ŋɔ iyi ŋɔ yi mu apula ɛlɛ lɛɛbi mekeka ŋa mbala Ukpo ŋɔ. Ɔnyɛ akwu uwu onzu uwu bɔkɔ a ma te e ri ombu uwoyi kwuyengwu bɔkɔ o to ombu o ri wu mo. 23 Onzu uwunawuna uwu bɔkɔ egbo wu akwu epepo de o ngbɛ wu ombu uwoyi akwiyi gba e ri, kwuwongu kiya irimo wu akwu mu ikwu idu fulo mo; kiya ingyinangyina ingyi bɔkɔ ki ngyi mu ikwu idu lu fulo mo akwu ingbomo.