1 Onzu uwunawuna le lomo la wa to keyi umba ogwomineti, moo i yi ɛrama ikpikpɛnyi te iyi bɔkɔ i bo mizhikembo iyi Ukpo mo, ɛrama lɛɛbi Ukpo gba a ta yi le.

2 Kwuwo kwɔlɛ onzu uwunawuna uwu bɔkɔ e towo ɛrama iyi ɛzhi ma, e towo iso Ukpo mo, uwu ba o yi wu ombu. 3 Moo wazombu o lo enzu umba bɔkɔ o yi mu iyeshi iwomo iyi mo, umba ba o lo enzu umba bɔkɔ o yi mu ira iwomo iyi. Ŋɔ gyi te kaa ki wiyi iyi enzu umba bɔkɔ o zɔ ombu moo? De ba wo iyeshi, akwɛyi o pwɔ ŋɔ ma, 4 moo umba akwu ɛmɛgba umba Ukpo e shi kaa lo yi ɛduma. Akwiyi gba lu wo iyira, de ba wiyi, moo a ra la kepo unga kamba shaa bi mo. Akwu ɛmɛgba umba Ukpo, onzu uwu bɔkɔ a zɔ ombu uwu enzu umba bɔkɔ o wo ira. 5 Kwuwo kwɔlɛ gba akwu mega kaa onzu le lomo laa wa to keyi umba ɛzhi, akwu kwuwongu ombu izɔma kɛɛkyi mo, ba lakwu kwuwongu egbo mbo i so mbo te lo wo tayi.

6 Akwu kwuwo kwɔlɛ tete gba ifate la lu shi Oba uwɛzhi yi le, moo wa to keyi akwu ɛmɛgba umba Ukpo, umba bɔkɔ o to kwuye mbo o ta la ɛduma iwomo. 7 Shi onzonzu kiya ingyi bɔkɔ lu rangyi mba; La lu shi oba uwɛzhi yi mbala uwu apula yi, la lu lombo mo ba la lu shi mbo umwɔ lɛɛbi.

8 La lu ra la kwɔkpa mo, kwokpa ungwu luu rangwu gba lakwu ungwu bɔkɔ idɛnyi iyesu ipwumo, moo onzu uwunawuna uwu bɔkɔ e pwu idɛnyi iyi onzu uwopo wu de ba a mbwalu ɛrama. 9 Ɛrama i zɔ te, <<Ki yama mo; Ki ngbɛ onzu mo; Ki wɛlɔ mo; Ki se eyi mu kiya ingyi onzu uwufo mo,>> ɛlɛ lɛɛbi mbala iyifo yi, o ngbɛ yi o lo mesu akwu ɛrama ikpɛnyi tee: <<Pwu idɛnyi iyi onzu unukpaŋa kyamate ɛŋɔ tayi.>> 10 Idɛnyi ii wo onzu uwa a nɔ a kpa wu ira mo. Kwuwo kwɔlɛ idɛnyi gba akwu inyɔlɔma i yi ɛrama le.

11 Akwu mega kaa wo ɛlɛ, moo ŋɔ yitu te kwuye kwu bo-o kaa onzu la nyeyimo mu ondo. Moo kwuyengwu bɔkɔ o sa nzu ma le kwu bo kɛlɛ i ka kwuyengwu kwonze ungwu bɔkɔ ki kwu idu lu fulo le mo. 12 Eyi i nda laa ilama fo, kwɔfyi kwu bo kɛlɛ-ɛ. Kwuwo kwɔlɛ la lu shi ɛduma iyi ipwu mɛzhi akwɛyi ki lo ewulo iyi ewa itomo mu ɛbɛ. 13 La ki zɛ luzɛ marimari, kyamate enzu umba bɔkɔ o yi mu ɛbɛ iyi ɔnɔnda tayi, moo la lu so mu odumudumu uwakuu kaa atɛ lo yi mo mo, ba la lu to kaya mo, naa inyama iwomo mo, na ewa ikirimo naa anya iwomo mo. 14 Lunyi ba la lu to ewulo iyi ewa iyi Ɔkwu nzu Ɔzhizɔsi Okrasi mu ɛnwu, kaa la lu se alu yi ma mbaa ingbomo iyi kwudu kwɔlɛ mbala i shi ɛnwu kaa li mwɔnyɛ.