Kwunyɔ Mu Kwundu
1 Kwuwo kwɔlɛ, enzu umba bɔkɔ o yi mu Okrasi Ɔzhizɔsi o ngbɛ mba ombuwoyi fo. 2 Moo mu Okrasi Ɔzhizɔsi, ɛrama iyi Kwundu i wa mi ma mu ɛrama iyi ingbomo mbala lukwu oo. 3 Moo kiya ingyi bɔkɔ ɛrama i do ngyi iwomo mo kwuwongu inyɛma iyi onzu, Ukpo e wo ngyi mo, a lɔ la Umɛ wu e bo mu ɛnwu iyi bɔkɔ iyi mate iyi onzu te kaa lakwu isabɔ iyi ingbomo. 4 Ukpo e wo ɛlɛ kaa iyi bɔkɔ ɛrama i gyi awu li nyɔlɔma ma nzu umba bɔkɔ ki yi mu luzɛ mu Kwundu, ba la akwu mu iyi bɔkɔ ɛnwu i gyi mo awu. 5 Enzu umba bɔkɔ o yi mu luzɛ mu iyi ɛnwu bɔkɔ i gyi bi awu o shi egbo mbo mu kiya ingyi bɔkɔ ɛnwu mba i gyi; enzu umba bɔkɔ o yi mu luzɛ mu iyi bɔkɔ Kwundu a gyi ba o shi egbo mbo mu iyi bɔkɔ Kwundu a gyi. 6 I shi egbo mu apula iyi ɛnwu i bo la lukwu, i shi egbo mu iyi Kwundu ba i bo la kwunyɔ mbala idigbomo. 7 Akwiyi gba enzu o shi egbo mu apula iyi ɛnwu o vindɔ enzu umbeyi umba Ukpo. Moo o lomo laa ɛrama iyi Ukpo mo, ba o do yi iwomo mo. 8 Enzu umba bɔkɔ o lolo la apula iyi ɛnwu, oo she la Ukpo mo.
9 Lunyi ba lu yi mu iwomo iyi bɔkɔ ɛnwu yi i gyi mo, lu yi mu iwomo iyi bɔkɔ Kwundu uwu Umkpo a gyi, akwiyi gba Kwundu uwu Ukpo e yi ma yi. Onzu uwunawuna uwu bɔkɔ e yi Kwundu uwu Okrasi mo, akwu uwu Okrasi mo. 10 Akwiyi gba Okrasi e yi ma yi, ɛnwu yi i kpomo la ingbomo o, Kwundu ba a kwa yi kwunyɔ kwuwongu o shi yi toto mbaa Ukpo o. 11 Akwiyi gba Kwundu uwu Ukpo wu e yi Ɔzhizɔsi mo mu lukwu awu e yi ma yi, uwu wu e yi Okrasi mo mu lukwu awu tete ee shi ɛnwu yi iyi lukwu ɛlɛ kwunyɔ, izɛ mu Kwundu uwu bɔkɔ e yi ma yi awu.