inzumbɛku Iyi Bɔkɔ I Yi Mu Keyi
18 Mi ma yi tee inyashi iyi bɔkɔ ki yi mu i mama le, o manda yi mbala inzumbɛku iyi bɔkɔ ki bi fya yi mu keyi le mo. 19 Moo apula lɛɛbi i yi mu igyakpɔɔ kaa li rigbo laa kwɔfyi ungwu keyi kwuyengwu bɔkɔ Ukpo a zɔ umbana bɔkɔ akwu ɛmɛ wu. 20 Moo apula iyi bɔkɔ Ukpo e wo yi i kpɛdɔma, akwu mu i gyi ma yi mo, kwuwongu Ukpo gba a gyi tee li yi tayi le, Tetete ki yi eyifulomo 21 te apula iyi bɔkɔ Ukpo e wo yi awu oo wa yi ma mu rinye ingyi ivama akwɛyi i kyo mu inzumbɛku iyi ɛmɛ umba Ukpo umba bɔkɔ o wɔ ma mu rinye e awu i rimo.
22 Ki yitu te apula iyi bɔkɔ o wo yi le lɛɛbi i yi mu ibɛma nzhii ba ɔnɛ te kyamate ofya umbu kwomba tayi. 23 Akwu ɛnyi kɛɛkyi mo, kinzu mafyi nzu umba bɔkɔ ki yi Kwundu uwu bɔkɔ akwu rɛshi ingyi Ukpo ingyi kenze awu, ki yi mu ibɛma mu egbo nzu mate bɔkɔ ki rima ki gbo la Ukpo kaa la ra nzu le wo ɛmɛ wu kaa la wa nzu ma mu rinye. 24 Moo akwu mu eyi i fulomo ɛlɛ gba o sa nzu ma le, Ba kiya ingyi bɔkɔ ki fulo eyi ngyi awu gba ki ma ngyi-aa akwu eyifulomo fo. Uwe bɔkɔ e fulo eyi mu kiya ingyi bɔkɔ e yi ngyi-e? 25 Akwiyi gba ba ki fulo eyi mbaa kiya ingyi bɔkɔ ki di yi ngyi-e mo, ki yidu mu irima.
26 Tatayi gba Kwundu a mbwa nzu ma mu inyashi nzu le. Moo ki yitu ewo iyi bɔkɔ i fate la ki lɛ Ukpo mo. Kwundu mafyi wu gba a kpa ɛshɛku laa Ukpo kwuwo nzu la ibɛma iyi bɔkɔ kenzu ke do yi isomo mo le. 27 Ukpo uwu bɔkɔ e feyi mɛzhi iyi egbo iyi onzu awu, e yitu iyi egbo iyi kwundu, kwuwongu kwundu a kpa ɛshɛku la Ukpo kwuwongu enzu wu ewo iyi bɔkɔ Ukpo a gyi.