28 Ki yitu tee mu kiya ingyinangyina Ukpo ee wo ɛduma iyeshi laa enzu umba bɔkɔ o pwu idɛnyi wu, umba bɔkɔ uwu a ya mba ma mu ewo iyi bɔkɔ Ɔkwu a gyi. 29 Moo enzu umba bɔkɔ Ukpo e yitu mbo kpeke awu, umba gba a ŋa mba kaa lo yi kyamate Umɛ wu le, kaa Umɛ awu lakwu Umɛ uwu kwonze meka iyi wa mbwalu guruguru. 30 Enzu umba bɔkɔ Ukpo a ŋa mba awu, umba gba a ya mba ma le, umba bɔkɔ a ya mba ma awu, umba gba e lo mbo mesu mbala ɛwu le, umba bɔkɔ e lo mbo mesu mbala ɛwu awu, umba gba e shi mbo inzumbɛku wu le.
Idɛnyi Iyi Ukpo Mu Okrasi Ɔzhizɔsi
31 Kwuwo kwɔlɛ ki so tee fo, akwiyi gba Ukpo e yi mbala nzu, uwe bɔkɔ e do ewa ikirimo mbala nzu? 32 Ukpo a nyi nzu Umɛ wu ma mo, a ra wu e shi nzu lɛɛbi, ii wo te bɔkɔ akwu apula lɛɛbi e shi nzu rɛshi mo? 33 Uwe bɔkɔ e fu ombu e lo enzu umba bɔkɔ Ukpo a ŋa, Ukpo gba e to ombu a sha mba le. 34 Uwe bɔkɔ a ngbɛ onzu ombu uwoyi? Akwu Okrasi Ɔzhizɔsi uwu bɔkɔ e kpomo, uwu bɔkɔ e yi mo bɔkɔ e yi kwunyɔ, ba a ŋɔma mu kwuwo ungwungyi ungu Ukpo bɔkɔ e yi mu ɛshɛku ikpama kwuwo nzu! 35 Uwe bɔkɔ aa ka nzu ma mbala idɛnyi iyi Okrasi? Inyashi naa kinɔ naa rigɔ naa rewa naa lonzu naa uzhi widɔ naa iyi ilomo naa lukwu ŋa? 36 Mate bɔkɔ o ka yi ma mu kwokpo ungwu Ukpo tee:
<<Kwuwo ŋɔ gba ki ŋɔ mu iyi iyi lukwu kwuye ungunanguna le;
o wo nzu kyamate ilɔ umba bɔkɔ o sheye mbo mu ingbɛma tayi.>>
37 Ayi mo, mu apula ɛlɛ lɛɛbi ki bima i zɛ mu onzu uwu bɔkɔ e pwu idɛnyi nzu awu! 38 Moo Imi mi yitu te kiya kinyinyi ki do nzu i kama mbala idɛnyi wu mo, kala lukwu naa kwunyɔ, naa alɔgbulɔ umba Ukpo, naa eyo umbeyi, laa kekelele naa kwu ta kwu sheye keyi, naa ekpasu iyinayina, 39 naa ɛzhi iyoshi, naa indomo, naa apula iyi bɔkɔ o wo yi lɛɛbi, iyi bɔkɔ ii do te ii ka nzu ma mbala idɛnyi iyi Ukpo iyi bɔkɔ i yi mu Okrasi Ɔzhizɔsi Ɔkwu nzu, i yi mo.