Mikiyyaasikaa Raaga 1

Samaariyyaxxanna Iyyerusalemmixxa Oodhishsha

1 Iyyo’ataami, Akazinna Hiziqiyaasi weli duuka Yihudaka boga moonee galchinaamma sane Duuchchi Woddik Gootti Moreesheetichcho Mikiyaasi’ni Samaariyaaxxeenna Iyyerusaalemixxee leelishshee’na’a uudeexxi waleelle konneechchi butti’a hexxeexxen.✝1:1 2 Moy. 15:32—16:20; 2 Moy. 18:1—20:21; 2 Odo. 27:1-7; 28:1—32:33.

2 Koo arda ha’no duuchching laqqe!

Tee buttaa, ise giddo hexxineek duuchchinna caqasse!

Duuchchi Woddik Gootti ifike woyyichcha Galmanaa’nl,

Lumok Duuchchi Woodiki Gootti iima ha’no’n dhugaa kula’neen.

3 Kunnise Duuchchi Woddiki Gootti ifike galdumanaa’ni daga’neenni;

dirre dageexxinna buttatixxe koobuwwa hana mareemmaan.

4 Iitti koobuwwanna isi hunda baqqaan;

dhooquwwatinna hashaki hitaan;

Giirati edo hexxeexxe gagashsha

tarbatenaa’n adade yaa’amake wodi’ishsha kaddaan.

5 Tinni duuchcha kaddaak Ya’iqoobixxe balleessaxxe,

Isira’eelike ardixxe cubboxxeeten.

Ya’iqoobixxi balleessa maachcho?

Samaariyaatebaata?

Yihudak qephphitte magenoonfachchotixxi bakka maachcho?

Iyyerusaalemitebaata?

6 «Tennexxee ani Samaariyaa oletixxe tuulo,

weyine kaasendaaxxe bakka assannon;

Kino isexxanna dhooqa giddi’a lolaasannon;

booso isexxanna xuddi assannon.

7 Isexxa fakkuwwa duuchchanna butuchchannon;

iseke galmixxi uwwaarinna giirati itendaan;

isexxa misiluwwa duuchchanna balleessannon.

Ifi’a uwwa yaababulleti bukki assexxemmashsha

ta’anna bukki assexxemmaxxi uwwa ise yabaabulle ifixxe adhitaake hira kadaan.

Yihuda’n daggaaxxa rakko

8 Ookkonneechchi udumi’a Mikiyaasi yaadenexxi oodhanon;

lekka duwwixxenni saali belo hedhannon;

Jeedaliishsha raaranoni,

urungotishsha yuusa’ni oodhaannen.

9 Saamariyaxxi mada fayyitaaxxebaan,

tinninni rakko Yihudaana gelte;

Anke ardixxe e’yatixxe hulanaa’ni

Iyyerusaalemi qico’ni geliteen» hiyye.

10 No’o’ni gelteexxa rakko Gaati hedheke no’oke naphuwwa’ni kuldinoqqe’e.

Iittanna Ookko ooxxinooqqe.

Betioofira hedheeke no’oke manni giddo,

bukote’ni gangalatinna’ni oodhe.

11 Ha’no Shaafiriki ardi booji’endine,

saali belo hexxinaa’ni shookkina’ni me’e.

Tsa’inaaki ardinna ifike qachchanaa’ni gadhi’a fuloqqe.

Beti’elinaa’n fulle;

Umo isenge’ninni oodhishshatixxe bakka kaddammaxxee

Beti’etseeli giddo golatinaaxxi bakka hexxabaan.

12 Rakkotenaa’ni gatiyyotixxe yortenni,

Maarotii hedheek ardi wixxir hiyyati,

wixirataan;

Iyyerusaalemixxe hula qico’ni

fuggoxxe yaane Duuchchi Woddike Goottanaa’ni dagge’een.

13 Ha’noo koo Lakishi hexxineekir,

fadhaduwwa sarageelik welti abidisse;

Tsiyoonixxi meyyaxxi belto,

cubbotixxe siretixxe amamman;

Isira’eelixxi balleessa,

ha’no’ni afende’een.

14 Koo Yihudak arda, ha’no Moreesheti Gaati’a,

nage’iki hedhi hiyyatixxa uwwa uutinaan; Akizibiki ardinna Isira’eelika moyanijuwwa sobaan.

15 Ha’no koo Meriisa hexxina’neeke arda!

Ha’no’o injifataaka naapha iyyedagannon;

Iikki Isira’eelik ulfinna kade’eek

Adulamixxe wo’lo’o’ni sho’ommaan.

16 Ha’no eetinaaxxe ha’nooxxe oosexxee

yaadoti umo ha’noka haaxxe;

Umo hanoka allaatetike umishsha qunca’we;

insa’ne ha’nonaa’ni booji’oti adhdhemmaan.