Mikiyyaasikaa Raaga 3

Akeekisanjuwwinna Wabeeko Xixende

1 Ookkonneechchinni uduma ani insa’ne’e hiyyenee qici:

«Ha’no Ya’iqoobike ardik akeekisanjuwwi;

ha’no Isira’eelik minik galchaluwwi laqqe

Dhugatixxa murte ege’na ha’no’a hasissaabata?

2 Ha’no kinni eloxxa gibbinee fuggoxxa eetineen;

Ardi ankika goga duldineen;

maala insa’nekanna soqqinee miqqe fulchitineen.

3 Anke ardika maala ittineen;

gogakanna duldineen;

micco insa’neekanna enqitineen;

Odolchote’ni ganfammashsha maala insa’neekanna kukkutineen.»

4 Insa’nenna Duuchchi Woddike Gootibaa raarraan;

yaane kinn isi raarre insa’neexxa laqabaan.

Insa’ne hunjeexxe fuggoxxe hujenaa’ni kexxeexxa;

ookkone wodda isi alba ifika insa’nenaa’n hoyyedhaan.

5 Duuchchi Woddiki Gootti hiyya’nee qici:

«Arda anka dedhissa’neexxe dharameeyye wabeekkonaa’ni

manni insa’nee itise ha’wisaa wodda ‹Nage’i hedheen› hinaan;

Itinse ha’wisa gonphoole kinni.

Bogake’n bagedo lassino’a ke’naan.

6 Tennexxee hashsha waleella belo,

dukkanatinna mitte haaso’i belo,

insa’ne’n daggaan;

Wabeekote’n arishsho dukkandaan;

baratinna insa’ne’ni dukkandaan.

7 Mageni hiissichcho insa’ne’a uwwa gophemmaxxee

waleella udamaakiir shookaan;

Edi’a kaddaaxxa kulamakiirinna salphataan;

duuchchingi alba ifika buqedhaan» hiyye.

8 Ani kinni;

Ya’iqoobi’a balleessa isixxa; Isira’eeli’anna cubbo isixxa kulannoshsha

Hunna Duuchchi Woddike Goottike hafuurinn;

dhugaatixxe murtenninna hunati wo’meennen.

9 Ha’no Ya’iqoobike minike akeekisanjuwwa;

ha’no Isira’eelike minki galchanjuwwi;

Dhugaatixxa murte tuffatinaak;

toggite yaane duuchcha dassitinaak laqqe.

10 Ha’no Tsiyoonixxa munde dunati

Iyyerusaalemika qachcha dabik ijartinaak laqqe.

11 Akeekisanjuwwi isek murte uwwa’neek mattikiten;

qesetinna rundakee hite barsiissa’neen;

Waabeekkoletinna maalaqi belo wabeekkuma haasota’nebaan;

yaane kinni Duuchchi Woddike Gootta’n irkanteexxi he’ne;

«Duuchchi Wooddiki Gootti no’on hedhebaata?

heene bifaxxi fuggoxxi yaane no’o’n geltabaani» hinaani.

12 Tennexxee ha’noxxe buuttonaa’ni keexxexxa;

Tsiyooni huccinammake fichchishsha kaddaani;

Iyyerusaalemi oletixxe tuulo kaddaan;

Woyyichchi Galmi ijaarememmak tulchchi urimee gataan.✝3:12 Erm. 26:18.