Mikiyyaasikaa Raaga 2

Hiyyeeyye Miicaake Manna’ni Geltaaxxa Rakko

1 Elobaaxxa assatee heda’ni diipheenbaa hedhee,

foggoxxee malaake manni’a aanne’e isi’a!

Hendeemmaxxa assatte dandennammaxxee bogi sooda woddaa isee muunxaan.

2 Mitte annika fichcha gabinoole hunanidinni abixxinani;

minekanna gaabbinoole adhdhinaan;

Manjokee’n mine

karrandinni seeri belo mulqe’naan.

3 Tennexxee Duuchchi Woddiki Gootti hiyya’nee qici:

«Kunnise ookkone arda’ni ba’ne iyyedagannon;

ha’nonna ookko’ni baajine fula dandeetinabaan;

Rakkotixxe yanna kaddemmaxxee’e

ta’inni elqi’a hollati mammarendinabaan.

4 Eettenne barra manni ha’no’ni qagifataan;

insa’ne yaadotixxe oodhishshanni hina’ni ha’no coorraa qici,

‹No’o ijje ba’ne’ennen;

Duuchchi Woddiki Gootti boga no’a’oka qoodeen;

Anenaa’ni bute aadhdhexxi,

karra no’oxxanna no’o booji’emmake manni’a qoqqoodeen.› »

5 Tennexxee Duuchchi Woddik Gootik ya’i giddo

fichcha hixik qoqqoodemaak ayyinna hedhabaan.

Dhariyye Wabeekole

6 Wabeekko insa’nexxi: «Raaga no’o’ni raagge;

tenne yaanuwwaxxee raaga raaggoxxee;

salphinni no’o’ni geyabaan» hinaan.

7 Koo Ya’iqoobike mini hado iitta hiyya ati’a hasissaata? Higgeenna haasonna’ni,

«Duuchchi Woddike Goottik hafuur ossabaakeeta?»

«Ori isik toggichchake kadeekee,

hiyyichchi anki eloxxa yaane assabata?

8 Duuchchi Woddik Goottinna muuxamake’ni

anke arda’ni ha’no naaphake kaddine

Kexxineen;

insa’ne loliinka yaada anffebaangi,

Lolakenaa’ni higee nage’ake hiyya’ne manna

qeerraxxa seemmanna fugantammaxxa muliqeexineen.

9 Insa’ne eloke ifike minenaa’ni

anke ardixxa melaale afeexxe karranaa’ni fulchitineen.

Ulfina anka oose insa’nexxenaa’ni,

duuchchi woddi’a gataashsha assitineeni.

10 Kunni ha’no foorfatinaake booncho kada gopheemmaxxee

kabaa’ni kexxine me’e hiyye;

Buutotinna insa’ne battone’een;

fuggoxxen gara ba’ne’een.

11 Mitti manji dharik dageexxi,

‹Heddo woyinetik bulbulixeenna machchosake ha’wixxee ha’no’a raaga raaga’ennen› hiyyoole,

konne ardi’a wabeekko kadaak isoten.»

Anjirenshanna Addachchiisa

12 «Koo Isira’eelike arda! Dhugaandinni ha’no duuchchinga bukki assaannen;

Isira’eelike ardana’ni gatteexxa hafe mitteba bukki asse iyyedagaannen;

Goodhe giddo hedheeke gedhebishsha bobba’e dheeda fuleeke horiinke haaganishsha mitteba ha’noo bukki assannon;

boonchikinna ardik wo’maan.

13 Enqaak dageexxi ha’no edo me’aan;

insa’nenna cufana enqinee fullee me’inaan;

Duuchchi Woddiki Gootti insa’nee akeeka’n

insa’nek moyanijnna ediseen insa’ne edo me’aan.»