1 Udumike barro'n

Duuchchi Woddike Goottiki Galmi ijaaremeexxi Kooba

wele Koobuwwa duuchchanaa'ni caaldee leellita

Tulluwwa duuchchanaa'ni lummexxe quba saxxan

arduwwikinna iseba'a dhi'maan.

2 Tennexxee heddo gosaki ardi dage hiyyaa qici,

«Ammee Duuchchi Woddike Goottixxe Koobabaa;

Ya'iqoobike Magenike Galmba'anna me'ino

ora Isikanna no'o'n barsiisaan»

Seeri Tsiyooni'n dagaan;

Duuchchi Woddike Goottiki hiyyichchinna Iyyerusaalemi'n.

3 Isi heddo ardu'wwixxe oddo'n murte muraan

Shiqqonna bayya hedheeke jajjabba arduuwwixxe oddo'n

hexxeexxa weli gonphphe balleessaan

Ardi wolantichcha ifika qotto

bagedokenna haantote asse giisaan.

Mitte bogiki ardi wele bogike arda'n wolantichcha ke'isabaan;

ookkonneechchi uduuma bagedinxa baranno barrataki hedhebaan.✝

4 Mitti mittingi manji ifike woyinetike hiddichchi hunda;

ifixxe Belesetike gaddissi hunda ofo'laan;

Insa'ne sodaachisaak hedhebaan;

Dada duuchcha ajajaak Duuchchi Woddik Gootti Mageni tennee haaso'e'en.✝

5 Gosa gosaki Ardi duchchi;

ifi ifike dharichcha mageno magenoonfataan

No'o kinni Duuchchi Wooddike Gootta no'oke Magenike summinni;

duuchchi woddanaa'ni duuchchi woddi qico'n me'inaanen.

6 Duuchchi Woddiki Gootti hiyya'nee qici:

«Eettene barra nafuuwwakanna bukki assannoni;

Ani booji'emeekanna rakko geltashsha assennaka;

mitte bakkaba'a insa'nee iyyedagannon.

7 Hafe gatemmak Naafuwwi,

hunememmaka jabake arda assannoni;

Eettene barranaa'ni ke'isse duuchchi woddi qico'n;

Duuchchi Woddik Gootti Tsiyoonixxe Kooba hana insa'ne'ni moyaannon.

8 Tee hore heqqatixxe Xelleephpho!

Ati Tsiyoonixxe dubarichchoke tulichcha

Edi woddixxi galcha atixxi ati'a higgaani;

mootummatiki baalloomi Iyyerusaalemixxe belto'aa kadaani.»

9 Ta'a ati itta raaritatelchi mayye'ate?

moyanji ati'a hedheba?

Ciniifata'nexxe manjichchoshsha rakkattetek;

atee gorsammakiir mudeexxeete?

10 Tee Tsiyoonixxe belto;

ciniifata'neexxe manijichchoshsha rakkati;

Ta'a qachchakenaa'n fuldettexxi

umo ugginaabi hedheeba'a marte ofo'li

Baabilooni'aanna me'itatton;

ookkonna naaphinxe anganaa'ni anjirendatton;

Duuchchi Woddiki Gootti ookko

atike naaphuwwanaa'ni ate gargaaraani.

11 Ta'a kinni heddo gossaki arduwwi

ate'n bukki hiyye'een

Insa'nenna «Ise batoteexxe kadduuni;

ille no'oxxen Tsiyooni'i qacifanta'ni uundannon» hinaan.

12 Yaane kinni insa'ne Duuchchi Woddike Goottika yaada egennebaan.

Alduumete'ni ladde bukki assinammashsha

Insa'nee bukki assaaka;

isika yaada qalli hinabaan.

13 «Tee Tsiyoonixxe belto; kexxettexxi uxxi;

siblinka gaafa ati'a uwwannon;

Sageetotixxa kotte ati'a uwannon;

gosa gosaka arda bulleessitatton»

Dabiki bukki assinemmaxxa karra Duuchchi Woddike Gootti'a

duruma insa'neexxa butta duuchchike gootti'a shiqishatton.