1 Duuchchi Woddiki Gootti hiyya'neexxa laqqe:

«Ke'we ha'noka yaada

tullichchuwwikinna hano hitinaaxxa laquun:

2 Ha'no tee koobuwwa Duuchchi Woddike Goottixxa ku'la caqasse;

ha'nonna jabaxxi buttatixxi boosuwwanna caqasse;

Duuchchi Woddik Gootti arda ifike'ni moronshate afe'een;

Isira'eelinna daabata'neexxe yaane afe'een.

3 «Anke arda ani atee maassenne?

ate'ni ba'ote kadene qicitta hitate?

amo ani'a hiissichcho uwwi.

4 Ani ha'noo Gibtsee'n fulchenne;

garbummatike boganaa'ni ha'no'o wodenne;

Ha'noo akeenkaashanna Muuse,

Aarooniinna Maaryaamii'i ha'no'a ergenne.

5 Koo anke ardaa,

Mo'aabik moyanji Balaaqi mari'atemmaxxa,

Bi'oork belti Bele'aaminna uwwemmaka hiisichchonna amme hedde;

Duuchchi Woddike Goottixxa qullumatixxa huje egendino'a,

Shiximinaa'n Geligeela qico'n me'itinemmaka ha'noka me'injo amme hedde.»✝

6 Maa abixxee Duuchchi Wooddike Gootti edo shiqanno?

Lumoke Mageni edo sagadanno?

Ciincatika tolcha

mitte woggaka jibbichcha abixxe isi edo shiqoota?

7 Kuma gedhebiinxe korbeeyyen,

tomme kuma dhangalasendaaxxe ejersiinxe zayite'n Duuchchi woddik Gootti gammadaata?

Anxe balleessaxxee anka angafa belto,

anxe lubboxxe cubboxxee anke godobixxa gumma isi'aa shiqishshannota?

8 Koo manjo, isi eloxxe kaddeexxa ate'ni leellishe'een;

Duuchchi Woddik Gootti atenaa'ni hasaachchi maacho?

Dhugaa hujjota'a, mararittotanna eetota'a,

atike Mageni edonna ba'lunteti me'ittatobaata?

9 Summa atika sodaatiyyo beekkumaken;

caqasse! Duuchchi Woddik Gootti konne qachcha hiyya'ni ye'a'nee qici,

«Tenne siqqichcho hedde,

ise qophpheseekinna aate kadeexxa qaabante.

10 Koo fuggoke ardaa,

seeri belo afendeexxa ha'noxxa karra,

dharchcha saffarsanjinni bukk asexxineexxa diqachchiissaaxxa yaane ani dedhanota?

11 Seeri beloxxa kiilo afeeka manjo,

dharitte kiiloka kiilsanjo kollonjo'n gudunfedheeka manna ani uuda'n waalannota?

12 Dureeyye isexxi fuggoxxa assitaaxxen;

isek manninna dharichchake;

insa'nek arabinna lameken.

13 Tennexxee atee balleessanno;

cubbo atixxenaa'ninna kexxeexxa ate'e diigannon.

14 Ittatton yaane kinni godditaboxxon;

godobi atikinna hedheeshshanni duwwike kadaan;

Tuu'litatton yaane kinni ati'a qusemabaan;

bukki assexxetelcho ani wolaantichchake sa'isse uwwannon.

15 Wiilstatton, yaane kinni aassexxaboxxo;

woyinetixxa atixxa zayite miicexxatton, yaane kinni zayite eetene issattaboxxo;

woyinetanna woxxexxatton, yaane kinni woyinetixxa booka ha'witaboxxo.

16 Ha'no Omirxa aada,

mowanjo Aki'aabika adaba duuchcha hordoffinemmaxxeeten;

insa'neka galdumanna hordofina'neen;

Tennexxe ha'noo balleessatee,

atika ardanna qacifachotee sa'isse uwwanno;

gosa gosak ardinna ate'ni qere qere hiyyaan.»✝