1 Qeesetiki akekisanji Eliyaashibinna qeeseti dayyuwwi isiki hujete'e ke'ne; Gedhebiinxe Hula hiyyemaaka haaroba qammalchine ijaarre. Woyyoonsine; cufanuwwakanna bakka bakka'ninni uurrinse. Dhibba xelleephpho hinaaka kinjinka dalla'anna Hanaani'eelixxe xelleephpho hinamma boonchi qico'n hunjeexxi woyyoonsine. 2 Ookko'n itti aancheexxi Iyyaarikoki manni ijaare; insa'neeke'n itti aanche higgeeni Imeerik belti Zekkuri ijaare.

3 Qulxu'metixxe Hula hinaaba Haasina'ixxi oose ijaarte; insa'neenna utuphuwwwa uurrinseexxi cufanuwwa, danqarisanjuwwakanna maaxxafuwa booncho booncho'ninni assine. 4 Haqoosike beltik belti Uuriyaki belti Meeriimoti ookko'ni itti anaaka dalla'a qammalche. Iso'n itti aandaxxa Meseezeebeliki akka'i Berraakiyaki belti Mesulaami qammachche ijaare. Iso'ni itti andaaxxa Be'aanaki belti Saadoqi qamalchine ijaare. 5 Itti aanaaka dalla'a Teequhaki manni qammalche; Ja'labuwwi insa'neeki kinn hujisaammake manni hunda he'ne hunjo'a eenebaani.

6 Dullatte Hula Fasehaki belti Yoodaahenna Beesoodiyaaki belti Mesulaami qammachchine; insa'nenna utuphuwwa uurrinseexxi cufanuwwa, abixxinaammalchonna danqarisanjuwwa booncho booncho'ninni assine. 7 Insa'ne'n itti aancheexxi qammachchatixxa huje hujeeki Efiraaxisi wido hedheeke galchanji hunda he'neki Yaadoniki Gaba'oonikenna Mitsiphphake manni Geba'oonike Meliixiyanna Meroonotawike Beyyaadoninitemmani. 8 Worqe baqisammakri giddii'n mitti Haarihayaki belti Uzi'eeli itti aanaaka dalla'a qammalche; shitto giisaammakiri gidi'n mitti Hanaaniya kinn ookko'ni itti aancheexxi qammalchine. Insa'nenna «Ba'lake Dalla'a» hinaammake boonchi qico'ni Iyyerusaalemi qammalchine. 9 Ookko'n itti aandaaxxa Iyyerusaalemika awuraajja gamisa galchaammaki Huuriki belti Refaaya qammalche. 10 Harumaafiki belti Yidaaya mini isiki edidarre hedheeka dalla'a qammalche; Hashabeniyaki belti Haxxuusi kinni itti aandaaxxa qammalche. 11 Hariimiki belti Melikiyaanna Fehaatimabiki belti Hashuubi wele dalla'uwwanna Laangotixxe giiraxxa Xelleephpho qammalche. 12 Iyyerusaalemika awuraajja gamisa galchaammaki Haloheeshek belti Shaaloomi dubarri ifikinni welti itti aandaaxxa kutta qammalche.

13 «Dhooqatixxe Hula» hinaaba Hanooninna Zaanohi hedhaammaka qammalchine; cufanuwwakanna booncho booncho'ninni uurrinse; maxaafuwwakanna danqarisanjuwwa giissine; ittanni «Kora hunaaxxe Hula» hinaake boonchi qico'n hexxeexxa mitte kuma ciqile dalla'a qammalchine.

14 «Kora hunnaaxxe Hula» hinaaba Beetihakaremika boga galchaammaki Rekaabiki belti Melikiya qammalcheechchi uduma cufanuwwa, maaxafuwwakanna danqarisanjuwwa booncho booncho'ninni aase.

15 Mitsiphphaka boga galchaammaki Kolihaazeki belti Seloomi, «Muummetixxe Hula» hinaaba qammalchechchi uduma cufeexxi cufanuwwa booncho booncho'ninni aasse; maaxafuwwakanna danqarisanjuwwa giisse. «Moyanjiinke hiddichchiinke fichcha» hinaa bira hedheeka Sheelake baleessika dalla'a gamii'ni Daawwitike qachchana'ni ke'isse adadde dirrinammaxxe koobbo qico'n higgeenni qammalche. 16 Isi udumi'n Beetitsurike rogika gamisa galchaammaki Azibeeqiki belti Nehimiya Daawwitike hirreessi edigama konfeemmaka balleessanna «Jannuwiinke mine» hinaake boonchi qico'n hedheeka qammalche ijaare.

17 Iso'ni itti aanche Leewwichchi Baaniki belti Reehuumi akeekaa'na qammalchine ijaarre. Itti aanchexxi Oi'iilaka awuraajja gamisa galchaammaki Hashabiya gateeka dalla'a qammalchine. 18 Iso'n itti aaneeka dalla'a kinn weli Qi'iilake awuraajjika gamisa galchaammaki Henadaadiki belti Baawayinna isi galchaammake boga ookkoneki mann qammalche. 19 Iso'n itti aaneexxi loliinka miya massinaammake minibaa gesisaammakanna kasiinbaa me'inaamma edi darre hedheeka wele dalla'a Mitsiphpha galchaammaki Iyyaasuki belti Eetsiri qammalche ijaare. 20 Iso'n itti aaneexxi Zabayiki belti Baarooki kasakenaa'n ke'isseexxi qeesetike akeekisanjike Eliyaashibike minibaa e'yinamma qico'ni hedheeka wele dalla'a jabaate qammalche ijaare. 21 Iso'n itti aancheexxi Eliyaashibike minibaa e'yinammabaa'n ke'isseexxi muuxamini qico'n hedheeka wele dalla'a Haqoosike beltik belti Uuriyaki belti Meriimooti qammalche.

22 Iso'n itti aane'e hedheeka dalla'a qarqarakenaa'n daggeexxi qeese qammalchite. 23 Insa'ne'n itti aanchineexxi Biiniyaaminna Hassuubi mini edi darre hedheeka dalla'a qammalche.

Insa'ne'n itti aanchexexi Hananiyaki aka'i Me'iseeyaki belti Azaariya mini isiki bira hedheeka dalla'a qamachche ijaare. 24 Iso'n itti aancheexxi Azaariyake minibaa'n ke'isseexxi kasin qico'ninna kasiinxe qacce qico'n hedheeka dalla'a Henadaadiki belti Biiniwwi qammalche. 25 Uuzayik belti Falaali dala'inke kasi edigamii'n heqaqnji heqqaammake ba'linni bira hedheeke iimi darreka galchatika mine heqinaammake kinjiinke dalla'ibaa'n ke'isse hedheeka dalla'a qammalche ijaare. Iso'n itti aancheexxi Faarosiki belti Fadayanna, 26 Oofeeli hinaake tullichcha'ni hedha'neeki galmiinki erganjuwwi «Wodi'iinxe Hula» hina edigami'ni ke'ise boroti darree'n hedheeke kinjiinxe xelleephpho qico'n qammalche.

27 Insa'ne'n itti aancheexxi Teequ'aki manni xelleephpho qico'ni Oofeeli hedheeka wele dalla'a qammalchine.

28 «Fadhadiinxe Hula» hinamma iimi darre hedheeka kinni qeese mitte mittendi mini ifi ifiki edidarre hedheeka qammalchite ijaarte. 29 Insa'ne'n itti aancheexxi Imeerik belti Saadooqi mini ifiki edi darre hedheeka qammalche ijaare. Iso'ni itti aancheexxi «Borotixxa Hula» heqqaammaki Sekeenyaki belti Shemaya qammalche ijaare. 30 Iso'ni itti aanaaka wele dalla'a kinn Selemiyaki belti Hanaaniyanna Seleefiki jiyaba ilemeeki belti Hanooni qammalchine ijaarre. Insa'ne'n itti ancheexxi Berraakiyaki belti Mesulaami mini isiki edidarre hedheeka qammalche ijaare. 31 Iso'n itti aancheexxi worqe baqisammake mannanaa'n mitti Meelikiya fattanshammaxxe hula edigama hedheeke galmiinke erganjuwwikenna daddalanotike mini qico'n, ittanni kasi iimi darre hexxeexxe kuta qico'n hedheeka qammalche. 32 Kasi iimi darree hexxeexxe kutabaa'n ke'isse Gedhebiinxe Hula qico'n hedheeka kinn worqe baqisammakirinna daddalanno qammalchinee.