1 Ookkone wodda labballikinna aruwwa insa'neexxi Ayihudiinke ifike dayyuwwibaa ku'lat jaba qicinni cancine. 2 Mitti mittingi «No'onna kadi labbaxxinna meyyaxxe no'oxxe ooseki laakkossi heddokeni; hedhoti he'nannoshsha ita no'o'a hasissaani» hine.

3 Weli manni hiyyee qici, «Solo'i no'o'ni itti jabaateemma wodda midha alfinnonaa hine boga no'oka, woyinetike hiddichchika fichchanna minuwa no'oka abidinsenneni» hine.

4 Weli manninna hiyyee qici, «Fichchuwwa no'okanna woyinetike hiddichika fichcha irbo moyanjokee uunonna'a maallaqa liqeesse'nanno qico'ni» genneenneni. 5 Fedheexxenna kaddoole midde bogi no'okike manninni welti mitte maalanna mitte munde kandonnolenna; insa'neexxe ooseshshanni no'oxxi labbaxxi oose danchate kaddoolenna; labbaxxanna meyyaxxa no'oxxa oose garbake kando'a uunenneni; mitte mitte meyyaxxi no'oxxi oose ta'anna garbake kadde'eni; fichcha no'okanna woyinetika hiddichcho no'oka weli manni adhdheemmaxxee gophaaleeyyete kandeenneni.

6 Aninna raare insa'neexxanna tenne ku'linneexxa ku'la laqennexxa yanna yo'oshsha aarenneni. 7 Ookkoneechchi uduma yaane tennee hede uudennelchchi uduma Ja'laabuwwakanna Jalqabuwwa hiyyennee qici: «Ha'noonna ha'noonge mannanaa'ni hitta dhala adhdhitina!» hiyye insa'ne xixenneni. Tennexxee insa'nenni welti haaso'atee yo'oka manna bukki assenneni.✝ 8 Aninna «Gosa gosake ardi'a guriguremeemaka dayyuwwa no'oka Ayihudoota dandeenneenne qico insa'nee anjirennen; ha'no kinni dayyuwwa ha'nooka gurgurtinaani; tinninna insa'nee hiisine anjirronna callaten!» aninna insa'ne'e hiyyennen insa'nenna hinaaxxa gonphe sammi hine.

9 Tennexxe higgeenni hiyyennee qici, «Tinni assitina'neexxi yaane eloxxebaani; naaphuwwi no'oki gosa gosak ardi no'oo yowwabaashsha Mageno no'oka sodaata ha'no'a hasisaaba? 10 Ani, aniki dayyuwwinna aniki erganjuwwi ittani ardake mallaqakanna midha liqeessineenneni; dhala adhdhinabo'no. 11 Fichchuwwa insa'neeka, woyinetikanna ejersiinxe zayiteka hiddichchiinka fichchuwwanna minuwwa insa'neeka duuchcha ta'anni rakkine hiisse; ittanni midha, haaroka woyintika bulbulo insa'neeka, ejersiinxa zayite, adhdhitineemmaka maallaqa insa'nee'a hiisse.»

12 Insa'nenna, «Hiissinannoni; mittelchonna insa'nenaa'n dhala lanqabo'no; ati no'o'a hitetteshshaanni assinannoni» hine. Qeesetanna ye'e'neeni; Ja'laabuwwinna Jaliqabuwwi hineemmaka hiyyichcho muunxaashsha kakachiisenneni. 13 Ittanni ani fiyisanjonna aadhe seemma anxa fiyennexxi,* «Konnee addetika hiyyichcho muuxabaaka fedheeka manjo Mageni mine isikanna karra isixxa iitta fiyowwaal; ittanni duwwi gatowwaali» hiyyenneni. Ookko hedheemmaki ya'i duuchchi «Ameen» hiyyeexxi Duuchchi Woddika Gootta galateeffate; ardkinna hiyyeemmaka hiyyichcho muuxxe.

14 Konneechchi iimi darre ani Yihudiinka boga galchannoshsha hariiremennelchinni; Arixxeekisiissi moyexxe lame tomme wogganaa'ni ke'isse; sase tommenna lame wogga mootummatike bari qico'n, aninna dayyuwwi aniki tommenna lame wogga qico'n boga galchaammakee uunaammaxa ita adhdhine indebe'noni. 15 Ani edigama hedheemmaki ediki galchanjuwwi kinn itanna woyinetika bulbulo waalini ardake'ni jabaxxa ba'o ba'isati shoole tomme birreti sibljo adhdha'nemmani; insa'nee gargaaraammakiri iittanni ardake'n ba'o ba'isa'nemmani. Ani kinni Mageno sodaatatenaa'ni kexxeexxa iitta hexxexxa yaane assebo'noni. 16 Iitta assati irra ani dalla'inxe huje'a ifi sa'isse uwwenneni. Anki manni duuchchi hujete'e ookko'o bukki hiyyeemmani; no'onna mittelchonna boga anfeennabaani.

17 Konneechchi iimi darre qarqara no'okibaa'a dageemmake gosa gosake ardi gadho mitte dhibbanna onde tommi Yihudiinki manninna Jalqabuwwi qore anxenaa'ni inda'nemmani. 18 Barra barra'ninni mitte jibichcha, jaane ha'yeeki gedhdhebinna heddo lukko tomme tomme barra'n heddo gargaritti hedheeka woyinetika bulbulo ani'a qophphessina'nemmani. Tinn duuchcha kadda'naani mitte boga galchaake manji'a hasissaxxa ita hara laqe ege'nebo'noni. Yaane kinni ardake'ni ba'iseexxa ba'o ani ege'neennaxxeeten. 19 Ee, anike Mageno, konne ardi'a assennexxa duuchcha heddettexxi eloxxa an'a assi.