1 Senbalaaxi dalla'a qammalchine ijaarra'neexxa laqeexxa yanna aare; yo'oshshanna mufate. Isinna yihudoota cee'me. 2 Jaaluwwi isiki edonna Semaariyake loliinke manni edo «Kunni hunna afebaaki yihudooti maa asso'a hedee? Dalla'uwwa qammalche ijaaro'ate? Tolcha shiqinsho'aate? Mitte barra'ni ijaarre birro'aate? Iitta gubate oletishsha tuulendeexxa kino hiissa dandeenno'aate?» hiyye.

3 Isi bira uurreemmaki Amoonichchi Xoobiya, «Isi insa'ne ijaarra'neechchi maachcho? Insa'ne kinjiki ijaarra'neeki dalla'i jeedali midde da'moole diigemaaken» hiyye.

4 Ee, Mageno no'okee, tuffatensha no'oxxa laqi; no'o arrassina'neeki arrabi insa'ne'ni higgaashsha assi; insa'nenna booji'emme me'ineeke boga'ni doosa kiyya hinaashsha assi. 5 Diigemeemmaka qammalchate'n hedheeka manna yowwineemmaxxee balleessa insa'neexxa gattowwaali hitoxxe; cubbo insa'neexxanna deetoxxe.

6 Ardi mitte godobinni hujaammaxxe'e, no'onna dalla'a gamisin qico qammalchinenneni.

7 Senbalaaxi, Xoobiya, Araabito, Amoonito Ashidoodiki manni; Iyyerusaalemike dalla'ixxi huje muddamiki hujemate'ni hexxeexxanna duwwika booncho duuchcha wonshate'ni he'neexxa lanqeexxa yanna yo'oshsha mufante. 8 Insa'nenna Iyyerussaalemi'i lollo'anna rakkisate'e duuchchiingi mitteba guddine. 9 No'o kinn no'oke Mageniba'a soodantenne; hashshanna barra afo'o fulchedha'ni sodaachisaaka manna ugginenneni.

10 Ookkone wodda Yihudaki ardinna, «Hujaammaki manninna hunna gopheen; tulendeexxi ole birasaxxeemmaxxe'e dalla'a qammalchine ijara dandeenaabo'noni» hiyye.

11 Naaphuwwi no'oki kinn «Oddo insa'neexxe'ni e'yine insa'ne shinnanno qico'ni huje insa'neexxa uurrinsaanno qico'ni egennabaani yookaani anfabaani» hiyye.

12 Ookkoneechchi uduma insa'neek qarqara'ni hedhaemmaki Ayihudooti dageexxi, «Ha'no hoone booncho'ninna hexxinoole; insa'ne no'o lolle miidha gattabaani» hine tommele lenbe lenbe no'o'a kulle.

13 Tennexxe dalla'i uduma aadi darrre hedhek farri hiyyeeke booncho'ni ardi giddii'ni mitti mitti ifika wolaantichcha, bageduwwakanna gabuwwa abixxeeshshanni ifi ifike mini hadinni booncho abixxaashsha assenneni.

14 Aninna yaane kokeessedhe uudennelchchi uduma Ja'laabuwwa, Jalqabuwwakanna gateeka arda duuchhca, «Insa'nee sodaattinoqqe'e; lummedheekanna sodaatemeeka Dada Duuchchika Gootta hedde; dayyuwa ha'nookixxee, labbaxxenna meyyaxxe oose ha'nooxxee, aruwa ha'nooxxeenna mine ha'nookeenna karra ha'nooxxe'e lolle» insa'ne'a hiyyenneni.

15 Naaphuwwi no'ok gudda guddeemmaka egenneennaxxee Mageni heduma insa'neeka toliinke asseexxa insa'ne lanqee wodda no'o duuchchiingi dalla'iinxe hujeba'a, mitti mittingi ifi ifixxe hujeba'a hingenneni.

16 Ettene barranaa'n ke'isse anke manni giddii'ni gamisi huje hujaamman; gateeki kinni wontenna bagedo, gabetanna loliinxa seemma abixeemman. Loliinke mannik akeekisanjuwwi Yihudiink ardi duuchchi uduma uurre; 17 insa'nenna dalla'a ijaadhineemman; miya ba'edhaammaki manni mitte anganni huje hunja'ni; wele angani loliinka miya abixxineemmani. 18 Mitti mittingi kinjiinka dalla'a ijaadhdha wodda wolaantichcha hidhake'n ka'leemmani; malagata ufuufaammaki manjichchi kinn ani birii'ni gargari higaammabaani.

19 Ookkoneechchi uduma Ja'labuwwakee, Jaliqabuwwakeena gateeke ardi'a hiyyennee qici, «Dallaliinxi huje lumooxxenna ba'laxxe kaddeemmaxxe'e no'onna welina'ni yo'oshsha bayyantee he'nenneni. 20 Ha'nonna malagatiinka hafuura laqqina wodda, no'oba'a bukki hiyye. Mageni no'oki no'o'a lolaani» hiyyenneni.

21 Tennexxe boro haachchabbaaxxe yannanaa'n ke'isse urje fuldaa qico'n gamisi manni bagedo ifika abixeeshshanni huje sannfenneni. 22 Ookkone wodda arda ifikee hiyyee qici, «Hashsha heqqa'ninna barra huje huja'ni no'oo gargaaraashsha mitti mitti manji ifike gargaarsanjinni Iyyerusaalemi turowwaali» insa'ne'a hiyyeneni. 23 Anttenna kadi aniki dayyuwwi, mannakeenna kado'o aninni welti hedheemmaki heqqanjuwwi seemma no'oxxa fulche'nebo'noni; wode'e me'inanno wodda midde mitti mittingi manji loliinka miya abixxinennashshanni he'nennani.