1 Eettene yanna qico'ni hulate'ni cufanuwwa aassa gophonnolenna, dalla'a ijaare muuxennaxxenna gateeki duwwiki boonchi hedhebaaxxa Senbalaaxi, Xoobiya. Arabichchi Gesheeminna weli gateemmaki naaphuwwi no'oki midde laqeexxa yanna; 2 Senbalaaxinna Gesheemi, «Oono hiyyemaake dida'n hedheeke olla'uwwi giddii'ni mitteke'ni afemonna'a amo hine dhaansa ergine.»

Yaane kinni insa'ne tenne assine'ek ane'e fuggo miino'a hendeetemman. 3 Aninna «Jabaxxa huje hujate'ni hedheennaxxe ha'no hexxineeke boonchiba'a daga dande'aabo'noni; waale ha'nooba'a dagee'na huje mayee'e uurrita?» hitaaxxa hiissa insa'ne'a gulaaka erganjuwwa insa'ne'n ergenneni.

4 Shoole yanna tenne bifaxxa erga aniba'a ergine; aninna mitte mitte yanna'ninni etteneenni hiissa insa'ne'a hiissenneni.

5 Ookkoneechchi uduma Senbalaaxinna edi woddishshanni erganjo ondixxe yanna'a aniba erge; ergememmaki borreessi hyyamma qici: 6 «Atinna Ayihudik ardi jallote'e mari'atina'neexxanna dalla'a ijartina'neexxa ardi giddo haaso'endeeni; Geeseminna dhugaate kaddeexxa kokeen; higgeenna haso'endemmashshanni ati insa'neeke moyanjo kaddaattexxa, 7 atixxe'ee ‹Yihudi giddo moyanji hedheeni› hine Iyyerusaalemi giddo lallabbaaxxa wabeeko midde harirtettexxa haaso'endeeni. Tinni yaanenna moyanjoke'ni geltebaaki gattabaani; tennexxe dagge'naa'a atinni tenne yaanexxee mari'antennele eloxxen» hitaaxxemman.

8 Aninna, «Ati hitaattexxa fakkattaaxxi mittetinna assendeexxi yanenna hexxebani; tinni ati heduma atikenni assitettexxen» hiyye iso'ni hiisse ergenne.

9 Duuchchiingi, «Anga insa'neexxi huja gophphaa qico'ni shaqqitaani; hujetinna muuxxendebaangi gattaani» hine hendeexxi no'oo sodaachchinso'a wo'laaneen. Ani kinn «Ta'anna anga anxa jabeessi» hiyye Mageno soodatenneni.

10 Mitte barra mine iso'n cufemenaa'a giddo hedheemmake Delaaya Mexaabi'eelikika belto Shamyaba marenne; isinna ane'e «Manni ate shiyo'a dagaammaxxee, dhugaanden hashsha ate'e shiyo'a dagaammaxxe Mageniinke mine'n galmi gido afemmo; galmiinxa hulanna cunfo» hiyye.

11 Aninna knn, «Anishsha hedheeki manji baqate sho'omaa? Yookaani lubbo gatonna'a hiyye galmi giddi'a e'ya hasissa? Hiyye me'abo'noni!» hiyyenneni. 12 Ane'n wabeekumma haasonneeki Xoobiyanna Senbalaaxi maallaqiki hireemeete male'e Mageni aniba'a ergeeke manna kadebaaxxa ege'neenneni. 13 Maallaqiki hiremeemmaki ane'e sodachchisateeteni; tennee assiyyot ane'e cubbote'n ibiseexxi summa anka balleessat mannake'n gibemannoshsha assateeteni.

14 Aninna «Anke Mageno, Xoobiyyanna Senbalaaxi hunjeexxa huje uudi; anee sodaachchiso'a wo'landeexxa wabeeko No'adiyya hiyyendeexxa wabeeko uudi» hiyye soodatenne.

15 Dalla'iinki ijaarsinna Eluli hiyyemaake agenjixxe lame tommenna ondde barra'n, onde tommena lame barra giddo muuxeme. 16 Qarqara no'oke'n hedheeki naphuwwi no'ok gosa gosaki ard duuchchi tennee laqee woda sodaate; ifi saadatanna dandeenneba'a; tinni kaddeechchi tinni huje Mageniinke gargarsinni hujendeexxa egennemmaxxeeteni.

17 Ookkone wodda Yihudiinki Ja'laabuwwi Xoobiya'a heddo borreessa erga'nemmani; Xoobbiyanna hiisseexxi insa'ne'a erga'nemmani. 18 Yihudiinki bogi giddo hedha'neek heddi manninna isixxe gamo kade kakateeman; tinninna kaddeechchi Eeraki belti Sekeeniyake ballo kadati iimi darre isiki belti Hoohanaani Leerakiyaanixxa meyyaxxa belto adhdheemmaxxeeteni. 19 Tenne'ninni hana eloxxa isixxa huje yanna yanna'ni ane'n kulla'n aninna hiyyenneexxa iso'n kula'nemmani; Xoobiyanna anee sodaachchisatee borreessa ane'n erga'nemmani.