Neemias 9

Isra’eelito Cubbo Ifixxa Faacite

1 Ookkone agenjixxe lame tommena shoole barra’n Isira’eeli agabo goddo hexxe jooniya seemma odo’wite umo ifike’n buko fiffilxite mitteba bukki hite. 2 Sanne Isira’eelixxe kadeeki duuchchi alagi gidi’n fule uurreexxinna ifixxe cubbo’anna annuwi insa’neekixxe balleessa’a aadde aange. 3 Insa’nennna he’ne he’neeba uurrineexxi Duuchchi Woddike Gootta insa’neeke Magenike seerika maxaafa sase saate haaseessine gatteexxa sase saate kinni aadde anga’ninna Duuchchi Woddika Gootta Mageno ifike kumbu hine. 4 Leewwito hadhisanjoke’n hana uurrineemman; insa’nenna Iyyaasu, Baani, Qadimi’eeli, Seebeeniya, Buunni, Seeraabiya, Baaninna, Kenaani Duuchchi Woddika Gootta ifika Mageno haafura gikki assine kadhante. 5 Iyyaasu, Qadimi’eeli, Baani, Hashebaaniya, Seeraabiya, Hoodiya, Sebeniyanna Fetaya hiyyendaaxxi Leewwito: «Kexxineexxi uurre; duuchchi woddanna duuchchi woddi’a hedha’neeka Duuchchi Woddika Gootta ha’nooka Mageno saadde» hine.

Ulfeessemeeki summi atiki galateeffatemmeeke kado’o; galata duuchchana’ninna saadinoti iimi darree lummedhowwaali. 6 Atinni calli Duuchchi Woddike Goottani. Iimuwwa, iimuwwati iima hexxeexxa iimuwanna urjuwwatika sannaachchuwwa duuchcha, buttatanna ise’n hedheechcho duuchcha, abbaayyuwwatanna ise giddo hedheechcho duuchcha daddeetten. Duuchhiinge hedho uutaatten; iimi sannaachuwwi ati’a kumbu hiyyaan.

7 Abiraamii’i fildettexxi Keledaawitotixxe Uurinaa’n fulchitettexxi Abirihaamii hite summa fulchitetteki ati Duuchchi Woddike Gootta Magenoni.✝9:7 Dada. 11:31—12:1; 17:5. 8 Mitte godobinni atee addateeke kadee’naa uuddettaxxi Kenaanitotika, Hittotika, Amooritotika, Feerizaawitotika, Iyyaabusitotika Gergerisiitotika boga sanne isixxee uutottaa isinni welti kako aaggeetteni; qullichcha kaddettaxxee’e isi’a addachchiissettaxxa asiteetteni.✝9:8 Dada. 15:18-21.

9 «Ati Gibtseke boga’n annuwa no’oke’n gelteexxa rakko uddeeteni; Diimmoxxe Abbayya’ninna raare insa’neexxa laqqetteni.✝9:9 Fula. 3:7; 14:1-12. 10 Maso mambe’anna beessisuwwa Feri’ooni’ninna Jalqabuwwa isike duuchcha’n, bogake’n hedheeke arda duuchcha’n ergiteetteni; tenneenna assitetteki Gibtseki manni holla’n insa’nee hitta rakkiseexxa egendeettaxxeeteni. Telchi qico’ninna summi atiki ye’ema’n hedhaashsha assiteetteni.✝9:10 Fula. 7:8—12:32. 11 Bagoke buttinanaa’ni fonfaashsha abbaayya lameba insa’ne edii’n qooddetteni; insa’nee shorraamaki kinni lumoke wodii giddo darbinaamaake kinjishsha insa’ne dhi’mo giddi’a darbitetteni.✝9:11 Fula. 14:21-29; 15:4-5. 12 Me’inaaka ora barra duumanchik, hashsha giirati insa’nee akeekketeni.✝9:12 Fula. 13:21-22.

13 «Siinaxxe kooba’ninna dirritetteni; iimate’n hexxe insa’ne’a haasottetteni. Hasisaaka galdumanna qullichcha seeruwa, eloxxa aaduwanna ajajuwwa insa’ne’a uutetteni. 14 Woyychcha atika Edi Eanbata*9:14 Edi Sanbata hiyyendexxi barra Ayihudiinxe hafuura adhdhatixxe barranni insa’ne’a ege’nishshetteni; ajajuwwa, adduwwatanna seeruwwa erganjo atike Muuse gamii’n insa’ne’a uutetteni.✝9:14 Fula. 19:18—23:33. 15 Solo’winee wodda iimii’n maanna insa’ne’a uutetteni; dheebo’nee wodda rassatenaa’n wode’e burqissetteni; insa’ne’a uutotta’a anga farri assitete kakattetteke boga’n e’yine 'lallo’a kuldetten.✝9:15 Fula. 16:4-15; 17:1-7; Lan. 1:21.

16 «Insa’nenna, annuwwi no’oki knn hollaameeyyetenna gooba micciirre ajajuwa atikanna ajajemmebaan.✝9:16 Lak. 14:1-4; Lan. 1:26-33. 17 Insa’neexxe oddo’n hujeteke mannibe’aanna masso laqiyyonna qalbeeffata dandeennebaani. Gooba miiciidhdhine; ajajema gophati garbummatibaa hingo’a insa’nee akeekaaka baalloonse. Ati kinni gattowwaalitiki Mageni, ba’lakinna mararanji, mufetee mudandaboxxokinna gattowwaali atixxi bira saxxeekeni. Tennexxee insa’nee waaldeboxxoni.✝9:17 Fula. 34:6; Lak. 14:18. 18 Jabbetixxa fakke baqinse ifi’a giisse’ne, ‹Gibtse’n atee fulcheeki mageni konneteni,› hiyyoti ate summa luqqicha yowwinsee wodda midde insa’nenaa’n gargarti higgeboxxoni.✝9:18 Fula. 32:1-4.

19 «Atixxe marartexxe bira sa’nenaa’n kexxeexxa qiilla gammoojje’n insa’nee waaldeboxxoni; me’inaaka ora barra duumanchi hashshanna giirat akeeka waldebexxo. 20 Insa’nee barsiiso’a eloka atika Haafura insa’ne’a uutetteni; maanna afo’o insa’neekenaa’n hoyyiteboxxoni; dheeboonne wodda wode’e insa’ne’a uutetteni. 21 Qiilla gammoojje giddo shoole tomme wogga insa’nee itissetteni; mittichchi gonpheechchi hedhemmabaani; seemma insa’neexxinna muddeemmabaani; lekka insa’neexxinna darshiteemmabaani.

22 «Gosa gosaxxe mootummuwwa injifanteexxi boga insa’neeka gabalatenaa’ni gabalati qico’n dhaallashsha assitettexxi; Haseeboniki moyanji galchaa’neek Siihoonika boga, Baasaanike moyanji galacha’neka Oogika boga dhaalle.✝9:22 Lak. 21:21-35. 23 Labbaxxa oose iimixxe urjeshsha insa’ne’a bira sa’issitetteni; annuwwi insa’neeki dhaallaashsha kuldetteke boga’n dange e’yinaashsha assitetteni.✝9:23 Dada. 15:5; 22:17; Iya. 3:14-17. 24 Bogake’n labbaaxxi oose insa’neexxi e’yite, dhalde. Bogake’n hedhaammaka Kenaanika manna insa’nee edo guluffachchiissetteni; eeneeshsha assino’a Kanaanika moyanjuwwa insa’neeke boga’n hedhaammake ardinni welti anga insa’neexxe’n sa’issite uutetteni.✝9:24 Iya. 11:23. 25 Dalla’iki buqemeeka qachchuwwanna shamoka boga abixxine; elollichchi calli wo’meeka minuwwa insa’neeka, umme fulchineeka baletika wodu’uwwa insa’neeka, woyinetika hiddichchuwwa insa’neeka, ejersiinxa haqquwwanna lakkoonne dhaqqanbabaaxxa gumma ra’isaaka haqichchuwwa adhdhine. Godinaa qico’n inde; furdante; arjunte atixxe’n gammande.✝9:25 Lew. 6:10-11.

26 «Yaane kinn ajajema ginbe; ate’ninna jallante; seera atikanna ginbe; atiba’a hingo’a xexxe’achchisseexxa wabeeko atixxa shinne; ate’n fuggoka yowwichchiinka haaso’a fulche’ne. 27 Tennexxe naaphi insa’ne rakkiso’a sa’issite uutetteni. Rakkantee wodda atibaa raarre; atinna iimanni hexxe laqqetteni; mararte atixxixxe bira sa’nenaa’n kexxeexxa naaphiinxe angana’n insa’nee anjiraakara ergitetten.

28 «Yaane kinni nage’a alfinee wodda, ati edo elobaaxxa yaane higeenna hunje. Ookkoneechchi uduma insa’ne’n moyo’a naaphiinxe anga’n insa’nee ibissetteni; higgeenna atibaa raarree wodda, iimanni hexxe laqqetteni; mararte atixxenninna yanna yana’nini anjiriteteni.✝9:28 Hay. 2:11-16.

29 «Seera atikibaa hingo’a xexxe’achchiissetteni; insa’ne kinni hollaameeyyete kande. Ajajuwwa atikanna muunxebaani; mitti manji isi’a ajajemeechcho kaddeele hedhoti hedhaammaka seeruwwa sa’ne. Ajajema ginbe dudduro ate’n wirri hine; goobakanna miciidhdhine; laqatanna ginbe.✝9:29 Lew. 18:5. 30 Heddo baro insa’ne’a ossitetteni; wabeekoti darree’n Haafuri atikenni insa’ne xexxe’achchiissetteni. Yaane kinni lanqebaani; tennenaa’n kexxeexxa olla’a insa’neeke’n hedheeke gosa gosake ardixxe anga’n insa’nee sa’issite uutetteni.✝9:30 2 Moy. 17:13-18; 2 Odo. 36:15-16. 31 Ati kinni arjakenna marartaattoke Mageno kadeettaxxee gattowaali atixxixxe bira sa’nenaa’ni kexxeexxa, hara insa’nee birteboxxoni; insa’nee waaldeboxxoni.

32 «Ta’anna no’oke Mageno, aggeettaxxa kakonna duuchchi woddixxa atixxa jaalala heqqexxattoki lumoki, hunnameessinna sodaatendeetteke Mageno; Asoorike moyanjuwwike baronaa’n ke’issite techchi qico’n no’oke; moyanjuwwa’ninna akeekisanjuwwa no’oke’n, qeese no’oxxe’ninna wabeeko no’oxxe’n, edike annuwwa no’oke’ninna arda atike duuchcha’n tennee gelteexxa rakko duuchcha shollaaxxe assite uuddoxxe.✝9:32 2 Moy. 15:19, 29; 17:3-6; Izr. 4:2, 10. 33 No’oo xixxe assitettexxi duuchchi seeraken; no’o balleessanoteni; ati kinni addatensha atixxenninni hexxetten. 34 Moyanjuwwi no’oki, akeekisanjuwwi no’oki, qeese no’oxxinna edik annuwwi no’oki seera atika heqqe’nebani; ajajuwwa atika yookaani xexxe’achchiissettexxa lanqebaani. 35 Insa’neeke moyanjuwwi’a, assitettexxa lumoxxa arjuntenna insa’ne’a qophpheessitetteke ba’lakenna shamoke boga’n midde, ati’a ergantebaani; fuggoke ora insa’nekenaa’ninna hingebaani.

36 «Kunniseteni techchonna no’o garboolendeni; annuwwi no’oki isixxa gummuwwa fulchiteechcho elo elochcho indo’a insa’ne’a uuteettake boga’ninni garboolete kandenneni. 37 Cubbo no’oxxenaa’n kexxeexxa bogi fulcheechcho duuchcha no’o’ni moyaashsha assite ke’isiteeteke moyanjuwwi’a uutetten; insa’ne no’o’ninna hore no’oke’ni eeneexxa duuchcha assina’neen; tennenaa’ni kexxeexxa no’onna jabake abara giddo he’nenneni.

Ardiinxa Weli Aaggo

38 «Tenne duuchchanaa’n kexxeexxa no’onna borro borreesendee’naa eeyyunteti weli aangaanneni; akeekisanjuwwi no’oki, Leewwito no’oxxinna qeese no’oxxi maxxansa ifika itt ugite.»