1 Ati kinni hedho afendaaxxa barachcho haaso’i. 2 Woggat gakki hiyyeeki laballi danna sa’ebaak hedhashsha, ulfeesema ifixxa heqqedhaake, ifi hiraakenna amanat, jaalalatinna ossat fayyake kadaashsha gorsa insa’naa uwwi. 3 Iittanni woggati gakki hiteexxi melaalle ifike adabinni ulfateeexxe kadaashsha, eloxxe kaddeexxa barachchiissaaxxee malee manjiinka summa balleesitaaxxe kaddabaashsha yookaan woyinetixxe bookake araadinni abidendeexxe kadabaashsha insa’nee barachchiisi. 4 Iittanni ka’uma melaalle ifika aro’onna ifixxa oose eettaashsha 5 Mageniink hiyyichchi ayye’ninna ci’memabaashsha ifi hirtaaxxe, luqqitte hedho hexxaaxxenna mini giddo hujallo, ba’laxxe, ifike aro’aa ajajendaaxxe, kaddaashsha gorsa insa’ne’a uwwi!

6 Iittanni labbaxxi dargaggeeyyenna ifika umo hirteexxe kaddaashsha gorsa insa’ne’a uwwi. 7 Atinna eloxxe kadaaxxa yaane assita’n yaane duuchchinni insa’ne’a fakkeennake kadi; atixxe barachchiisanninna dhugaaleessuma, fayyumma leellishi; 8 Tuffatemabaaka fayyaka haaso’a insa’ne’a ifisi; tinninna no’oo xaa’naak manni no’oxxee haaso’aaxxa elobaaxxa yaane gophaa wodda shookaashshaten.

9 Garbi ifi ifike goottuwwi’aa ajajemaashsha, duuchchiinxe yaanenni insa’nee gammachchiisaashsha, fuggoka hiyyichcho insa’ne’n hiisseexxi haaso’abaashsha, 10 moorroqqe’e; tinninna duuchchiinge orinni anjirallo no’oke Mageniinxi barachchiisa duuchchiinxe yaanenni ulfaatto’aa, duuchchii wodda wo’ma xuurameeyye kandeexxa insa’ne’n leellinsho’aaten.

11 Manji duuchchi anjiremaak, Mageniink badhaadhi manjo duuchcha’n leelle’een. 12 Kunni badhaadhinna, cubbote’n hedhatanna butta duuchchixxa yorte murumi hiyyat konnee baro’n ifi hirat, qullummat, dhugaatixxe amanaxxe hedhonn he’nannoshsha no’oo barachchiisaan. 13 Konnee qicinni eebbisendeexxe no’oxxe adde keddeexxa, tinninna no’oke ulfateeke lumoke Mageniinxenna no’oka anjirallo Gootta Yessuusi Kiristoosixxa ulfatteexxa daga heqqe’nannon. 14 Kiristoosi no’oo fuggaalessumma duuchchanaa’n anjiro’aanna, eloxxa huje assatee halchaaka ifika arda ifi’a luqqi assedho’a no’oxxee ifixxa lubbo sa’isseexxi uwwe’een.

15 Yoona, tennee yaanuwwa haaso’i; wo’ma baalloominninna gorsa uwwi, xixxi ayyinna atee meenni tuffatowwaal.