1 ማዝሙረ ኡባፈ አያ ሶሎሞነ ማዝሙረይ ሀይሳ።

2 ነ ሲቆይ ዎይነፐ አድ ኡፋይስያ ግሾ

ታና ዛራ ዛራ ዬራ።

3 ነ ትየትያ ሽቶይ ዋንድ ሳዊ!

ነ ሱንይ ጎግያ ሽቶ መላ፤

ጌላኦት ነና ሲቀይ ሄሳሳ።

4 ታና ኔራ ኤካዳ ባ፤ አነ እስፈ ዎፆስ!

ካዋዉ፥ ታና ነ ቁሩፁዋን ገልሳ።

ነናን ኑ ኡፋይቶስ፤

ነ ሲቁዋ ዎይነ ኡሻፈ አድ ናሾስ።

ማጫስ ኡባይ ነና ሲቀይሳ በሳ።

5 ህንተኖ፥ የሩሳላመ ማጫሳቶ ስእተ፤

ታኒ ካሬ ግድኮካ ማላ ሎኦ።

ታ ካሬተይ ቀዳረ ዱንካነ መላ፤

ሽን ታ ማላይ ሶሎሞነ ማጋራጆታ መላ።

6 ታ ማላ ካሬዳይ አዋ፤

ታኒ ካሬ ግድዳ ግሾ ታና ቦሮፕተ።

ታ እሻት፥ ታ አየ ናይት ታራ ኦየትድ፥

ታና ዎይነ ጋደ ናግስዶሶና፤

ሄሳ ግሾ ታ ዎይንያ ናጋብከ።

7 ታ ሲቁዋዉ፥ አነ ታዉ ኦዳ፤

ነ ዶርሳ ዉድያ አዉን ሄማይ?

ሴታ ጋላስ ኤንታ አዉን ሸምፕሳይ?

ነና ደማናዉ ነ ላገታ ዉድያ ካላዳ፥

አይስ ጉሉንታዳ ብያ ማጫስ ግዶ?

8 ማጫሳ ኡባፈ ሎእያረ፥

በሳ ኤሮና እፅኮ ዶርሳታ ጌዶ ካላ።

ነ ዴሻ ማራታ ሄንንቾታ

ዱንካንያ ማታን ሄማ።

9 ታ ሲቀ! ግብፀ ካዎ ፓራ ጋረታ ጎችያ፥

ፓራታ ግዶን ደእያ ማጋየዳ ሎኣሳ።

10 ነ ሀይን ደእያ አሌቁዋራ ሺቅድ፥

ነ ሻካላይ ዋንድ ሎእ!

ነ ቆይ አልኦ ሹቻን አሌቀትስ።

11 ኑኒ ነዉ ብራን ጫደትዳ፥

ዎርቃ አሌቁዋ ኦስሳና።

12 ካዎይ ጋይታ ቦላ ኡትዳሽን፥

ታ ሽቱዋ ሳዎይ ኬን ቶንኩ ግስ።

13 ታ ሲቆይ ታ ንታ ግዶን ደእያ፥

ፁንተትዳ ሳውያ ካርበ ዳኔስ።

14 ታ ሲቆይ፥ ኤንጋዳ ዎይነ ጋደን፥

ዶልዳ ሄና ጪሻ መላ።

15 ታ ሲቀ፥ ኔኒ ዋና ሎአይ!

ኔኒ ዋና ሎአይ!

ነ አይፈት ሆለ አይፈዳ ሎኦሶና።

16 ታ ሲቁዋዉ፥ ኔኒ ዋና ሎአይ!

አይባ ኡፋይሳይ፤

ኑ አርሳይ ጭልኦ ማታ መላ ኡፋይሴስ።

17 ኑ ኬ ቱሳይ ዝጋ፤

ኑ ካራይ ፂዳን ኦይከትስ።