1 ነ ታዉ ታ አየ ን ምዳ

ታ እሻ ግድዳኮ አይበ!

ታ ነና ኦገን ደማዳ ዬርዳኮ፥

ታና ኦንካ ቦረናሽን።

2 ታኒ ነና ካለዳ፥

ታና ታማርስዳ ታ አየ ሶ ገልሳርክናሽን።

ማልእያ ኦሮማነ ጉምኤነ

ሎእያ ዎይነ ኡሻ ታ ነና ያን ኡሻርክና።

3 ታና ነ ሀድርሳ ኩሸይ ቦርኮትሴስ፥

ነ ኡሻቻ ኩሸይ ታና ቆመስ።

4 ህንተኖ፥ የሩሳላመ ጌላኦቶ፥

ታ ሲቆይ ባ ዎደ ደንዳና ጋካናዉ፥

ኮይሮትድ ህንተ እያ ደንናዳ ሀዳራ ጋይስ።

5 ባ ሲቁዋ ሀሸን ዘምፓዳ፥

መላ ቢታፈ ያራ ሀና ኦኔ?

በን ነ አይያ ነና እቀታዳ የልዳ፥

አፕለ ም ጋርሳን ነ ዝንእዳሽን፥

ነና ታ ባርክሳስ።

6 መርና ሲቁዋን ታና ነ ዎዛናን አታማ፤

ነ ቀስያን ማታመዳ ታ ፃላላ ኦይካ።

ሲቆይ ሀይቆ መላ ምኖ፤

ቃናተይ ስኦለ መላ ኢታ፤

እያ ላጮይ ፆሳ ታማ ላጮ መላ።

7 ዳሮ ሃ ሲቆ ታማ ቶይሳናዉ ዳንዳኤና፤

ድኦይካ ሜጭድ ኤፋናዉ ዳንዳኤና።

አስ ሲቆ ሻማናዉ ባዉ ደእያ ኡባ እምኮካ፥

ሲቆይ ሚሸን ሻመቶና ግሾ፥ አስ እያ ካስ።

8 ን ትራን ኡትቦና ምቻ ኑስ ደአዉሱ፤

አዝን እዮ ኦይችኮ፥ ኑ እዉ አይ ኦኔ?

9 እያ ግምበ ድርስ ግድያኮ፥

ኑኒ እ ቦላ አዱሳ ብራ ግምበ ግምባና፤

እያ ድርሳ ፐንገ ግድያኮ ዝጋ እብ መና።

10 ታኒ ድርሳ ግምበ፤

ታ ንይ ግምበ ቦላ ደእያ ሻኮ መላ፤

ታኒ ታ ሲቁዋራ ደእያ ዎደ እ ታናን ኡፋይቴስ።

11 ሶሎሞነስ ባኣል-ሀሞናን ዎይነ ጋደይ ደኤስ፤

ሄ ዎይነ ጋድያ ኡነ ኦይሳታስ እሚስ።

ከራ ኤክዳይሳት አይፍያ ግሾ፥

እሶይ እሶይ ሙኩሉ ብራ እያዉ ኤሆሶና።

12 ሽን ታዉ ታ ቡዞ ዎይነ ጋደይ ደኤስ፤

ሶሎሞነ፥ ኔኒ ሙኩሉ ብራ ኤካ፤

ኡነ ኤክድ ኦይሳት ናምኡ ፄቱ ብራ ኤኮ።

13 ነኖ፥ አታክልትያ ግዶን ደእያ ታ ሲቀ፥

ነ ላገት ነ ቃላ ስአናዉ ኮዮሶና፤

ነ ቃላ ታናካ ስሳ።

14 ታ ሲቁዋዉ፥ ታኮ ኤለ ያ!

ሽቶ ማታይ ዶልያ ደረታ ቦላራ፥

ጉፕያ ገንኤ ዎይኮ ዎሽኤ ማራዳ ሀና።